ឯកឧត្តម សាន វិសាល បានអញ្ជើញជាអធិបតី ក្នុងសិក្ខាសាលាស្ដីពី ការងារគ្រប់គ្រងគម្រោងពង្រឹងសមត្ថភាពផលិតភាពជនបទ (NRRPCP) ប្រចាំឆ្នាំ២០២៤ និងទិសដៅការងារឆ្នាំ២០២៥ របស់គម្រោងពង្រឹងសមត្ថភាពផលិតភាពជនបទ

ខេត្តកំពត៖ នាថ្ងៃព្រហស្បតិ៍ ៤រោច ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៩ ខែធ្នូ ឆ្នាំ២០២៤ ឯកឧត្តម សាន វិសាល រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទនិងលោក អ៊ួង ប៉ុណ្ណាកា ប្រធានគ្រប់គ្រងគម្រោង បានរៀបចំសិក្ខាសាលាស្ដីពី ការងារគ្រប់គ្រងគម្រោងពង្រឹងសមត្ថភាពផលិតភាពជនបទ (NRRPCP) ប្រចាំឆ្នាំ២០២៤ និងទិសដៅ ការងារឆ្នាំ២០២៥ របស់គម្រោងពង្រឹងសមត្ថភាពផលិតភាពជនបទ (NRRPCP) ដោយមានការអញ្ជើញចូលរួមពីមន្ត្រីបច្ចេកទេស ថ្នាក់ ក្រសួង(PMU) និងមន្រ្តីបច្ចេកទេសថ្នាក់ខេត្ត(PIU) មានសមាសភាព ចូលរួមសរុបចំនួន ៧២នាក់ ស្រី ១១នាក់ នៅឡូដស៍ មុនីឥស្សរា ខេត្តកំពត។

សិក្ខាសាលានេះ មានគោលបំណង ៣សំខាន់ៗ រួមមាន៖

១. បង្ហាញពីសមិទ្ធផល និងវឌ្ឍនភាពការងារជំហាន១របស់ គម្រោងដែលបានដំណើរការមកជិត៥ឆ្នាំ

២. ជាឱកាសនៃការជួបជុំថ្នាក់ក្រោមជាតិដែលមានខេត្តជំហាន១ ចំនួន ៥ខេត្ត រួមមាន គឺខេត្តប៉ៃលិន ខេត្តត្បូងឃ្មុំ ខេត្តព្រៃវែង ខេត្តកំពង់ឆ្នាំង ខេត្តកោះកុង និងខេត្តបន្ថែមចំនួន ៧ខេត្ត រួមមាន ខេត្តកំពត ខេត្តបាត់ដំបង ខេត្តកំពង់ធំ ខេត្តតាកែវ ខេត្តកណ្ដាល ខេត្តស្វាយរៀង និង ខេត្តកែប។

៣. បទបង្ហាញអំពីហិរញ្ញប្បទានបន្ថែមសម្រាប់គម្រោងជំហានទី២។

ទន្ទឹមនឹងនេះ ក្រុមការងារក៏បានពិភាក្សា និងស្វែងរកដំណោះស្រាយ យ៉ាងផុលផុសចំពោះបញ្ហាដែលបានកើតមាននៅជំហានចាស់ ដោយផ្តោតលើផ្នែកសំខាន់ៗដូចជា៖ ពិនិត្យឲ្យបានល្អិតល្អន់បន្ថែម លើគុណភាពផ្លូវជនបទ និងការពន្លឿនល្បឿននៃការសាងសង់ ពង្រឹងការងារផ្នែកកិច្ចគាំពារសុវត្ថិភាពសង្គម បរិស្ថាន និងយេនឌ័រ ឲ្យកាន់តែល្អប្រសើរ ជាពិសេសគឺពន្លឿនការងារផ្នែកលទ្ធកម្ម ព្រមទាំង ការទូទាត់ផ្សេងៗលើផ្នែកគណនេយ្យឲ្យបានលឿនជាងមុន ដើម្បីដំណើរ ការអនុវត្តគម្រោងបានកាន់តែបុរេសកម្ម និងមានប្រសិទ្ធភាពខ្ពស់។