ពិធីបិទសន្និបាតបូកសរុបការងារឆ្នាំ២០១៨ និងទិសដៅការងារឆ្នាំ២០១៩ របស់ក្រសួងអភិវឌ្ឍន៍ជនបទ
- ថ្ងៃទី១៤ ខែកក្កដា ឆ្នាំ២០១៩ ម៉ោង ២:៥៩ ល្ងាច
- សកម្មភាពក្រសួង
នៅរសៀលថ្ងៃពុធ ១០ រោច ខែបុស្ស ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ៣០ ខែ មករា ឆ្នាំ២០១៩ នៅសណ្ឋាគារសុខា រាជធានីភ្នំពេញ ក្រសួងអភិវឌ្ឍន៍ជនបទ បានរៀបចំពិធីបិទសន្និបាតបូកសរុបការងារប្រចាំឆ្នាំ២០១៨ និងទិសដៅការងារឆ្នាំ ២០១៩ ក្រោមអធិបតីភាព ឯកឧត្តម យឹម ឆៃលី ឧបនាយករដ្ឋមន្ត្រីនិងជាប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ អញ្ជើញចូលរួមក្នុងសន្និបាតនេះមាន ឯកឧត្តម លោកជំទាវ លោក លោកស្រី នាងកញ្ញា ជាថ្នាក់ដឹកនាំ និងមន្ត្រីរាជការក្រសួងអភិវឌ្ឍន៍ជនបទ តំណាងក្រសួង ស្ថាប័ន តំណាងដៃគូអភិវឌ្ឍន៍ អង្គការមិនមែនរដ្ឋាភិបាល តំណាងអាជ្ញាធរដែនដីរាជធានី-ខេត្ត សរុបជាង ៩០០ នាក់ ។
នៅក្នុងពិធីបិទសន្និបាតនេះ ឯកឧត្តមបណ្ឌិត អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានធ្វើរបាយការបូកសរុបលទ្ធផលសន្និបាត ដោយបានលើកឡើងថា អង្គសន្និបាត បានសម្តែងនូវការអបអរសាទរ និងវាយតម្លៃខ្ពស់ ចំពោះមគ្គុទេសក៍ភាពដឹកនាំរដ្ឋប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ នាយករដ្ឋមន្ត្រី ដែលធ្វើឲ្យព្រះរាជាណាចក្រកម្ពុជាយើងទទួលបាននូវសន្តិភាព ឯកភាពជាតិ ស្ថិរភាពនយោបាយ សណ្តាប់ធ្នាប់សង្គម និងស្ថិរភាពម៉ាក្រូសេដ្ឋកិច្ច ព្រមទាំងរក្សាបានទាំងស្រុងនូវអធិបតេយ្យភាព និងបូរណភាពទឹកដី។ ស្ថិតក្នុងបរិយាកាសសុខដុមនៃសង្គមជាតិ ក្រសួងអភិវឌ្ឍន៍ជនបទ បានអនុវត្តភារកិច្ចរបស់ខ្លួន ប្រកបដោយជោគជ័យ និងទទួលបានអបអរសាទរ និងវាយតម្លៃខ្ពស់ពីអង្គសន្និបាតមានជាអាទិ៍៖ អភិបាលកិច្ចល្អ ការអនុវត្តច្បាប់ហិរញ្ញវត្ថុសម្រាប់គ្រប់គ្រងថវិកាប្រចាំឆ្នាំ ការប្រើប្រាស់ជំនួយហិរញ្ញប្បទានសហប្រតិបត្តិការលើវិស័យអភិវឌ្ឍជនបទ ការកសាង និងអភិវឌ្ឍហេដ្ឋារចនាសម្ព័ន្ធផ្លូវជនបទ និងការអនុវត្តគម្រោងអភិវឌ្ឍន៍នានានៅនៅទូទាំងព្រះរាជាណាចក្រកម្ពុជា។
នៅក្នុងសុន្ទរកថាបិទសន្និបាត ឯកឧត្តមឧបនាយករដ្ឋមន្ត្រី ក្នុងនាមរាជរដ្ឋាភិបាលកម្ពុជា បានសម្តែងនូវសេចក្តីរីករាយ និងថ្លែងនូវការកោតសរសើរចំពោះថ្នាក់ដឹកនាំ និងមន្ត្រីរាជការទាំងអស់នៃក្រសួងអភិវឌ្ឍន៍ជនបទ ស្ថាប័នពាក់ព័ន្ធនានា អាជ្ញាធរដែនដីគ្រប់លំដាប់ថ្នាក់ ដៃគូអភិវឌ្ឍន៍ និងប្រជាពលរដ្ឋគ្រប់មូលដ្ឋាន ដែលបានធ្វើសហប្រតិបត្តិការគ្នាយ៉ាងល្អប្រសើរ ខិតខំប្រឹងប្រែងអស់ពីកម្លាំងកាយចិត្ត សម្រេចបាននូវស្នាដៃធំៗជាច្រើនក្នុងឆ្នាំ ២០១៨ និងបានសម្តែងគាំទ្រដល់ការកំណត់ទិសដៅការងារសម្រាប់ឆ្នាំ ២០១៩ ។ ឯកឧត្តមឧបនាយករដ្ឋមន្ត្រី