ឯកឧត្ដម ប៊ុន ច័ន្ទវណ្ណៈ អញ្ជើញជាអធិបតីក្នុងកិច្ចប្រជុំបូកសរុបលទ្ធផលការងារប្រចាំត្រីមាសទី២ និងលើកទិសដៅការងារបន្តឆ្នាំ២០២៥ របស់មន្ទីរអភិវឌ្ឍន៍ជនបទខេត្តសៀមរាប
- ថ្ងៃទី២៥ ខែមិថុនា ឆ្នាំ២០២៥ ម៉ោង ៨:០០ ព្រឹក
- សកម្មភាពក្រសួង
ខេត្តសៀមរាប៖ នាព្រឹកថ្ងៃចន្ទ ១៣រោច ខែជេស្ឋ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៣ ខែមិថុនា ឆ្នាំ២០២៥ ឯកឧត្ដម ប៊ុន ច័ន្ទវណ្ណៈ រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ប្ញទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ អមដំណើរដោយលោកជំទាវ ឯក គន្ធវារី អនុរដ្ឋលេខាធិការ បានអញ្ជើញជាអធិបតីក្នុងកិច្ចប្រជុំបូកសរុបលទ្ធផលការងារប្រចាំត្រីមាសទី២ និងលើកទិសដៅការងារបន្តឆ្នាំ២០២៥ របស់មន្ទីរអភិវឌ្ឍន៏ជនបទខេត្តសៀមរាប ដោយមានការអញ្ជើញចូលរួពីសំណាក់លោក ទូច ម៉ាឡា ប្រធានមន្ទីរមន្ទីរអភិវឌ្ឍន៍ជនបទ លោក លោកស្រី អនុប្រធាននាយកដ្ឋាន ប្រធានការិយាល័យ អនុប្រធានការិយាល័យ និងមន្ត្រីរាជការនៃមន្ទីរចំនួន ៣២រូប ស្រី ៧រូប។
បន្ទាប់ពីមតិស្វាគមន៍ និងរបាយការណ៍សង្ខេបលទ្ធផលការងារប្រចាំត្រីមាសទី២ និងលើកទិសដៅការងារបន្តឆ្នាំ២០២៥ ដោយលោក ទូច ម៉ាឡា ប្រធានមន្ទីររួចមក។ អង្គប្រជុំក៏បានធ្វើការពិនិត្យ និងពិភាក្សាគ្នាយ៉ាងផុលផុសទៅលើលទ្ឋផលការងារដែលសម្រេចបាននាពេលកន្លងមក និងបានរួមគ្នាដោះស្រាយបញ្ហា និងលើកទិសដៅការងារបន្ដដើម្បីយកទៅអនុវត្តប្រកបដោយប្រសិទ្ធភាពខ្ពស់។ ឆ្លៀតក្នុងឱកាសនេះ ឯកឧត្ដមរដ្ឋលេខាធិការ បានពាំនាំនូវប្រសាសន៍ផ្ដាំផ្ញើសាកសួរសុខទុក្ខដោយក្ដីនឹករលឹកពីសំណាក់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៌ជនបទផងដែរ។
មុននឹងបញ្ចប់កិច្ចប្រជុំ ឯកឧត្ដមរដ្ឋលេខាធិការ បានធ្វើការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្រ្ដីរាជការរបស់មន្ទីរ ដែលបានរួមសហការណ៏ បំពេញការងារនាពេលកន្លងមក ដែលនាំឲ្យខេត្តសៀមរាបទទួលបាននូវសមិទ្ធផលយ៉ាងល្អប្រសើរនេះ ក្នុងនោះ ឯកឧត្ដម ប៊ុន ច័ន្ទវណ្ណៈ បានផ្ដល់ជាអនុសាសន៍ណែនាំមួយចំនួនដូចខាងក្រោម៖
– មន្ទីរត្រូវបន្តពង្រឹងអនុវត្តបទបញ្ជាផ្ទៃក្នុងរបស់មន្ទីរឱ្យបានខ្ជាប់ខ្ជួន និងរក្សាបានសាមគ្គីភាពផ្ទៃក្នុងឱ្យបានល្អប្រសើរ
– មន្ទីរត្រូវបន្តពង្រឹង និងពង្រីកការងារផ្សព្វផ្សាយសមិទ្ធផលនានារបស់ក្រសួង ក៏ដូចជារបស់រាជរដ្ឋាភិបាលឱ្យកាន់តែទូលំទូលាយបន្ថែមទៀត
– មន្ទីរត្រូវមានកិច្ចសហការល្អជាមួយស្ថាប័នពាក់ព័ន្ធ និងកៀរគរអង្គការមិនមែនរដ្ឋាភិបាលឱ្យចូលរួមក្នុងការងារអភិវឌ្ឍន៍ជនបទនៅមូលដ្ឋានបន្ថែមទៀត
– មន្ទីរត្រូវយកចិត្តទុកដាក់ និងចូលរួមសហការលើការអនុវត្តគម្រោងនានាឱ្យមានគុណភាព និងប្រសិទ្ធភាពខ្ពស់
– មន្ទីរត្រូវរៀបចំឱ្យមានរបបប្រជុំឱ្យបានទៀងទាត់និងទាន់ពេលវេលា ដោយអនុវត្តរបបប្រជុំប្រចាំខែ ត្រីមាស ឆមាស នព្វមាស និងប្រចាំឆ្នាំ៕
