ក្រសួងអភិវឌ្ឍន៍ជនបទ សហការជាមួយ សាលាភូមិន្ទរដ្ឋបាល បើកវគ្គបណ្ដុះបណ្ដាលស្ដីពី ជំនាញរដ្ឋបាល និងការសរសេររបាយការណ៍

រាជធានីភ្នំពេញ៖ នារសៀលថ្ងៃអង្គារ ៦កើត ខែផល្គុន ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៤ ខែមីនា ឆ្នាំ២០២៥ ក្រសួងអភិវឌ្ឍន៍ជនបទ សហការជាមួយ សាលាភូមិន្ទរដ្ឋបាល បើកវគ្គបណ្ដុះបណ្ដាលស្ដីពី “ជំនាញរដ្ឋបាល និងការសរសេររបាយការណ៍” ជូនដល់មន្ដ្រីរាជការនៃក្រសួងអភិវឌ្ឍន៍ជនបទ ក្រោមអធិបតីភាព ឯកឧត្តម ឈឹម សៅគី រដ្ឋលេខាធិការប្រចាំការ តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និង ឯកឧត្តម ង៉ឺយ ធឿន នាយករងសាលាភូមិន្ទរដ្ឋបាល និងជាប្រធានវគ្គបណ្តុះបណ្តាល តំណាង ឯកឧត្តម យក់ ប៊ុនណា រដ្ឋលេខាធិការប្រចាំការ ក្រសួងមុខងារសាធារណៈ និងជានាយកសាលាភូមិន្ទរដ្ឋបាល។ អញ្ជើញចូលរួមក្នុងពិធីបើកវគ្គបណ្តុះបណ្តាលនោះ រួមមាន ថ្នាក់ដឹកនាំនៃសាលាភូមិន្ទរដ្ឋបាល និង ឧត្តមអគ្គនាយករដ្ឋបាល និងហិរញ្ញវត្ថុ លោក លោកស្រី អគ្គនាយករង  អនុប្រធាននាយកដ្ឋាន ប្រធានការិយាល័យថ្នាក់កណ្តាល ជំនួយការថ្នាក់ដឹកនាំ និងប្រធានការិយាល័យអញ្ជើញមកពីមន្ទីរអភិវឌ្ឍន៍ជនបទរាជធានី ខេត្ត សរុបចំនួន១៦៨ រូប។

ជាកិច្ចចាប់ផ្ដើម ឯកឧត្តម ង៉ឺយ ធឿន នាយករងសាលាភូមិន្ទរដ្ឋបាល បានមានមតិស្វាគមន៍ និងធ្វើរបាយការណ៍សង្ខេបពីវឌ្ឍនភាពការងារដែលសាលាសម្រេចបាននាពេលកន្លងមក និងបានបញ្ជាក់ថា ដោយឈរលើអភិក្រមការងារដើម្បី៖ វិន័យ គុណភាព គុណធម៌ និងនវានុវត្តន៍ សាលាភូមិន្ទរដ្ឋបាល ដែលជាសេនាធិការរបស់ក្រសួងមុខងារសាធារណៈ ទទួលបេសកកម្មក្នុងការបណ្តុះបណ្តាលពង្រឹងសមត្ថភាពមន្ដ្រីរាជការសាធារណៈ ដោយប្រកាន់ខ្ជាប់នូវគោលការណ៍បណ្តុះបណ្តាលប្រកបដោយគុណភាព និងតម្លៃនៃគុណាធិបតេយ្យ ដោយបានផ្តល់ការយកចិត្តទុកដាក់កម្រិតខ្ពស់ចាប់ពីដំណាក់កាលនៃការជ្រើសរើសសិស្សមន្ត្រី និងកម្មសិក្សាការី រហូតដល់ពេលបញ្ចប់ការសិក្សា ព្រមទាំងបានធ្វើបច្ចុប្បន្នភាពជាប្រចាំនូវកម្មវិធីសិក្សាគ្រប់វគ្គបណ្តុះបណ្តាលដែលអាចឆ្លើយតបតម្រូវការធនធានមនុស្សរបស់ក្រសួង ស្ថាប័ន រដ្ឋបាលថ្នាក់ក្រោមជាតិ និងគ្រឹះស្ថានបណ្តុះបណ្តាលនានា ស្របតាមការណែនាំដ៏ខ្ពង់ខ្ពង់របស់ ឯកឧត្តម ហ៊ុន ម៉ានី ឧបនាយករដ្ឋមន្ដ្រី រដ្ឋមន្ដ្រីក្រសួងមុខងារសាធារណៈ។

