ឯកឧត្តមបណ្ឌិត នួន ពេជ្រនិមិត្ត អញ្ជើញជាអធិបតីក្នុង កិច្ចប្រជុំបូកសរុបការងារប្រចាំខែមេសា និងលើកទិសដៅការងារខែឧសភា ឆ្នាំ២០២៤

ខេត្តស្ទឹងត្រែង៖ នារសៀលថ្ងៃព្រហស្បតិ៍ ៩រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០២ ខែឧសភា ឆ្នាំ២០២៤ ឯកឧត្តមបណ្ឌិត នួន ពេជ្រនិមិត្ត រដ្ឋលេខាធិការ តំណាងដ៍ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ អមដំណើរដោយ ឯកឧត្តម ឌៀប កាណូរ៉ា អនុរដ្ឋលេខាធិការ បានដឹកនាំកិច្ចប្រជុំបូកសរុបការងារប្រចាំខែមេសា និងលើកទិសដៅការងារខែឧសភា ឆ្នាំ២០២៤ នៅមន្ទីរអភិវឌ្ឍន៍ជនបទខេត្តស្ទឹងត្រែង ដោយមានការចូលរួមពី លោក ព្រំ ចាន់ថា ប្រធានមន្ទីរអភិវឌ្ឍន៍ជនបទខេត្តស្ទឹងត្រែង រួមជាមួយលោក លោកស្រីជាថ្នាក់ដឹកនាំនិងមន្រ្តីរាជការនៃមន្ទីរអភិវឌ្ឍន៍ជនបទខេត្តទាំងអស់។

បន្ទាប់ពីលោកប្រធានមន្ទីរ បានរាយការណ៍នូវសកម្មភាពការងារប្រចាំខែមេសារួចមក ក្នុងឱកាសនោះ ឯកឧត្ដមរដ្ឋលេខាធិការ បានសំណេះសំណាលនិងផ្ដល់អនុសាសន៍ណែនាំដូចខាងក្រោម៖
១. បានថ្លែងអំណរគុណយ៉ាងជ្រាលជ្រៅដល់លោក លោកស្រី ជាថ្នាក់ដឹកនាំ និងមន្រ្តីរាជការទាំងអស់នៃមន្ទីរអភិវឌ្ឍន៍ជនបទខេត្ត ដែលចំណាយពេលវេលាដ៍មានតម្លៃអញ្ជើញចូលរួមប្រជុំនាឱកាសនេះ
២. បានពាំនាំពាក្យផ្ដាំផ្ញើសាកសួរសុខទុក្ខដល់ថ្នាក់ដឹកនាំមន្ទីរ ក៍ដូចជាមន្រ្តីរាជការទាំងអស់ក្នុងមន្ទីរ ពីសំណាក់ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ
៣. បានណែនាំឱ្យមន្រ្តីក្នុងមន្ទីរបង្កើននូវសាមគ្គីភាពភាពក្នុងកិច្ចការងារជារួមក្នុងមន្ទីរដោយចាត់ទុកជាបងប្អូននៃអាជីពការងារ
៤. បានថ្លែងអំណរគុណយ៉ាងជ្រាលជ្រៅចំពោះមន្រ្តីរាជការក្នុងមន្ទីរទាំងអស់ដែលបានខិតខំ និងប្រឹងប្រែងយកចិត្តទុកដាក់ក្នុងការបំពេញការងារក្នុងខែមេសា ឆ្នាំ២០២៤ ដែលសម្រេចលទ្ធផលបានគួរជាទីកត់សម្គាល់
៥. បានបង្កើតក្រុមការងារបន្ទាន់ចំនួន០២ក្រុម ដើម្បីចុះជួយដល់បងប្អូនប្រជាពលរដ្ឋនៅតាមមូលដ្ឋានដែលខ្វះទឹកស្អាតប្រើប្រាស់ក្នុងដំណាក់កាលគ្រោះរាំងស្ងួតកើតមានឡើងក្នុងខេត្ត។