ឯកឧត្តម ប៊ុន ច័ន្ទវណ្ណៈ អញ្ជើញចូលរួមសិក្ខាសាលាស្តីពីការផ្សព្វផ្សាយការអនុវត្តនិយាមនីតិវិធីប្រតិបត្តិ និងការចែករំលែកបទពិសោធ សម្រាប់ការប្រឡងប្រជែងជ្រើសរើសមន្រ្តីរាជការស៊ីវិល

រាជធានីភ្នំពេញ ៖ នាព្រឹកថ្ងៃពុធ ៤កើត ខែពិសាខ ឆ្នាំម្សាញ់ សប្តស័ក ព.ស.២៥៦៨ ត្រូវនឹងថ្ងៃទី៣០ ខែមេសា ឆ្នាំ២០២៥ ឯកឧត្តម ប៊ុន ច័ន្ទវណ្ណៈ រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ប្ញទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ អមដំណើរដោយលោក គង់ វិទ្យា អគ្គនាយករងរដ្ឋបាលនិងហិរញ្ញវត្ថុ លោក ផល សុខសំណាង ប្រធាននាយកដ្ឋានរដ្ឋបាលនិងបុគ្គលិក និងលោក ឆេង សុផាណារម្យ អនុប្រធាននាយកដ្ឋានរដ្ឋបាលនិងបុគ្គលិក បានអញ្ជើញចូលរួមសិក្ខាសាលាស្តីពីការផ្សព្វផ្សាយការអនុវត្តនិយាមនីតិវិធីប្រតិបត្តិ និងការចែករំលែកបទពិសោធ សម្រាប់ការប្រឡងប្រជែងជ្រើសរើសមន្រ្តីរាជការស៊ីវិល ក្រោមអធិបតីភាពដ៏ខ្ពង់ខ្ពស់ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ នៅសណ្ឋាគារភ្នំពេញ រាជធានីភ្នំពេញ។ អញ្ជើញចូលរួមក្នុងសិក្ខាសាលានេះមាន ឯកឧត្តម លោកជំទាវ ជាថ្នាក់ដឹកនាំតំណាងក្រសួង ស្ថាប័ន រដ្ឋលេខាធិការដ្ឋាន ថ្នាក់ដឹកនាំក្រសួងនិងប្រធានមន្ទីរមុខងារសាធារណៈ ២៥រាជធានី ខេត្ត សរុបប្រមាណ ៣០០នាក់។

សិក្ខាសាលានេះរៀបចំដោយក្រសួងមុខងារសាធារណៈ ដើម្បីផ្សព្វផ្សាយការអនុវត្តនិយាមនីតិវិធីប្រតិបត្តិ និងការចែករំលែកបទពិសោធ សម្រាប់ការប្រឡងប្រជែងជ្រើសរើសមន្រ្តីរាជការស៊ីវិលជូនក្រសួង ស្ថាប័ន។

ថ្លែងក្នុងឱកាសនេះ ឯកឧត្តម ហ៊ុន ម៉ានី ឧបនាយករដ្ឋមន្រ្តី បានមានប្រសាសន៍ផ្តោតលើខ្លឹមសារនិងអត្ថប្រយោជន៍នៃសិក្ខាសាលាស្តីពីការផ្សព្វផ្សាយការអនុវត្តនិយាមនីតិវិធីប្រតិបត្តិ និងការចែករំលែកបទពិសោធ សម្រាប់ការប្រឡងប្រជែងជ្រើសរើសមន្រ្តីរាជការស៊ីវិល ដើម្បីឱ្យគ្រប់ក្រសួង ស្ថាប័ន យល់កាន់តែច្បាស់ និងការជឿទុកចិត្តចំពោះក្រសួងមុខងារសាធារណៈក្នុងការរៀបចំការងារប្រឡងជ្រើសរើសមន្រ្តីរាជការចូលបម្រើការងារតាមក្រសួង ស្ថាប័ននីមួយៗ និងមានការធ្វើបទបង្ហាញនិងការចែករំលែកបទពិសោធន៍ ពីវាគ្មិនជាថ្នាក់ដឹកនាំរបស់ក្រសួងមុខងារសាធារណៈ លើប្រធានបទ “ការដាក់ឱ្យអនុវត្តនិយាមប្រតិបត្តិប្រឡងប្រជែង” និង“ការចែករំលែកបទពិសោធន៍នៃដំណើរការប្រឡងប្រជែង មាន៣ដំណាក់កាល និងមានការចូលរួមពីអ្នកសង្កេតការណ៍”៕