ឯកឧត្តម អឿន ធារិទ្ធ និងលោក Lim Sunkyu អញ្ជើញជាគណៈអធិបតីក្នុងពិធីបើកវគ្គបណ្តុះបណ្តាលស្ដីពីការអភិវឌ្ឍភូមិ តាមវិធីសាស្រ្តចលនាភូមិថ្មី

ខេត្តកំពង់ស្ពឺ ៖ នាថ្ងៃចន្ទ ៤កើត ខែជេស្ឋ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១០ ខែមិថុនា ឆ្នាំ២០២៤ ឯកឧត្តម អឿន ធារិទ្ធ ប្រធាននាយកដ្ឋានអភិវឌ្ឍន៍សហគមន៍ និងជាប្រធានគ្រប់គ្រងគម្រោងចលនាភូមិថ្មី និងលោក Lim Sunkyu តំណាងមកពីមជ្ឈមណ្ឌលចលនាភូមិថ្មីកូរ៉េ បានអញ្ជើញជាគណៈអធិបតីក្នុងពិធីបើកវគ្គបណ្តុះបណ្តាលស្ដីពីការអភិវឌ្ឍភូមិ តាមវិធីសាស្រ្តចលនាភូមិថ្មី ។

វគ្គបណ្តុះបណ្តាលនេះចាប់ផ្ដើមពីថ្ងៃទី១០០-១៣ ខែមិថុនា ឆ្នាំ២០២៤ នៅមជ្ឈមណ្ឌលអភិវឌ្ឍន៍ជនបទកម្ពុជា-កូរ៉េ ដែលមានសិក្ខាកាមចូលរួមសរុប ៤០នាក់ ជាគណៈកម្មាធិការអភិវឌ្ឍន៍ភូមិ (គ.អ.ភ) មកពីភូមិគោលដៅនៃគម្រោងក្នុងឃុំព្រៃរំដួល ស្រុកភ្នំស្រួច ខេត្តកំពង់ស្ពឺ។

គោលបំណងនៃការបណ្ដុះបណ្ដាលគឺ ដើម្បីពង្រឹងសមត្ថភាពលើភាពជាអ្នកដឹកនាំរបស់ថ្នាក់ដឹកនាំភូមិ និងផ្លាស់ប្តូរបទពិសោធក្នុងភាពជាអ្នកដឹកនាំការអភិវឌ្ឍភូមិ និងគោលគំនិតចលនាភូមិថ្មីគឺ “ឧស្សាហ៍ព្យាយាម ចេះជួយខ្លួនឯង និងមានកិច្ចសហប្រតិបត្តិការ”៕