លោកវេជ្ជបណ្ឌិត លន់ សាយតេង បានចូលរួមជាគណៈអធិបតីចូលរួមសិក្ខាសាលាស្តីពី ការគាំពារមតិពន្លឿនការលើកកម្ពស់កម្មវិធីផ្គត់ផ្គង់ទឹកស្អាត និងអនាម័យជនបទ ខេត្តរតនគិរី

ខេត្តរតនគិរី៖ កាលពីព្រឹកថ្ងៃសុក្រ១០កើត ខែមិគសិរ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២២ ខែធ្នូ ឆ្នាំ២០២៣ លោកវេជ្ជបណ្ឌិត លន់ សាយតេង ប្រធាននាយកដ្ឋានថែទាំសុខភាពជនបទ និងមន្រ្តីជំនាញនាយកដ្ឋានថែទាំសុខភាពជនបទ ចំនួន២រូប និង លោក អៀម អឿន ប្រធានមន្ទីរអភិវឌ្ឍន៍ជនបទ ព្រមទាំង លោក ស្រី វិន អ្នកសម្របសម្រួលកម្មវិធី អង្គការវឌ្ឍនភាព បានចូលរួមជាគណៈអធិបតីចូលរួមសិក្ខាសាលាស្តីពី ការគាំពារមតិពន្លឿនការលើកកម្ពស់កម្មវិធីផ្គត់ផ្គង់ទឹកស្អាត និងអនាម័យជនបទ និងមានការអញ្ជើញចូលរួមពី លោក ផាត សម្បត្តិ អភិបាលរងស្រុកអូរយ៉ាដាវ និងលោក អុីម ឌឿន អភិបាលរងស្រុកអណ្តូងមាស តំណាងអង្គការវឌ្ឍនភាព ជនបង្គោលថ្នាក់ឃុំ និងភូមិដែលមានអ្នកចូលរួមសរុប ៥៤រូប ស្រី ១០រូប។

គោលបំណងសំខាន់ ដើម្បីផ្តល់ចំណេះដឹងដល់អាជ្ញាធរមូលដ្ឋានឱ្យយល់ដឹង ពីរបៀបផ្លាស់ប្តូរឥរិយាបថសហគមន៍ និងកត្តាតាំងចិត្តពីថ្នាក់ដឹកនាំមូលដ្ឋាន។

ជាលទ្ធផលសម្រេចដូចខាងក្រោម៖

១.លោក ស្រី វិន ប្រធានកម្មវិធីអង្គការវឌ្ឍនភាព បានមានមតិស្វាគមន៍បានបង្ហាញនូវរបាយការណ៍សង្ខេបពីលទ្ធផលគម្រោងដែលបានអនុវត្តកន្លងមក។

២.លោកវេជ្ជបណ្ឌិត លន់ សាយតេង ប្រធាននាយកដ្ឋានថែទំាសុខភាពជនបទ បានមានមតិស្វាគមន៍ ហេីយបានបង្ហាញភាពស្ថានភាពអនាម័យទូទាំងប្រទេស និងចែករំលែកបទពិសោធន៍ដែលនាំឱ្យភូមិ ឃុំ ស្រុក ខេត្តទទួលបានODF និងមតិបេីកសិក្ខាសាលា។

៣.ពិភាក្សាក្រុមតាមភូមិឃុំស្រុក អំពីស្ថានភាពអនាម័យ ចំនួនបង្គន់ដែលនៅសល់ក្នុងភូមិឃុំ និងរកដំណោះស្រាយបញ្ហា។

៤.ក្រោយពីធ្វេីបទបង្ហាញរួច មានការចូលរួមមតិពីខាងមន្ទីរផែនការ និងមន្ទីរសេដ្ឋកិច្ច និងហិរញ្ញវត្ថុ អំពីការលេីកផែនការថវិកា និងរបៀបចាយថវិកាលេីផ្នែកទឹកស្អាត និងអនាម័យ ។

៥. អាជ្ញាធរមូលដ្ឋាន គ្រប់លំដាប់ថ្នាក់ក្នុងស្រុកអូរយ៉ាដាវ និងស្រុកអណ្តូងមាសបានឯកភាពថា នឹងជំរុញស្រុកនេះឱ្យទទួលបាន ODFនៅក្នុងឆ្នាំ២០២៤។

សិក្ខាសាលាបានបញ្ចប់ប្រកបដោយបរិយាកាស សប្បាយរីករាយ និងស្និទ្ធស្នាលបំផុត។