ឯកឧត្តម ជី ស៊ីថា អញ្ជើញចូលរួមសិក្ខាសាលាពិគ្រោះយោបល់លើសេចក្តីព្រាងផែនទីបង្ហាញផ្លូវស្តីពីការជំរុញ សមាគមមនុស្សចាស់និងអន្តរជំនាន់ពហុមុខងារ

រាជធានីភ្នំពេញ៖ នាថ្ងៃអង្គារ ៧រោច ខែជេស្ឋ ឆ្នាំម្សាញ់ សប្ដស័ក ព.ស ២៥៦៩ ត្រូវនឹងថ្ងៃទី១៧ ខែមិថុនា ឆ្នាំ២០២៥ ឯកឧត្តម ជី ស៊ីថា រដ្ឋលេខាធិការ និងជាប្រធានក្រុមការងារទទួលបន្ទុកការងារមនុស្សចាស់ក្រសួងអភិវឌ្ឍន៍ជនបទ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ អមដំណើរដោយ លោក ព្រហ្ម ប៉ូលីម អនុប្រធានការិយាល័យ នៃនាយកដ្ឋានថែទាំសុខភាពជនបទ និងជាលេខាធិការក្រុមការងារ បានអញ្ជើញចូលរួមសិក្ខាសាលាពិគ្រោះយោបល់លើសេចក្តីព្រាងផែនទីបង្ហាញផ្លូវស្តីពីការជំរុញ សមាគមមនុស្សចាស់និងអន្តរជំនាន់ពហុមុខងារ ក្រោមអធិបតីភាព ឯកឧត្តម មុំ ប៊ុនថន រដ្ឋលេខាធិការក្រសួងសង្គមកិច្ច អតីតយុទ្ធជន និង យុវនីតិសម្បទា។ សិក្ខាសាលានេះប្រព្រឹត្តទៅនៅ សណ្ឋាគារ Sun&Moon Riverside ដោយមានអ្នកចូលរួមប្រមាណ ១០៣រូប (ស្រី៣៥រូប) រួមមាន ក្រសួងសង្គមកិច្ច អតីតយុទ្ធជន និងយុវនីតិសម្បទា តំណាងពីក្រសួង ស្ថាប័ននិងអង្គភាពពាក់ព័ន្ធទាំង៣០ កម្មវិធីអភិវឌ្ឍន៍សហប្រជាជាតិប្រចាំកម្ពុជា (UNDP) អង្គការមនុស្សចាស់កម្ពុជា (HAC)  អង្គការការីតាសកម្ពុជា និងតំណាងសមាគមមនុស្សវ័យចាស់ខេត្ត។

គោលបំណងនៃសិក្ខាសាលា គឺដើម្បី (១). ពិនិត្យ ពិគ្រោះយោបល់ និងប្រមូលធាតុចូលលើសេចក្តីព្រាងផែនទី បង្ហាញផ្លូវស្តីពីការជំរុញ សមាគមមនុស្សចាស់និងអន្តរជំនាន់ពហុមុខងារ និង (២). ចែករំលែកនូវចំណេះដឹងនិងបទពិសោធន៍ទាំងឡាយពាក់ព័ន្ធនឹងសមាគមមនុស្សចាស់៕