ឯកឧត្តមបណ្ឌិត នួន ពេជ្រនិមិត្ត អញ្ជើញជាអធិបតីក្នុងពិធីចែកវិញ្ញាបនបត្របញ្ជាក់ការសិក្សាជូនសិក្ខាកាម ដែលបានបញ្ចប់វគ្គបណ្តុះបណ្តាលឆ្នាំ២០២៣ និងបើកវគ្គបណ្ដុះបណ្ដាលថ្មីឆ្នាំ២០២៤ របស់មជ្ឈមណ្ឌលបណ្តុះបណ្តាលជំនាញមូលដ្ឋានខេត្តបាត់ដំបង

ខេត្តបាត់ដំបង ៖ នាព្រឹកថ្ងៃព្រហស្បតិ៍ ១៤រោច ខែបុស្ស ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៨ ខែកុម្ភៈ ឆ្នាំ២០២៤ លោក ឌី សារ៉ាត់ ប្រធាននាយកដ្ឋានបណ្តុះបណ្តាល និងស្រាវជ្រាវ បានអញ្ជើញចូលរួមក្នុងពិធីចែកវិញ្ញាបនបត្របញ្ជាក់ការសិក្សាជូនសិក្ខាកាម ដែលបានបញ្ចប់វគ្គបណ្ដុះបណ្ដាលឆ្នាំ២០២៣ និងបើកវគ្គបណ្ដុះបណ្ដាលថ្មីឆ្នាំ២០២៤ របស់មជ្ឈមណ្ឌលបណ្តុះបណ្តាលជំនាញមូលដ្ឋានខេត្តបាត់ដំបង ក្រោមអធិបតីភាពឯកឧត្តមបណ្ឌិត នួន ពេជ្រនិមិត្ត រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ។

ក្នុងពិធីចែកវិញ្ញាបនបត្របញ្ជាក់ការសិក្សានេះផងដែរ មានការអញ្ជើញចូលរួមពី ថ្នាក់ដឹកនាំនាយកដ្ឋានបណ្តុះបណ្តាល និងស្រាវជ្រាវ លោកប្រធានមន្ទីរ ថ្នាក់ដឹកនាំ និងមន្រ្តីរាជការនៃមន្ទីរអភិវឌ្ឍន៍ជនបទខេត្តបាត់ដំបង ព្រមទាំងសិក្ខាកាមដែលបានបញ្ចប់វគ្គបណ្ដុះបណ្ដាលដោយជោគជ័យសរុបចំនួន ៩០នាក់ ស្រី ២៨នាក់។

សូមបញ្ជាក់ថា សិក្ខាកាមដែលទទួលវិញ្ញាបនបត្រនៅពេលនេះ គឺបានឆ្លងកាត់ការបណ្ដុះបណ្ដាល និងបានប្រឡងជាប់ជាស្ថាពរ វគ្គកុំព្យូទ័ររដ្ឋបាល ចំនួន២៦ នាក់ ស្រី២១នាក់ និងវគ្គជួសជុលម៉ាស៊ីនកសិកម្មខ្នាតតូច ចំនួន៤ នាក់។

ឆ្លៀតក្នុងឱកាសនោះ ឯកឧត្តមបណ្ឌិតរដ្ឋលេខាធិការ បានផ្តាំផ្ញើដល់សិក្ខាកាមគ្រប់រូបដែលបានបញ្ចប់ការសិក្សាក្នុងឆ្នាំ ២០២៣ ត្រូវយកចំណេះជំនាញទាំងនេះ ទៅអនុវត្តផ្ទាល់តាមរយៈការប្រកបមុខរបរផ្ទាល់ខ្លួន ឬប្រកបការងារផ្សេងៗ និងត្រូវខិតខំសិក្សាស្វែងយល់ឱ្យបានច្រើនបន្ថែមទៀត ដើម្បីពង្រីកចំណេះដឹងឱ្យកាន់តែទូលំទូលាយ ធានាបាននូវស្ថិរភាពការងារ និងប្រាក់ចំណូលបន្ថែមសម្រាប់ផ្គង់ផ្គង់គ្រួសាររៀងៗខ្លួន។ ចំពោះសិក្ខាកាមថ្មីដែលទើបចូលមកសិក្សាក្នុងវគ្គសិក្សាថ្មី ឆ្នាំ ២០២៤ នេះ ត្រូវខិតខំយកចិត្តទុកដាក់ សិក្សាស្វែងយល់អំពីជំនាញបច្ចេកទេសឱ្យបានច្បាស់លាស់ ដោយត្រូវមកសិក្សាឱ្យបានទៀងទាត់ទាន់ពេលវេលា និងត្រូវខិតខំចូលរួមអនុវត្តផ្ទាល់តាមការណែនាំរបស់លោកគ្រូ អ្នកគ្រូឧទ្ទេស ដើម្បីប្រឡងបញ្ចប់ដោយជោគជ័យ ទទួលបាននិទ្ទេសល្អ ព្រមទាំងទទួលបានជំនាញច្បាស់លាស់សម្រាប់ចិញ្ចឹមជីវិតទៅថ្ងៃអនាគត់។

ឯកឧត្តមបណ្ឌិតរដ្ឋលេខាធិការ ក៏បានបន្ថែមទៀតថា សម្រាប់វគ្គបណ្តុះបណ្តាលនេះដែរគឺត្រូវសិក្សាឱ្យបានច្បាស់ពីតម្រូវការទីផ្សារការងារ និងមុខរបរនៅតាមតំបន់ដែលពួកគាត់រស់នៅ និងត្រូវពង្រឹងគុណភាពបណ្តុះបណ្តាលឱ្យបានល្អ៕

Share your thoughts