លោក ឡុក វុឌ្ឍី ដឹកនាំក្រុមការងារមន្ទីរ ចុះត្រួតពិនិត្យការងារកែលម្អបន្ទាន់ផ្លូវប្រវែង ២៣ គីឡូម៉ែត្រ ដែលបានទទួលរងការខូចខាតដោយសារជំនន់ទឹកភ្លៀងនាពេលកន្លងមក

ខេត្តព្រៃវែង៖ នៅថ្ងៃសុក្រ ១២កើត ខែកត្តិក ឆ្នាំថោះ បញ្ចស័ក ព.ស. ២៥៦៧ ត្រូវនឹង ថ្ងៃទី២៤ ខែវិច្ឆិកា ឆ្នាំ២០២៣ លោក ឡុក វុឌ្ឍី ប្រធានមន្ទីរ បានដឹកនាំក្រុមការងារមន្ទីរអភិវឌ្ឍន៍ជនបទខេត្តព្រៃវែង ចុះត្រួតពិនិត្យការងារកែលម្អបន្ទាន់ផ្លូវប្រវែង ២៣ គីឡូម៉ែត្រ ភ្ជាប់ពីភូមិព្រៃពោធិ៍ ឃុំរំលេច ឆ្លងកាត់ឃុំព្នៅ១ និងឃុំព្នៅ២ ទៅដល់ភូមិព្រៃស្វា ឃុំជ្រៃឃ្មុំ ស្រុកស៊ីធរកណ្ដាល ដែលបានទទួលរងការខូចខាតដោយសារជំនន់ទឹកភ្លៀងនាពេលកន្លងមក។

គោរពតាមអនុសាសន៍ណែនាំដ៏ខ្ពង់ខ្ពស់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី តាមរយៈ ឯកឧត្តម ឆាយ ប្ញទ្ធិសែន រដ្ឋមន្រ្តីក្រសួងអភិវឌ្ឍន៏ជនបទ បានណែនាំដល់អង្គភាពក្រោមឱវាទគឺ នាយកដ្ឋានផ្លូវលំជនបទប្រើប្រាស់គម្រោងអន្តរាគមន៍បន្ទាន់ ធ្វើការជួសជុលបានប្រវែង ៨ គីឡូម៉ែត្រ  និង មន្ទីរអភិវឌ្ឍន៏ជនបទខេត្ត បានឈូសឆាយ ចាក់បំពេញដីបន្ថែម និងកៀរកិន ប្រវែង ១៥ គីឡូម៉ែត្រ។ គិតមកដល់ពេលនេះ ផ្លូវខាងលើត្រូវបានកែលម្អរួចរាល់ជាស្ថាពរ ហើយប្រជាពលរដ្ឋអាចធ្វើចរាចរណ៍បានជាប្រក្រតី។

បន្ទាប់ពីបានជួសជុលរួច អាជ្ញាធរមូលដ្ឋាន និងប្រជាពលរដ្ឋដែលរស់នៅ និងប្រើប្រាស់ខ្សែផ្លូវខាងលើ មានការត្រេកអរ សប្បាយរីករាយ និងបានអរគុណជូនចំពោះ សម្ដេចធិបតីនាយករដ្ឋមន្រ្ដី និង ឯកឧត្តមរដ្ឋមន្រ្តីក្រសួងអភិវឌ្ឍន៍ជនបទ ដែលបានធ្វើការជួសជុល និងកែសម្រួលផ្លូវខាងលើបានល្អប្រសើរឡើងវិញ ដើម្បីសម្រួលដល់ការធ្វើដំណើររបស់ប្រជាពលរដ្ឋ ទៅទទួលយកសេវាសាធារណៈផ្សេងៗក្នុងមូលដ្ឋាន ជាពិសេសការដឹកជញ្ជូនកសិផលកសិកម្មទៅកាន់ទីផ្សារនៅរដូវប្រមូលផលនាពេលខាងមុខនេះ៕