ឯកឧត្តម ឈឹម សៅគី រដ្ឋលេខាធិការប្រចាំការ ដឹកនាំគណៈកម្មការអន្តរក្រសួង ចុះត្រួតពិនិត្យ និងវាយតម្លៃការងារស្ថាបនាផ្លូវក្រាលដីល្បាយថ្មភ្នំ ចំនួន ១ខ្សែ ប្រវែង ១ ៣៤០ម៉ែត្រ និងស្ថាបនាផ្លូវក្រាលបេតុង ចំនួន ២ខ្សែ ប្រវែងសរុប ១ ០០៥ម៉ែត្រ ស្រុកមុខកំពូល ខេត្តកណ្តាល

ខេត្តកណ្តាល ៖ នាថ្ងៃចន្ទ ៤រោច ខែបុស្ស ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៩ ខែមករា ឆ្នាំ២០២៤ ឯកឧត្តម ឈឹម សៅគី រដ្ឋលេខាធិការប្រចាំការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានដឹកនាំគណៈកម្មការអន្តរក្រសួង រួមមានក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ចុះត្រួតពិនិត្យ និងវាយតម្លៃការងារស្ថាបនាផ្លូវក្រាលដីល្បាយថ្មភ្នំ ចំនួន ១ខ្សែ ប្រវែង ១ ៣៤០ម៉ែត្រ ទទឹង ៨ម៉ែត្រ កម្រាស់ ០,២ម៉ែត្រ ស្ថាបនាលូមូលមុខមួយ ចំនួន ៧កន្លែង និងស្ថាបនាផ្លូវក្រាលបេតុង ចំនួន ២ខ្សែ ប្រវែងសរុប ១ ០០៥ម៉ែត្រ កម្រាស់ ០,២ម៉ែត្រ (ខ្សែទី១ ប្រវែង ៩៥៥ម៉ែត្រ ទទឹង ៨ម៉ែត្រ និងខ្សែទី២ ប្រវែង ៥០ម៉ែត្រ ទទឹង ៥ម៉ែត្រ )ស្ថិតនៅភូមិកោះរកា ឃុំព្រែកអញ្ចាញ ស្រុកមុខកំពូល ខេត្តកណ្តាល។ ខ្សែផ្លូវទាំងអស់ខាងលើ អនុវត្តដោយនាយកដ្ឋានវិស្វកម្ម ក្រសួងការពារជាតិ។

បន្ទាប់ពីបានត្រួតពិនិត្យ និងប្រជុំពិភាក្សារួចមក គណៈកម្មការអន្តរក្រសួង បានឯកភាព និងទទួលយកលទ្ធផល ១០០%។ ទន្ទឹមនឹងនោះ គណៈកម្មការអន្តរក្រសួងបានណែនាំបន្ថែមដល់អ្នកទទួលការ ឱ្យពិនិត្យ និងកែសម្រួលបន្ថែមលើចំណុចមួយចំនួន ដូចខាងក្រោម ៖

១. សូមធ្វើការចាក់ដីបន្ថែមភ្ជាប់ពីផ្លូវក្រាលក្រួសថ្មភ្នំ ទៅផ្លូវក្នុងភូមិដើម្បីបង្កភាពងាយស្រួលសម្រាប់បងប្អូនប្រជាពលរដ្ឋធ្វើដំណើរ

២. សម្រាប់ផ្លូវបេតុង សូមឱ្យអ្នកទទួលការ រៀបចំដាក់ផ្លាកឈ្មោះផ្លូវ (ក្រសួងអភិវឌ្ឍន៍ជនបទ) បន្ថែមចំនួន១ទៀត គឺជាប់ជាមួយនឹងផ្លូវជាតិលេខ៦

៣. សូមដាំបង្គោលសុវត្ថិភាព នៅអមសងខាងផ្លូវក្រាលក្រួសថ្មភ្នំ ឱ្យបានច្រើន ដើម្បីបង្កភាពងាយស្រួល និងសុវត្ថិភាពសម្រាប់បងប្អូនប្រជាពលរដ្ឋដែលធ្វើដំណើរតាមផ្លូវខាងលើ។

ជាលទ្ធផលអ្នកទទួលការ បានឯកភាពទទួលយកតាមការស្នើសុំរបស់គណៈកម្មការអន្តរក្រសួង ដើម្បីអនុវត្តតាម៕