ឯកឧត្តមរដ្ឋលេខាធិការក្រសួងអភិវឌ្ឍន៍ជនបទ​ ដឹកនាំកិច្ចប្រជុំជាមួយថ្នាក់ដឹកនាំ និង មន្ត្រីរាជការ នៃមន្ទីរអភិវឌ្ឍន៍ជនបទខេត្តកែប។​

ខេត្តកែប ៖ នាព្រឹកថ្ងៃអង្គារ ៩​រោច ខែអស្សុជ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី៧ ខែវិច្ឆិកា ឆ្នាំ២០២៣ នៅសាលប្រជុំ នៃមន្ទីរអភិវឌ្ឍន៍ជនបទខេត្តកែប ឯកឧត្តម ថោង​ ពោជ រដ្ឋលេខាធិការ និង លោកជំទាវ ​ឯក​​​​​ គន្ធវារី អនុរដ្ឋលេខាធិការ  តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ អញ្ជើញចូលរួមកិច្ចប្រជុំជាមួយថ្នាក់ដឹកនាំ និង មន្ត្រីរាជការ នៃមន្ទីរអភិវឌ្ឍន៍ជនបទខេត្តកែប​​ ចំនួន១៩រូប ដោយបាន៖

១- ស្តាប់នូវរបាយការណ៍បូកសរុបលទ្ធផលការងារ ដែលមន្ទីរអភិវឌ្ឍន៍ជនបទខេត្តកែប បានអនុវត្តរួចមក ។

២- ឯកឧត្តម បានសំណេះសំណាល សាកសួរសុខទុក្ខ ក្នុងនាម ឯកឧត្តមរដ្ឋមន្ត្រី ចំពោះថ្នាក់ដឹកនាំ មន្ត្រីរាជការរបស់មន្ទីរអភិវឌ្ឍន៍ជនបទខេត្ត ដោយផ្តោតទៅលើ​យុទ្ធសាស្ត្របញ្ចកោណដំណាក់កាលទី១​​​របស់រាជរដ្ឋាភិបាល និងកម្មវិធីអាទិភាពចំនួន៤របស់ក្រសួងអភិវឌ្ឍន៍ជនបទ។

ឯកឧត្តមផ្តាំផ្ញើ និងណែនាំឲ្យមន្ត្រីនៃមន្ទីរអនុវត្តនូវកិច្ចការងារមួយចំនួនដែលចាំបាច់ត្រូវបំពេញ ក្នុងបេសកកម្មរបស់ក្រសួងអភិវឌ្ឍន៍ជនបទ និងជាពិសេសពង្រឹងសាមគ្គីភាពផ្ទៃក្នុងឲ្យបានល្អប្រសើរ។