ឯកឧត្ដមបណ្ឌិត ជ្រុន ថេរ៉ាវ៉ាត អញ្ជើញជាអធិបតីដឹកនាំកិច្ចប្រជុំ តាមដាន ត្រួតពិនិត្យ និងវាយតម្លៃការអនុវត្តផែនការសកម្មភាពមន្ទីរអភិវឌ្ឍន៍ជនបទខេត្តកំពត ប្រចាំត្រីមាសទី២ និងទិសដៅអនុវត្តបន្ត ឆ្នាំ២០២៥

ខេត្តកំពត៖ នាព្រឹកថ្ងៃចន្ទ ១៣រោច ខែជេស្ឋ ឆ្នាំម្សាញ់ សប្ដស័ក ព.ស.២៥៦៩ ត្រូវនឹងទី២៣ ខែមិថុនា ឆ្នាំ២០២៥ ឯកឧត្ដមបណ្ឌិត ជ្រុន ថេរ៉ាវ៉ាត រដ្ឋលេខាធិការ តំណាងដ៏ខ្ពង់ខ្ពស់ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ អមដំណើរដោយឯកឧត្តមបណ្ឌិត លឹម អ៊ីវ អនុរដ្ឋលេខាធិការ អញ្ជើញជាអធិបតីដឹកនាំកិច្ចប្រជុំ តាមដាន ត្រួតពិនិត្យ និងវាយតម្លៃការអនុវត្តផែនការសកម្មភាពមន្ទីរអភិវឌ្ឍន៍ជនបទខេត្តកំពត ប្រចាំត្រីមាសទី២ និងទិសដៅអនុវត្តបន្ត ឆ្នាំ២០២៥ ដោយមានការអញ្ជើញចូលរួមពី,ឯកឧត្តម សេង សិរីបុត្រ អភិបាលរងនៃគណៈអភិបាលខេត្តកំពត និងលោក លោកស្រីជា ថ្នាក់ដឹកនាំនិងមន្រ្តីជំនាញរបស់មន្ទីរចំនួន ៤១រូប ។

កិច្ចប្រជុំខាងលើនេះដោយផ្ដោតសំខាន់ទៅលើការពិនិត្យវឌ្ឍនភាពការងារក្នុងត្រីមាសទី២ និងត្រៀមអនុវត្តបន្តក្នុងមាសទី៣ និងលើកយកបញ្ហាប្រឈមដែលមន្ត្រីអនុវត្តជួបប្រទះដើម្បីដោះស្រាយ។

ដោយយោងទៅលើសេចក្ដីរាយការណ៍សង្ខេបដោយលោកប្រធានមន្ទីររួចមក នាឱកាសនោះ ឯកឧត្ដមបណ្ឌិត ជ្រុន ថេរ៉ាវ៉ាត បានវាយតម្លៃ និងផ្ដល់អនុសាសន៍ណែនាំដូចខាងក្រោម៖

-ស្នើសុំធ្វើការកែសម្រួលលើរបាយការណ៍ តាមសំណើរបស់អង្គប្រជុំ និងការកំណត់ភាគរយអោយបានច្បាស់ ទៅកម្មវិធី និងអនុកម្មវិធីនីមួយៗដោយប្រៀបធៀបនឹងត្រីមាសទី១ និងធៀបទៅនឹងផែនការឆ្នាំ

-សូមឱ្យបង្កើនការយកចិត្តទុកដាក់ឱ្យបានខ្ពស់លើការជួសជុល និងរក្សាគុណភាពផ្លូវជនបទ ជាប់ជាប្រចាំ ជាពិសេសនៅក្នុងរដូវវស្សានេះ

-ត្រូវបង្កើនការយកចិត្តទុកដាក់លើការពង្រឹងគុណភាពផ្លូវជនបទ និងសំណង់សិល្បការ្យ តាមអនុសាសន៍ណែនាំដ៏ខ្ពស់ខ្ពស់របស់សម្តេចនាយករដ្ឋមន្រ្តី នោះគឺពង្រឹង ៧០% និងពង្រីកការតភ្ជាប់ ៣០%

-ត្រូវបង្កើនប្រសិទ្ធភាពនៃការប្រើប្រាស់ទឹកស្អាតជនបទ និងការស្ថាបនាហេដ្ឋារចនាសម្ព័ន្ធទឹកស្អាតជនបទ

-បន្តគាំទ្រសកម្មភាពអភិវឌ្ឍន៍សហគមន៍ជនបទ និងចលនាភូមិគំរូ ជាពិសេសជំរុញការប្រើប្រាស់ផលិតផលខ្មែរ

-ជំរុញការបង្កើតការងារ និងមុខរបរនៅជនបទ

-ជំរុញសកម្មភាពសេដ្ឋកិច្ចគ្រួសារ និងទីផ្សារជនបទ៕