ក្រុមការងារបច្ចេកទេសនាយកដ្ឋានថែទាំសុខភាពជនបទ រៀបចំវគ្គបណ្តុះបណ្តាល ស្តីពីការពន្លឿនស្ថានភាព ODF តាមរយ:ការពង្រឹងប្រព័ន្ធអនាម័យជនបទ

ខេត្តរតនគិរី៖ នាថ្ងៃព្រហស្បតិ៍ ៥កើត ខែអស្សុជ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី១៩ ខែតុលា ឆ្នាំ២០២៣ នៅសាលាស្រុកអូរយ៉ាដាវ ក្រុមការងារបច្ចេកទេសនាយកដ្ឋានថែទាំសុខភាពជនបទ នៃក្រសួងអភិវឌ្ឍន៍ជនបទដឹកនាំដោយ លោក វណ្ណ សាឬទ្ធិ ប្រធានការិយាល័យ និង លោក អ៊ុក ច័ន្ទសោភា អនុប្រធានការិយាល័យ  បានសហការជាមួយមន្រ្តីជំនាញនៃមន្ទីរអភិវឌ្ឍន៍ជនបទខេត្តរតនគិរី រៀបចំវគ្គបណ្តុះបណ្តាលស្តីពី ការពន្លឿនស្ថានភាព ODF តាមរយ:ការពង្រឹងប្រព័ន្ធអនាម័យជនបទ ដែលមានរយៈពេលពីរថ្ងៃ ចាប់ពីថ្ងៃទី១៩ ដល់ថ្ងៃទី២០ ខែតុលា ឆ្នាំ២០២៣ ជូនដល់អភិបាលរងស្រុកដែលទទួលបន្ទុក និងជនបង្គោលទឹកស្អាត និងអនាម័យថ្នាក់ឃុំ សរុបចំនួន ២០រូប ស្រី ០៧រូប។

សិក្ខាសាលានេះមានគោលបំណងផ្តល់ចំណេះដឹង និងជំនាញ ព្រមទាំងវិធីសាស្រ្តផ្សេងៗដល់សិក្ខាកាមឱ្យយល់ដឹងពីរបៀបអប់រំ និងជំរុញសហគមន៍ឱ្យផ្លាស់ប្តូរឥរិយាបថ ឈានទៅរកការសាងសង់និងប្រើប្រាស់បង្គន់គ្រប់ខ្នងផ្ទះ។

វគ្គបណ្តុះបណ្តាលទទួលបានលទ្ធផលដូចខាងក្រោម៖

១.សិក្ខាកាមទាំងអស់បានយល់ដឹងអំពីការអប់រំ និងអាចបំផុសសហគមន៍ឱ្យផ្លាស់ប្តូរឥរិយាបថតាមគោលដៅរៀងៗខ្លួន។

២.សិក្ខាកាមបានយល់ដឹងពីរបៀបប្រើប្រាស់ឯកសារក្នុងការផ្ទៀងផ្ទាត់ODF។

៣.សិក្ខាកាមបានយល់ដឹងអំពីការគ្រប់គ្រងទិន្នន័យអនាម័យ និងការគូរផែនទីអនាម័យភូមិ ដើម្បីជួយពន្លឿន ODF។

៤.អាជ្ញាធរស្រុក ឃុំ និង ភូមិបានប្ដេជ្ញាថា នៅឆ្នាំ២០២៤ ស្រុកអូយ៉ាដាវ នឹងក្លាយជាស្រុកបញ្ចប់ការបន្ទោបង់ពាសវាលពាសកាល៕