លោកជំទាវ ឯក គន្ធវារី អញ្ជើញដឹកនាំគណៈកម្មការអន្តរក្រសួង ចុះត្រួតពិនិត្យ វាយតម្លៃបញ្ចប់សុពលភាព លើការងារថែទាំខួបផ្លូវចំនួន ២ខ្សែ ក្រាលល្បាយក្រួស មានប្រវែងសរុប ១៦ ៥០០ម នៅខេត្តត្បូងឃ្មុំ

ខេត្តត្បូងឃ្មុំ ៖ នាថ្ងៃពុធ ១៥រោច ខែជេស្ឋ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៥ ខែមិថុនា ឆ្នាំ២០២៥ លោកជំទាវ ឯក គន្ធវារី អនុរដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្តសួងអភិវឌ្ឍន៍ជនបទ បានអញ្ជើញដឹកនាំគណៈកម្មការអន្តរក្រសួង រួមមាន ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ចុះត្រួតពិនិត្យ វាយតម្លៃបញ្ចប់សុពលភាព លើការងារថែទាំខួបផ្លូវចំនួន ២ខ្សែ ក្រាលល្បាយក្រួស មានប្រវែងសរុប ១៦ ៥០០ម ទទឹង ៥ម កម្រាស់ ២០សម និងសាងសង់លូមូលមុខកាត់ ១ម ១ជួរ ចំនួន១កន្លែង និងលូមូលមុខកាត់ ០.៦ម ១ជួរ ចំនួន១កន្លែង ស្ថិតនៅឃុំតំបែរ ឃុំគោកស្រុក ស្រុកតំបែរ ខេត្តត្បូងឃ្មុំ  អនុវត្តដោយ មន្ទីរអភិវឌ្ឍន៍ជនបទខេត្តត្បូងឃ្មុំ។

ទន្ទឹមនឹងនោះផងដែរ លោកជំទាវ ឯក គន្ធវារី ក៏បានជួបសំណេះសំណាលជាមួយមេឃុំតំបែរ និងឃុំគោកស្រុក នឹងសូមឱ្យគាត់ជួយជម្រាបដល់បងប្អូនប្រជាពលរដ្ឋដែលរស់នៅសងខាងផ្លូវជួយថែទាំសមិទ្ធិផល ទាំងអស់នេះឱ្យបានដិតដល់ ដើម្បីធានាថាផ្លូវនេះអាចប្រើប្រាស់បានយូរអង្វែង និងបម្រើដល់ផលប្រយោជន៍ជូនដល់ប្រជាពលរដ្ឋ។

បន្ទាប់ពីបានត្រួតពិនិត្យ និងប្រជុំពិភាក្សាជាមួយអ្នកទទួលការ អ្នកបច្ចេកទេស និងគណៈកម្មការអន្តរក្រសួងបានឯកភាព និងទទួលយកបញ្ចប់សុពលភាពសម្រាប់គម្រោងខាងលើ តាមការស្នើសុំរបស់អ្នកទទួលការ៕