នាយកដ្ឋានថែទាំសុខភាពជនបទ សហការជាមួយអង្គការភ្លែនអន្តរជាតិប្រចាំកម្ពុជា រៀបចំសិក្ខាសាលាតម្រង់ទិសស្តីពីការរចនាបទ និងសាងសង់បង្គន់អនាម័យក្នុងតំបន់ប្រឈមដែលធន់នឹងការប្រែប្រួលអាកាសធាតុ

ខេត្តសៀមរាប ៖ នៅថ្ងៃព្រហស្បតិ៍ ១១ កើត និងថ្ងៃសុក្រ ១២កើត ខែកត្តិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៣-២៤ ខែវិច្ឆិកា ឆ្នាំ២០២៣ នៅសណ្ឋាគារខេមរាអង្គរ និងស្ពា លោកវេជ្ជបណ្ឌិត លន់ សាយតេង ប្រធាននាយកដ្ឋានថែទាំសុខភាពជនបទ បានអញ្ជើញជាអធិបតី ក្នុងសិក្ខាសាលាតម្រង់ទិសស្តីពី ការរចនាបទ និងសាងសង់បង្គន់អនាម័យក្នុងតំបន់ប្រឈមដែលធន់នឹងការប្រែប្រួលអាកាសធាតុ ដោយមានការចូលរួមពី លោក សឿ សហរិទ្ធ អនុប្រធានមន្ទីរអភិវឌ្ឍន៍ជនបទខេត្តសៀមរាប, លោក យី គឹមថាន នាយករងអង្គការភ្លែនអន្តរជាតិប្រចាំកម្ពុជា, ថ្នាក់ដឹកនាំ និងមន្រ្ដីបច្ចេកទេស នៃនាយកដ្ឋានថែទាំសុខភាពជនបទ, លោក លោកស្រីតំណាងមន្ទីរអភិវឌ្ឍន៍ជនបទខេត្តចំនួន ៥ ខេត្ត រួមមាន ខេត្តរតនគិរី ក្រចេះ ស្ទឹងត្រែង មណ្ឌលគិរី ព្រះវិហារ និងតំណាងអង្គការភ្លែន Wetlends work សរុប ៤៤នាក់។

សិក្ខាសាលានេះមានគោលបំណង ៖

១. ដើម្បីផ្សព្វផ្សាយពីរចនាបទនៃការសង់បង្គន់អនាម័យធន់នឹងការប្រែប្រួលអាកាសធាតុនៅតំបន់ប្រឈមក្នុងខេត្តទាំង៥

២.ដើម្បីឱ្យអ្នកផ្គត់ផ្គង់សម្ភារអនាម័យទទួលបានបច្ចេកទេសសាងសង់បង្គន់អនាម័យនៅតំបន់ប្រឈមដែលធន់នឹងការប្រែប្រួលអាកាសធាតុ។

សិក្ខាសាលា ដំណើរការដោយមានការធ្វើបទបង្ហាញពី តំណាងនាយកដ្ឋានថែទាំសុខភាពជនបទ និងអង្គការភ្លែន Wetlends Work អំពីការរចនាបទ និងបច្ចេកទេសសង់បង្គន់អនាម័យនៅតំបន់ប្រឈមដែលធន់នឹងការប្រែប្រួលអាកាស ដោយទទួលលទ្ធផលដូចខាងក្រោម៖

– អ្នកចូលរួមទាំងអស់ បានយល់ដឹងពីបច្ចេកទេសសាងសង់បង្គន់លូភ្លោះ និងចែករំលែកបទពិសោធន៍ល្អៗពីខេត្តរបស់ខ្លួន

-អ្នកចូលរួមនឹងបន្តផ្សព្វផ្សាយទៅដល់សហគមន៍ ពីផលប៉ះពាល់ដោយអាកាសធាតុលើលទ្ធភាពប្រើប្រាស់ទឹកស្អាត និងអនាម័យ៕

Share your thoughts