មន្ទីរអភិវឌ្ឍន៍ជនបទខេត្តពោធិ៍សាត់ រៀបចំកិច្ចប្រជុំបូកសរុបលទ្ធផលការងារប្រចាំឆមាសទី១ ឆ្នាំ២០២៤ និងលើកទិសដៅការងារឆ្នាំ២០២៤ ស្តីពី ការផ្គត់ផ្គង់ទឹកស្អាត និងការលើកកម្ពស់អនាម័យនៅជនបទ

ខេត្តពោធិ៍សាត់៖ នាព្រឹកថ្ងៃពុធ ៥កើត ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១០ ខែកក្កដា ឆ្នាំ២០២៤ មន្ទីរអភិវឌ្ឍន៍ជនបទខេត្តពោធិ៍សាត់ បានរៀបចំកិច្ចប្រជុំបូកសរុបលទ្ធផលការងារប្រចាំឆមាសទី១ ឆ្នាំ២០២៤ និងលើកទិសដៅការងារឆ្នាំ២០២៤ ស្តីពី ការផ្គត់ផ្គង់ទឹកស្អាត និងការលើកកម្ពស់អនាម័យនៅជនបទខេត្តពោធិ៍សាត់ ក្រោមអធិបតីភាព ឯកឧត្តម ឡាយ វិសិដ្ឋ អភិបាលរងនៃគណៈអភិបាលខេត្តពោធិ៍សាត់ និងជាប្រធានក្រុមការងារបច្ចេកទេសវិស័យផ្គត់ផ្គង់ទឹកស្អាត និងការលើកកម្ពស់អនាម័យជនបទ (PWG) នៅសាលប្រជុំរដ្ឋបាលខេត្តពោធិ៍សាត់ ដោយមានការអញ្ជើញចូលរួមមាន ក្រុមការងារបច្ចេកទេសវិស័យផ្គត់ផ្គង់ទឹកស្អាត និងការលើកកម្ពស់អនាម័យជនបទ (PWG) ថ្នាក់ដឹកនាំ និងមន្រ្តីរាជការមន្ទីរអភិវឌ្ឍន៍ជនបទខេត្ត

សរុបអ្នកចូលរួម ចំនួន ៦៤រូប ស្រ្តី១៧រូប។

ក្នុងឆ្នាំ២០២៤ ក្រុមការងារបច្ចេកទេសវិស័យផ្គត់ផ្គង់ទឹកស្អាត និងការលើកកម្ពស់អនាម័យជនបទ (PWG) និងក្រុមការងារលេខាធិការដ្ឋាន (PWG) ដែលមានមន្ទីរអភិវឌ្ឍន៍ជនបទខេត្តជាសេនាធិការ សម្រេចបានលទ្ធផលដូចខាងក្រោម៖

–  ស្រុកបាកាន    វិស័យផ្គត់ផ្គង់ទឹកស្អាត 86.08%    វិស័យអនាម័យ 92%

–  ស្រុកកណ្តៀង    វិស័យផ្គត់ផ្គង់ទឹកស្អាត 86.53%    វិស័យអនាម័យ 82%

–  ស្រុកក្រគរ    វិស័យផ្គត់ផ្គង់ទឹកស្អាត 86.10%    វិស័យអនាម័យ 81%

–  ស្រុកតាលោសែនជ័យ  វិស័យផ្គត់ផ្គង់ទឹកស្អាត 88.57%    វិស័យអនាម័យ 96%

–  ស្រុកវាលវែង    វិស័យផ្គត់ផ្គង់ទឹកស្អាត 83.86%    វិស័យអនាម័យ 65%

–  ស្រុកភ្នំក្រវាញ    វិស័យផ្គត់ផ្គង់ទឹកស្អាត 93.37%    វិស័យអនាម័យ 92%

–  ក្រុងពោធិ៍សាត់    វិស័យផ្គត់ផ្គង់ទឹកស្អាត 93.70%    វិស័យអនាម័យ 95%

សរុបរួមទូទាំងខេត្ត  វិស័យផ្គត់ផ្គង់ទឹកស្អាត 88.02%    វិស័យអនាម័យ 87%

ក្នុងកិច្ចថ្ងៃនេះដែរមានបទបង្ហាញចំនួន៥ ដូចខាងក្រោម៖

១-របាយការណ៍វឌ្ឍនភាពការប្រចាំឆមាសទី១ ឆ្នាំ២០២៤ និងទិសដៅបន្ត របស់ការិយាល័យផ្គត់ផ្គង់ទឹកជនបទ។

