ឯកឧត្តម អ៉ិន ចន្ថា បានដឹកនាំក្រុមការងារចុះវាយតម្លៃលក្ខណៈវិនិច្ឆ័យ “ភូមិគំរូ”នៅភូមិសូវង្សលើ សង្កាត់វាលពង់ ក្រុងឧដ្គុង្គម៉ែជ័យ ខេត្តកំពង់ស្ពឺ

ខេត្តកំពង់ស្ពឺ ៖ នាព្រឹកថ្ងៃព្រហស្បតិ៍ ១២រោច ខែមាឃ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៧ ខែមីនា ឆ្នាំ២០២៤ ឯកឧត្តម អ៉ិន ចន្ថា រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ រួមជាមួយ ឯកឧត្ដម គុយ ឆាយ រដ្ឋលេខាធិការបានដឹកនាំក្រុមការងារចុះវាយតម្លៃលក្ខណៈវិនិច្ឆ័យ “ភូមិគំរូ”នៅភូមិសូវង្សលើ សង្កាត់វាលពង់ ក្រុងឧដ្គុង្គម៉ែជ័យ ខេត្តកំពង់ស្ពឺ​ ដែលអមដំណើរដោយ ឯកឧត្តម អឿន ធារិទ្ធ ប្រធាននាយកដ្ឋានអភិវឌ្ឍន៍សហគមន៍ និងការចូលរួមពី លោក អៀង ដាំ ប្រធានមន្ទីរអភិវឌ្ឍន៍ជនបទខេត្តកំពង់ស្ពឺ លោកអនុប្រធានមន្ទីរ និងការិយាល័យពាក់ព័ន្ធ ក្រុមប្រឹក្សាសង្កាត់ និងគណៈកម្មាធិការអភិវឌ្ឍន៍ភូមិ (គ.អ.ភ)។

 

ជាកិច្ចចាប់ផ្តើម ឯកឧត្តមរដ្ឋលេខាធិការ បានជួបសំណេះសំណាលជាមួយប្រជាពលរដ្ឋ និងពាំនាំនូវការផ្តាំផ្ញើសួរសុខទុក្ខពីសំណាក់  ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ ជូនចំពោះបងប្អូនប្រជាពលរដ្ឋទាំងអស់។ ការចុះវាយតម្លៃនេះមានគោលបំណង ដើម្បីចាត់ចំណាត់ថ្នាក់ភូមិ និងពិនិត្យវឌ្ឍនភាពនៃការរីកចម្រើនរបស់ភូមិ ព្រមទាំងស្វែងរកចំណុចដែលត្រូវអភិវឌ្ឍន៍បន្ថែមឱ្យគ្រប់ជ្រុងជ្រាយ និងប្រកបដោយនិរន្តរភាព។

 

ជាលទ្ធផល ក្រុមការងារបានជ្រើសរើសសំណាកចំនួន ៣០គ្រួសារ/១៣៥គ្រួសារ ក្នុងនោះគ្រួសារត្រូវបែងចែកជា ៣ ប្រភេទ រួមមាន៖

-ប្រភេទទី១ ប្រជាជនដែលមានជីវភាពកម្រិតមធ្យម ចំនួន ២៦គ្រួសារ

-ប្រភេទទី២ ប្រជាជនដែលមានប័ណ្ណសមធម៌ កម្រិតក្រ១ មានចំនួន ២ គ្រួសារ

-ប្រភេទទី៣ ប្រជាជនដែលមានប័ណ្ណសមធម៌ កម្រិតក្រ២ មានចំនួន ២គ្រួសារ និងបានជួបសម្ភាសន៍ជាមួយ គ.អ.ភ ដើម្បីកំណត់លក្ខណៈវិនិច្ឆ័យភូមិគំរូ។

 

បន្ទាប់ពីបានជួបសំណេះសំណាលជាមួយប្រជាពលរដ្ឋ ឯកឧត្តមរដ្ឋលេខាធិការ រួមជាមួយ ឯកឧត្តម អឿន ធារិទ្ធ និងលោក អៀង ដាំ បានអញ្ជើញចុះមើលសមិទ្ធផលផ្សេងៗនៅក្នុងភូមិមានដូចជា ផ្លូវបេតុងប្រវែង ២ ០០០ម៉ែត្រ ឃ្លាំងជីសហគមន៍ បង្គន់អនាម័យសាធារណៈ/គ្រួសារ និងប្រព័ន្ធផ្គត់ផ្គង់ទឹកក្នុងភូមិ ដែលជាសមិទ្ធផលគម្រោង “ការអភិវឌ្ឍជនបទដោយប្រើប្រាស់វិធីសាស្ត្រចលនាភូមិថ្មី” ដែលជាជំនួយឥតសំណងរបស់រាជរដ្ឋាភិបាលកូរ៉េ តាមរយៈទីភ្នាក់ងារសហប្រតិបត្តិការអន្តរជាតិកូរ៉េ (KOICA) ក្រោមការសម្របសម្រួលការដឹកនាំអនុវត្តន៍ដោយក្រសួងអភិវឌ្ឍន៍ជនបទកន្លងមកកាលពីកំឡុងឆ្នាំ ២០១៤-២០១៨។ លើសពីនោះ​ ឯកឧត្តមរដ្ឋលេខាធិការ និងក្រុមការងារ​​ ក៏បានចុះមើលស្ថានភាពបរិស្ថានក្នុងភូមិទាំងមូល  ដូចជាសួនដំណាំគ្រួសារ សូឡាបំភ្លឺផ្លូវ  និងការទុកដាក់សម្រាម/កាកសំណល់ផ្សេងៗជាដើម។

Share your thoughts