បានលើកឡើងថា ក្នុងពេលកន្លងមកនេះ កម្ពុជាបានសម្រេចសមិទ្ធផលថ្មីៗជាច្រើន លើគ្រប់វិស័យក្នុងដំណើរអភិវឌ្ឍន៍របស់ខ្លួន តាមរយៈការអនុវត្តដោយជោគជ័យនូវកម្មវិធីនយោបាយ និងយុទ្ធសាស្ត្រចតុកោណ ដែលជាពិសេស ធានាបាននូវសុខសន្តិភាព ស្ថិរភាព សន្តិសុខ សណ្តាប់ធ្នាប់សង្គម ប្រជាធិបតេយ្យ ការអភិវឌ្ឍ និងអធិបតេយ្យជាតិ ដែលជាកុសលនៃគោលនយោបាយ “ឈ្នះ ឈ្នះ” របស់ សម្តេចអគ្គមហាសេនាបតីតេជោ ហ៊ុន សែន ។ ជាមួយគ្នានេះ ឯកឧត្តម បានបញ្ជាក់ថា សេដ្ឋកិច្ចកម្ពុជានៅតែបន្តសម្រេចបានកំណើនខ្ពស់ ហើយផលិតផលក្នុងស្រុកសរុបជាមធ្យមសម្រាប់ប្រជាជនម្នាក់ៗបានកើនជាបន្តបន្ទាប់ ហើយអត្រានៃភាពក្រីក្រក៏ត្រូវបានកាត់បន្ថយជាបន្តបន្ទាប់ផងដែរ។
ឯកឧត្តមឧបនាយករដ្ឋមន្ត្រី ក៍បានបន្តថា បច្ចុប្បន្នរាជរដ្ឋាភិបាលក្នុងនីតិកាលទី ៦ នៃរដ្ឋសភា ដែលដឹកនាំដោយ សម្តេចអគ្គមហាសេនាបតីតេជោ ហ៊ុន សែន កំពុងចាប់ផ្តើមអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ ដើម្បីបន្តអភិវឌ្ឍប្រទេសឲ្យកាន់តែរីកចម្រើនខ្លាំងក្លាឡើង និងធានាដល់ការលើកកម្ពស់ជីវភាពរបស់ប្រជាជនទូទៅ តាមរយៈការអនុវត្តគោលនយោបាយ និងវិធានការជាក់ស្តែងនានាឲ្យមានប្រសិទ្ធភាពខ្ពស់ សំដៅបង្កើនចំណូលរបស់ប្រជាជន លើកស្ទួយខាងសង្គមកិច្ច ពង្រឹងយុត្តិធម៌ សមធម៌សង្គម ព្រមទាំងផ្តល់នូវសេវាសាធារណៈឲ្យបានកាន់តែល្អប្រសើរ ។ ឯកឧត្តម បានបញ្ជាក់បន្ថែមថា ការអភិវឌ្ឍហេដ្ឋារចនាសម្ព័ន្ធជនបទ ការផ្គត់ផ្គង់ទឹកស្អាត និងអនាម័យជនបទ កំណែទម្រង់រដ្ឋបាល និងការលើកកម្ពស់សមត្ថភាព ការអភិវឌ្ឍសហគមន៍ និងសេដ្ឋកិច្ចជនបទ គឺសុទ្ធតែបានរួមចំណែកយ៉ាងធំធេង ក្នុងការជួយរាជរដ្ឋាភិបាល ឲ្យសម្រេចបាននូវកម្មវិធីនយោបាយ និងយុទ្ធសាស្ត្រចតុកោណ ជាក់ស្តែងគឺបានជួយកែលម្អជីវភាពរស់នៅរបស់ប្រជាពលរដ្ឋបានកាត់បន្ថយជាបណ្តើរៗ នូវភាពខុសគ្នារវាងទីក្រុង និងជនបទ។ ជាមួយគ្នានេះ ឯកឧត្តមឧបនាយករដ្ឋមន្ត្រី បានផ្តល់ជាអនុសាសន៍ដល់ក្រសួងអភិវឌ្ឍន៍ជនបទបន្តសហការណ៍ជាមួយក្រសួង ស្ថាប័ន និងដៃគូរអភិវឌ្ឍន៍ទាំងអស់ ដើម្បីខិតខំអនុវត្ត ១. បន្តធ្វើឲ្យប្រសើរឡើងនូវប្រព័ន្ធហេដ្ឋារចនាសម្ព័ន្ធជនបទ ២. បន្តផ្តល់សេវាផ្គត់ផ្គង់ទឹកស្អាត និងអនាម័យជនបទឲ្យស្របតាមផែនការ ៣.បន្តអភិវឌ្ឍន៍សហគមន៍ និងសេដ្ឋកិច្ចជនបទ ៤. បន្តកែទម្រង់រដ្ឋបាល និងលើកកម្ពស់មន្ត្រីរាជការ និង ៥.បន្តអភិវឌ្ឍតំបន់ជនជាតិដើមភាគតិចឲ្យមានភាពល្អប្រសើរ
ជាទីបញ្ចប់ ឯកឧត្តមឧបនាយករដ្ឋមន្ត្រី បានប្រសិទ្ធពរ ជូនឯកឧត្តម លោកជំទាវ តំណាងស្ថានទូត ភ្ញៀវកិត្តិយសជាតិ អន្តរជាតិ អស់លោក លោកស្រី នាងកញ្ញាទាំងអស់ និងបានប្រកាសបិទសន្និបាតជាផ្លូវការ ព្រមទាំងបានបំពាក់មេដាយការងារជូនមន្ត្រីរាជការក្រសួងផងដែរ ៕
