មន្ទីរអភិវឌ្ឍន៍ជនបទខេត្តស្វាយរៀង រៀបចំកិច្ចប្រជុំ បូកសរុបលទ្ឋផលការងារត្រីមាសទី៣ និងលើកទិសដៅការងារត្រីមាសទី៤ ឆ្នាំ២០២៣ របស់ក្រុមការងារបច្ចេកទេសវិស័យផ្គត់ផ្គង់ទឹក ការសម្អាត និងអនាម័យជនបទខេត្ត

ខេត្តស្វាយរៀង៖ នៅព្រឹកថ្ងៃពុធ ៥រោច ខែភទ្របទ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី០៤ ខែតុលា ឆ្នាំ២០២៣ នៅសាលប្រជុំមន្ទីរអភិវឌ្ឍន៍ជនបទខេត្តស្វាយរៀង លោក សំ នីតូ ប្រធានមន្ទីរអភិវឌ្ឍន៍ជនបទខេត្តស្វាយរៀង និងជាប្រធានលេខាធិការដ្ឋានវិស័យផ្គត់ផ្គង់ទឹក ការសម្អាត និងអនាម័យជនបទថ្នាក់ខេត្ត(PWG-S) បានអញ្ជើញចូលរួមក្នុងកិច្ចប្រជុំបូកសរុបលទ្ឋផលការងារត្រីមាសទី៣ និងលើកទិសដៅការងារត្រីមាសទី៤ ឆ្នាំ២០២៣ របស់ក្រុមការងារបច្ចេកទេសវិស័យផ្គត់ផ្គង់ទឹក ការសម្អាត និងអនាម័យជនបទថ្នាក់ខេត្ត(PWG-RWSSH) ក្រោមអធិបតីភាព លោកបណ្ឌិត តូច ប៉ូលីវ៉ា អភិបាលរងនៃគណៈអភិបាលខេត្តស្វាយរៀង និងជាប្រធានក្រុមការងារវិស័យផ្គត់ផ្គង់ទឹក ការសម្អាត និងអនាម័យជនបទថ្នាក់ខេត្ត (PWG-RWSSH) ដោយមានការអញ្ជើញចូលរួមពី លោក សែវ  ផន អនុប្រធាននាយកដ្ឋានផ្គត់ផ្គង់ទឹកជនបទរបស់ក្រសួងអភិវឌ្ឍន៍ជនបទ លោក ឈន ឈឿន ប្រធានការិយាល័យថែទាំសុខភាពជនបទ លោកស្រី គង់ អ៊ា ប្រធានអង្គការស្អាតកម្ពុជា ថ្នាក់ដឹកនាំនៃមន្ទីរជំនាញជុំវិញខេត្ត អភិបាលរងក្រុង/ស្រុកទាំង៨ និងតំណាងអង្គការដៃគូអភិវឌ្ឍន៍ពាក់ព័ន្ធ។

កិច្ចប្រជុំនេះមានគោលបំណងសំខាន់ៗចំនួន០៣ ដូចខាងក្រោម៖

– បង្ហាញវឌ្ឍនភាពការងារផ្គត់ផ្គង់ទឹក ការសម្អាត និងអនាម័យជនបទ ប្រចាំត្រីមាសទី៣ និងទិសដៅការងារត្រីមាសទី៤ ឆ្នាំ២០២៣ ដែលអនុវត្តដោយក្រុមការងារ PWG-RWSSH ខេត្តស្វាយរៀង

– ពិនិត្យវឌ្ឍនភាពការអនុវត្តផែនការរក្សានិរន្តរភាព ODF ខេត្ត និងឈានទៅសម្រេច ODF Plus

– ជំរុញដល់ក្រុមការងារ DWGs ក្រុង/ស្រុកទាំង៨ ឱ្យធ្វើការណែនាំបន្ត ទៅដល់ឃុំ/សង្កាត់ទាំង៨០ ក្នុងការបែងចែកថវិការបស់ក្រុង/ស្រុក និងឃុំ/សង្កាត់ ដើម្បីអនុវត្តសកម្មភាពវិស័យផ្គត់ផ្គង់ទឹក ការសម្អាត និងអនាម័យជនបទដោយខ្លួនឯង៕