ក្រសួងអភិវឌ្ឍន៍ជនបទ សហការជាមួយបេឡាជាតិសន្តិសុខសង្គម (ប.ស.ស.) ធ្វើបច្ចុប្បន្នភាពប័ណ្ណសមាជិក ប.ស.ស.ជូនថ្នាក់ដឹកនាំ និងមន្ដ្រីរាជការគ្រប់លំដាប់ថ្នាក់ នៃក្រសួងអភិវឌ្ឍន៍ជនបទ

រាជធានីភ្នំពេញ៖ ក្រសួងអភិវឌ្ឍន៍ជនបទ បានសហការជាមួយ បេឡាជាតិសន្តិសុខសង្គម ហៅកាត់ថា (ប.ស.ស.) នៃក្រសួងការងារ និងបណ្ដុះបណ្ដាលវិជ្ជាជីវៈ រៀបចំធ្វើបច្ចុប្បន្នភាពប័ណ្ណសមាជិក ប.ស.ស. ដោយបន្ថែមរូបថត និងស្នាមខ្ចៅដៃ ជូនដល់ ឯកឧត្តម លោកជំទាវ ថ្នាក់ដឹកនាំ មន្ដ្រីរាជការ និងមន្ដ្រីជាប់កិច្ចសន្យា ក្រសួងអភិវឌ្ឍន៍ជនបទ ដើម្បីជួយសម្រួលដល់ការប្រើប្រាស់សេវាព្យាបាល និងថែទាំវេជ្ជសាស្ត្រនៅមូលដ្ឋានសុខាភិបាលដែលជាដៃគូ ជាមួយបេឡាជាតិរបបសន្តិសុខសង្គម ដោយពុំចាំបាច់ភ្ជាប់ជាមួយអត្តសញ្ញាណប័ណ្ណសញ្ជាតិខ្មែរ។

ការរៀបចំធ្វើបច្ចុប្បន្នភាពប័ណ្ណថ្មីនេះ បានប្រព្រឹត្តទៅរយៈពេល ២ថ្ងៃ គឺនៅថ្ងៃទី២៦-២៧ ខែមិថុនា ឆ្នាំ២០២៥ ដោយពេលព្រឹកចាប់ពីម៉ោង ៨:៣០នាទី រហូតដល់ម៉ោង ១២:០០នាទី និងពេលរសៀលចាប់ពីម៉ោង ១៣:០០នាទី រហូតដល់ម៉ោង ១៦:៣០នាទី នៅទីស្តីការក្រសួងអភិវឌ្ឍន៍ជនបទ។

គួរបញ្ជាក់ជូនថា រាជរដ្ឋាភិបាលកម្ពុជា នីតិកាលទី៧ នៃរដ្ឋសភាព ក្រោមការដឹកនាំប្រកបដោយគតិបណ្ឌិតរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា បាននិងកំពុងបន្ដការយកចិត្តទុកដាក់ខ្ពស់ ក្នុងការលើកកម្ពស់ការថែទាំសុខភាពរបស់ពលរដ្ឋកម្ពុជា និងចូលរួមកាត់បន្ថយការចំណាយរបស់ពលរដ្ឋលើថ្លៃថែទាំសុខភាព តាមរយៈការដាក់ឱ្យអនុវត្តរបបសន្តិសុខសង្គម ផ្នែកថែទាំសុខភាពយ៉ាងទូលំទូលាយ៕