ជាមួយគ្នានោះផងដែរ ឯកឧត្តម ឈឹម សៅគី តាងនាមឯកឧត្តមរដ្ឋមន្ដ្រីក្រសួងអភិវឌ្ឍន៍ជនបទ បានសម្ដែងនូវការអរគុណយ៉ាងជ្រាលជ្រៅបំផុត ជូនចំពោះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ដែលបានផ្តល់ការគាំទ្រ និងជួយបណ្តុះបណ្តាលដល់មន្ត្រីរាជការ និងជំនួយការ នៃក្រសួងអភិវឌ្ឍន៍ជនបទ សរុប ១៦៨ រូប។ បច្ចុប្បន្ន ក្រសួងក្រសួងអភិវឌ្ឍន៍ជនបទ បាននិងកំពុងយកចិត្តទុកដាក់យ៉ាងសកម្មក្នុងការពង្រឹង និងលើកកម្ពស់សមត្ថភាពមន្ត្រីរាជការគ្រប់លំដាប់ថ្នាក់ រួមមានការបណ្តុះបណ្តាលជាប្រចាំ ទាំងនៅក្នុងក្រសួង និងនៅក្រៅក្រសួង។ ឯកឧត្តមរដ្ឋលេខាធិការប្រចាំការ ក៏បានផ្ដាំផ្ញើដល់សិក្ខាកាមទាំងអស់ដែលទទួលបានឱកាសបណ្តុះបណ្តាលនាពេលនេះ ត្រូវព្យាយាមក្រេបយកចំណេះជំនាញពីគ្រូឧទ្ទេស និងខិតខំស្វែងយល់ឱ្យបានច្បាស់លាស់ និងស៊ីជម្រៅ ដើម្បីលើកកម្ពស់សមត្ថភាពផ្ទាល់ខ្លួន និងរួមចំណែកជួយឱ្យក្រសួងអភិវឌ្ឍន៍ជនបទអនុវត្តការងារ បានកាន់តែមានប្រសិទ្ធភាពខ្ពស់ ដើម្បីប្រយោជន៍ប្រជាជន និងប្រទេសជាតិ។

សូមបញ្ជាក់ផងដែរថា វគ្គបណ្តុះបណ្តាលសម្រាប់មន្ត្រីរាជការ និងជំនួយការ នៅពេលនេះគឺជា វគ្គទី១ ដែលក្រសួងអភិវឌ្ឍន៍ជនបទ និងសាលាភូមិន្ទរដ្ឋបាល សហការគ្នារៀបចំឡើង ដើម្បីពង្រឹង និងពង្រីកសមត្ថភាពមន្ត្រីរាជការ និងជាការសរបញ្ជាក់ឱ្យឃើញថា សាលាភូមិន្ទរដ្ឋបាល និងក្រសួងអភិវឌ្ឍន៍ជនបទ កំពុងតែយកចិត្តទុកដាក់រួមគ្នានៅក្នុងការបណ្តុះបណ្តាលធនធានមនុស្ស នៃរាជរដ្ឋាភិបាល ក្នុងគោលដៅធានានូវប្រសិទ្ធភាព និងស័ក្តិសិទ្ធិភាពនៅក្នុងប្រព័ន្ធការងាររដ្ឋបាលសាធារណៈ៕