ឯកឧត្តមបណ្ឌិត នួន ដាញ៉ិល អញ្ជើញជួបប្រជុំ Kick Off ជាមួយក្រុមបេសកកម្មរបស់ធនាគារ KfW ,AFD និង EU

ខេត្តពោធិ៍សាត់៖ នាថ្ងៃសុក្រ ៤កើត ខែជេស្ឋ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៣០ ខែឧសភា ឆ្នាំ២០២៥ នៅសាលប្រជុំ នៃសណ្ឋាគារ ពោធិ៍សាត់ រីវើសាយ ខេត្តពោធិ៍សាត់ ឯកឧត្តមបណ្ឌិត នួន ដាញ៉ិល រដ្ឋលេខាធិការ និងជានាយកកម្មវិធីអភិវឌ្ឍន៍ហេដ្ឋារចនាសម្ព័ន្ធជនបទសម្រាប់កម្ពុជា (RID4CAM) តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ រួមជាមួយថ្នាក់ដឹកនាំ និងមន្ត្រីនៃអង្គភាពគ្រប់គ្រងកម្មវិធី RID4CAM ព្រមទាំងមានការអញ្ជើញចូលរួមអមដំណើរដោយក្រុមទីប្រឹក្សាបច្ចេកទេស (PIC) បានអញ្ជើញជួបប្រជុំ Kick Off ដើម្បីពិនិត្យវឌ្ឍនភាពនៃការអនុវត្តការងារសាងសង់ផ្លូវជនបទ និងសំណង់សិល្បការ្យ ក្នុងក្របខណ្ឌកម្មវិធី RID4CAM ជាមួយក្រុមបេសកកម្មរបស់ធនាគារអភិវឌ្ឍន៍អាល្លឺម៉ង់ (KfW) ទីភ្នាក់ងារបារាំងសម្រាប់ការអភិវឌ្ឍ (AFD) និងសហភាពអឺរ៉ុប (EU) ដឹកនាំដោយលោកស្រីបណ្ឌិត Carmen Colla ប្រធានគ្រប់គ្រងគម្រោងជាន់ខ្ពស់ នៃធនាគារអភិវឌ្ឍន៍អាល្លឺម៉ង់ (KfW) ប្រចាំប្រទេសអាល្លឺម៉ង់។

គោលបំណងនៃកិច្ចប្រជុំ Kick Off របស់ក្រុមបេសកកម្មខាងលើ គឺដើម្បីពិនិត្យ និងវាយតម្លៃជារួម ទៅលើវឌ្ឍនភាពនៃការអនុវត្តកម្មវិធីកន្លងមក និងការរៀបចំផែនការ ដើម្បីចុះត្រួតពិនិត្យវឌ្ឍនភាពនៃការសាងសង់នៅការដ្ឋានសំណង់ដោយផ្ទាល់ នៅក្នុងខេត្តគោលដៅរបស់កម្មវិធី ចំនួន៤ រួមមាន៖ ខេត្តបាត់ដំបង សៀមរាប ព្រះវិហារ និងខេត្តកំពង់ធំ ចាប់ពីថ្ងៃទី៣១ ខែមិថុនា រហូតដល់ថ្ងៃទី៣ ខែមិថុនា ឆ្នាំ២០២៥៕