លោកជំទាវ ហូ សុវណ្ណិកា រដ្ឋលេខាធិការក្រសួងអភិវឌ្ឍន៍ជនបទ បានអញ្ជើញជាអធិបតីក្នុងពិធីសំណេះសំណាលជាមួយថ្នាក់ដឹកនាំ និងមន្ត្រីរាជការ នៃមន្ទីរអភិវឌ្ឍន៍ជនបទរាជធានីភ្នំពេញ

រាជធានីភ្នំពេញ: នៅព្រឹកថ្ងៃពុធ ៣កើត ខែកត្ដិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៥ ខែវិច្ឆិកា ឆ្នាំ២០២៣ លោកជំទាវ ហូ សុវណ្ណិកា រដ្ឋលេខាធិការក្រសួងអភិវឌ្ឍន៍ជនបទ តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញជាអធិបតីក្នុងពិធីសំណេះសំណាលជាមួយថ្នាក់ដឹកនាំ និងមន្ត្រីរាជការទាំងអស់នៃមន្ទីរអភិវឌ្ឍន៍ជនបទរាជធានី សរុប ៣២រូប ស្ត្រី ១៤រូប។

ជាកិច្ចចាប់ផ្ដើម លោក គឹម វិបុល ប្រធានមន្ទីរ ធ្វើសេចក្ដីរបាយការណ៍សង្ខេបពីវឌ្ឍនភាពការងារដែលបានអនុវត្ត១០ខែកន្លងមកក្នុងឆ្នាំ២០២៣។

បន្ទាប់ពីបានស្តាប់របាយការណ៍របស់លោកប្រធានមន្ទីរួចមក លោកជំទាវរដ្ឋលេខាធិការ បានមានមតិសាកសួរសុខទុក្ខ និងសារផ្ដាំផ្ញើរបស់ ឯកឧត្តមរដ្ឋមន្ត្រី ជូនដល់ថ្នាក់ដឹកនាំ​ ព្រមទាំងមន្ត្រីរាជការក្នុងមន្ទីទាំងអស់។ ដើម្បីឱ្យសមស្របទៅតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧នេះ លោកជំទាវ បានផ្ដល់នូវអនុសាសន៍សំខាន់ៗមួយចំនួន ដូចជា៖

១-ខិតខំយកចិត្តទុកដាក់ក្នុងស្មារតីទទួលខុសត្រូវខ្ពស់ក្នុងការអនុវត្តផែនការ និងយុទ្ធសាស្ត្ររបស់ក្រសួងអភិវឌ្ឍន៍ជនបទ

២-ត្រូវរៀបចំផែនការបី៖ រយៈពេលខ្លី មធ្យម និងរយៈពេលវែងឱ្យបានគត់មត់

៣-ត្រូវសហការ និងផ្ដល់ព័ត៌មានជូនក្រុមការងារអ្នកនាំពាក្យក្រសួង ក្នុងគោលដៅចូលរួមផ្សព្វផ្សាយសមិទ្ធផលរបស់រាជរដ្ឋាភិបាលក៏ដូចជាក្រសួងអភិវឌ្ឍន៍ ឱ្យបានទូលំទូលាយដល់មហាជន

៤-ខិតខំបន្ត និងពង្រឹងកិច្ចសហប្រតិបត្តិការល្អជាមួយដៃគូអភិវឌ្ឍន៍ អង្គការជាតិ និងអន្តរជាតិ ព្រមទាំងវិស័យឯកជន ក្នុងការកៀរគរធនធានហិរញ្ញវត្ថុ និងបច្ចេកទេសប្រកបដោយភាពទន់ភ្លន់ និងប្រាកដនិយម ដើម្បីបង្កើនប្រសិទ្ធការងារអភិវឌ្ឍន៍ជនបទ

៥-បន្តពង្រឹងការឯកភាព និងសាមគ្គីភាពផៃ្ទក្នុងឱ្យបានល្អប្រសើររវាងថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ ដោយប្រកាន់ខ្ជាប់នូវគោលការណ៍រួមសុខទុក្ខជាមួយគ្នាដើម្បីធានាប្រសិទ្ធភាពការងារ ពិសេសត្រូវយកចិត្តទុកដាក់ចំពោះមន្ត្រីមានពិការភាព ជាស្ត្រីមានផ្ទៃពោះឬមានកូនតូចជាដើម។

ពិធីសំណេះសំណាលបានបញ្ចប់ទៅដោយរលូន និងមានភាពស្និទ្ធស្នាលបំផុតរវាងថ្នាក់ដឹកនាំ និងមន្ត្រីរាជការទាំងអស់នៃមន្ទីរអភិវឌ្ឍន៍ជនបទរាជធានី។