ផ្លូវជនបទនៅខេត្តកណ្ដាល ១ខ្សែ ដែលបានខូចខាត ដោយសារជំនន់ទឹកភ្លៀង ត្រូវបានជួសជុលសម្រេចបាន៩០% ហើយ ដើម្បីសម្រួលដល់ការធ្វើដំណើររបស់ប្រជាពលរដ្ឋ

ខេត្តកណ្តាល៖ថ្ងៃចន្ទ ៧រោច ខែកត្តិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី០៤ ខែធ្នូ ឆ្នាំ២០២៣ ដោយមានការយកចិត្តទុកដាក់ខ្ពស់ពីសំណាក់ ឯកឧត្តម ឆាយ ឬទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និងមានការណែនាំពីសំណាក់ ឯកឧត្តម គង់ សោភ័ណ្ឌ អភិបាល នៃគណៈអភិបាលខេត្តកណ្តាល លោកស្រី ជី ថាវី ប្រធានមន្ទីរអភិវឌ្ឍន៍ជនបទខេត្ត បានណែនាំដល់ក្រុមការងារបច្ចេកទេសផ្លូវជនបទ ដឹកនាំដោយ លោក ឌុច ឌីណូ អនុប្រធានការិយាល័យផ្លូវជនបទ នៃមន្ទីរអភិវឌ្ឍន៍ជនបទខេត្ត  និងក្រុមការងារបច្ចេកទេស បានចុះត្រួតពិនិត្យការដ្ឋានជួសជុលផ្លូវបន្ទាន់ ដោយកម្រាលថ្មមិច ចំនួន ០១ខ្សែ ប្រវែង ១ ២០០ម៉ែត្រ ស្ថិតនៅភូមិក្បាលកោះតូច ឃុំតាលន់ ស្រុកស្អាង។

សូមបញ្ជាក់ផងដែរថា ផ្លូវនេះកាលពីរដូវវស្សាកន្លងមកទទួលរងនូវការលិចលង់ដោយសារជំនន់ទឹកភ្លៀង បណ្ដាលឱ្យដាច់តួផ្លូវជាកំណាត់ៗ បង្កការលំបាកដល់ប្រជាពលរដ្ឋក្នុងការធ្វើចរាចរណ៍ និងការដឹកកសិផលផ្សេងៗទៅកាន់ទីផ្សារ ជាពិសេសសិស្សានុសិស្សធ្វើដំណើរទៅសាលារៀន។

ការកែលម្អខ្សែផ្លូវខាងលើនេះ បាននិងកំពុងធ្វើការជួសជុលយ៉ាងសកម្ម និងយកចិត្តទុកដាក់ខ្ពស់ ដើម្បីធ្វើយ៉ាងណាឱ្យឆ្លើយតបនឹងតម្រូវការប្រើប្រាស់ចាំបាច់របស់ប្រជាពលរដ្ឋបានទាន់ពេលវេលា បច្ចុប្បន្ន សម្រេចបានលទ្ធផល ៩០%៕