លោក  ប្លង់  បញ្ញា ដឹកនាំក្រុមការងារបច្ចេកទេស ចុះធ្វើការជួសជុលបន្ទាន់នូវអណ្តូងស្នប់ចំនួន ២អណ្តូង និងសាងសង់ថ្មី១អណ្ដូង នៅស្រុកតាលោសែនជ័យ 

ខេត្តពោធិ៍សាត់៖ នាព្រឹកថ្ងៃអង្គារ ៧រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី៣០ ខែមេសា ឆ្នាំ២០២៤ លោក ប្លង់ បញ្ញា អនុប្រធានមន្ទីរអភិវឌ្ឍន៍ជនបទខេត្តពោធិ៍សាត់ បានដឹកនាំក្រុមការងារបច្ចេកទេស ចុះធ្វើការជួសជុលបន្ទាន់នូវអណ្តូងស្នប់ចំនួន ២អណ្តូង ដែលបានខូច ស្ថិតនៅភូមិតាសាស់  ឃុំផ្ទះរុង ស្រុកតាលោសែនជ័យ ដើម្បីជួយសម្រួលដល់ប្រជាពលរដ្ឋចំនួន ៣១គ្រួសារ ដែលកំពុងជួបបញ្ហាខ្វះទឹកស្អាតប្រើប្រាស់។

នៅថ្ងៃដដែលនោះក្រុមការងារ ដឹកនាំដោយលោកអនុប្រធានមន្ទីរ បន្តចុះត្រួតពិនិត្យលើការខួងអណ្តូងថ្មី ១កន្លែងទៀត ស្ថិតនៅភូមិសំសាន ឃុំតាលោ ស្រុកតាលោសែនជ័យ ជាភូមិដែលប្រជាពលរដ្ឋកំពុងជួបគ្រោះរាំងស្ងួត ខ្វះទឹកស្អាតប្រើប្រាស់ ចំពោះអណ្ដូងស្នប់ថ្មីនេះ នឹងជួយសម្រួលដល់ការប្រើប្រាស់ទឹកស្អាតដល់ប្រជាពលរដ្ឋក្នុងកំឡុងពេលដែលភូមិកំពុងរងគ្រោះដោយសារភាពរាំងស្ងួតផងដែរ៕