២-របាយការណ៍វឌ្ឍនភាពការប្រចាំឆមាសទី១ ឆ្នាំ២០២៤ និងទិសដៅបន្ត របស់ការិយាល័យថែទាំសុខភាពជនបទ។

៣-បទបង្ហាញស្តីពី លទ្ធផលការងាររបស់រដ្ឋាករទឹកពោធិ៍សាត់ប្រចាំឆមាសទី១ ឆ្នាំ២០២៤ និងទិសដៅបន្ត។

៤-បទបង្ហាញអំពីសមិទ្ធិផលគម្រោងទឹកស្អាត និងអនាម័យ នាំមកនូវសេចក្តីថ្លៃថ្នូរ របស់អង្គការអនាគតកុមារ (AK)។

៥-បទបង្ហាញអំពី គម្រោងសហគមន៍កាន់តែប្រសើរ (វគ្គ២) របស់អង្គការអភិវឌ្ឍន៍ជីវភាពកសិករ។

ឯកឧត្តម ឡាយ វិសិដ្ឋ អភិបាលរងខេត្ត និងជាប្រធាន PWG បានលើកសំណូមពរ និងទិសដៅការងារសម្រាប់វិស័យផ្គត់ផ្គង់ទឹកស្អាត និងអនាម័យជនបទក្នុងខេត្តពោធិ៍សាត់គឺ៖

-ស្នើសុំឱ្យមន្ទីរអភិវឌ្ឍន៍ជនបទខេត្ត ដែលជាលេខាធិការដ្ឋាន PWG បន្តកិច្ចសហការជាមួយមន្ទីរពាក់ព័ន្ធ អង្គការដៃគូនានា អជ្ញាធរក្រុង/ស្រុក ឃុំ/សង្កាត់ ដើម្បីជួយពង្រឹងវិស័យផ្គត់ផ្គង់ទឹកស្អាត និងអនាម័យឲ្យបានដល់សម្រេចគោលដៅឆ្នាំ២០៣០ ប្រជាពលរដ្ឋគ្រប់រូបនៅសហគមន៍ជនបទត្រូវទទួលបានការផ្គត់ផ្គង់ទឹកស្អាត និងអនាម័យប្រើប្រាស់ (១០០%) ព្រមទាំងរស់នៅក្នុងបរិស្ថានដែលមាន អនាម័យ ប្រកបដោយនិរន្ដរភាព។

-ស្នើសុំឱ្យក្រុមការងារ PWG រួមមានមន្ទីរពាក់ព័ន្ធ អង្គការដៃគូ ជួយសហការ និងគាំទ្រ ដើម្បីប្រកាសស្រុកតាលោសែនជ័យ ជាស្រុកដែលបញ្ឈប់ការបន្ទោរបង់ពាសវាលពាសកាល (ODF) នៅចុងត្រីមាសទី៣ ឬដើមត្រីមាសទី៤ ឆ្នាំ២០២៤ នាពេលខាងមុខ។

-ស្នើសុំឱ្យរដ្ឋបាលក្រុង ស្រុក ឃុំ សង្កាត់ តាំងចិត្តឲ្យបានខ្ពស់ក្នុងការចូលរួមផ្សព្វផ្សាយឲ្យបងប្អូនប្រជាពលរដ្ឋបញ្ឈប់ការបន្ទោរបង់ពាសវាលពាសកាល។

-ជួយផ្សព្វផ្សាយឲ្យប្រជាពលរដ្ឋ ត្រូវចេះសន្សំសំចៃទឹក ទាំងទឹកសុវត្ថិភាព និងទឹកប្រើប្រាស់ក្នុងវិស័យកសិកម្ម ដើម្បីបញ្ចៀសបាននូវការខ្វះទឹកប្រើប្រាស់នារដូវប្រាំង។

កិច្ចប្រជុំនេះបានបញ្ចប់ទៅក្រោមបរិយាកាសសប្បាយរីករាយ និងមានភាពស្និទ្ធស្នាលបំផុត៕