ឯកឧត្តម ឆាយ ឫទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទ អញ្ជើញជួបសំណេះសំណាលជាមួយថ្នាក់ដឹកនាំ និងមន្ត្រីរាជការនៃនាយកដ្ឋានរដ្ឋបាល និងបុគ្គលិក និងនាយកដ្ឋានបណ្ដុះបណ្ដាល និងស្រាវជ្រាវ

រាជធានីភ្នំពេញ៖  នៅព្រឹកថ្ងៃព្រហស្បតិ៍ ៧រោច ខែស្រាពណ៍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៧ ខែកញ្ញា ឆ្នាំ២០២៣ នៅទីស្តីការក្រសួង ឯកឧត្តម ឆាយ ឫទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទ អញ្ជើញជួបសំណេះសំណាលជាមួយថ្នាក់ដឹកនាំ និងមន្ត្រីរាជការនៃនាយកដ្ឋានរដ្ឋបាល និងបុគ្គលិក និង នាយកដ្ឋានបណ្ដុះបណ្ដាល និងស្រាវជ្រាវ។

ពិធីសំណេះសំណាលបានដំណើរការ ដោយមានការធ្វើរបាយការណ៍សង្ខេបរបស់ លោក ផល សុខសំណាង ប្រធាននាយកដ្ឋានរដ្ឋបាល និងបុគ្គលិក និងលោក ឌី សារ៉ាត់ ប្រធាននាយកដ្ឋានបណ្ដុះបណ្ដាល និងស្រាវជ្រាវ ស្តីពីវឌ្ឍនភាពការងារ និងសមិទ្ធផលសម្រេចបាន បញ្ហាប្រឈម និងទិសដៅការងាររបស់នាយកដ្ឋានទាំងពីរ សម្រាប់ឆមាសទី១ ឆ្នាំ២០២៣ លើការងាររដ្ឋបាល បុគ្គលិក និងការងារអភិវឌ្ឍន៍ធនធានមនុស្ស ដែលសម្រេចបានលទ្ធផលគួរជាទីមោទនៈ។ ជាមួយនេះ ឯកឧត្ដមរដ្ឋមន្រ្ដី បានសម្ដែងនូវការកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីជំនាញនាយកដ្ឋានទាំងពីរ ដែលបំពេញភារកិច្ចរបស់ខ្លួន ក្នុងការលើកកម្ពស់ប្រសិទ្ធភាពការងារ ការពង្រឹងសមត្ថភាពមន្រ្ដីរាជការ និងការងារបណ្ដុះបណ្ដាលជំនាញមូលដ្ឋានចាំបាច់សម្រាប់ប្រជាពលរដ្ឋនៅតាមជនបទ។

ក្នុងឱកាសនោះ ឯកឧត្ដមរដ្ឋមន្រ្ដី បានផ្ដល់ឱកាសដល់ថ្នាក់ដឹកនាំទទួលបន្ទុក និងមន្ដ្រីរាជការដែលមានវត្តមានក្នុងអង្គពិធី ដើម្បីលើកឡើងនូវមតិយោបល់ ក៏ដូចជាសំណូមពរ ដែលមានចំណុចដូចខាងក្រោម៖

–  នាយកដ្ឋានរដ្ឋបាល និងបុគ្គលិក គួររៀបចំធ្វើកាតសម្គាល់ខ្លួនមន្ដ្រីរាជការ សម្រាប់ប្រើប្រាស់ក្នុងពេលចូលបំពេញការងារ
–  នាយកដ្ឋានបណ្ដុះបណ្ដាល និងស្រាវជ្រាវ គួររៀបចំទាំងកម្មវិធីបណ្ដុះបណ្ដាលជំនាញបច្ចេកទេសនិងការផ្ដល់សេវាកម្ម លើការថែទាំ និងជួសជុលផ្សេងៗ
–  ការរៀបចំការដំឡើងឋានន្តរស័ក្តិ និងថ្នាក់ ព្រមទាំងការផ្ដល់គ្រឿងឥស្សរិយយសជូនមន្រ្ដីរាជការ ត្រូវធ្វើឡើងដោយតម្លាភាព ដើម្បីជាប្រយោជន៍មន្ត្រីរួម
–  រៀបចំការងារបណ្ដុះបណ្ដាលដែលមានពាក់ព័ន្ធនឹងនាយកដ្ឋានជំនាញផ្សេងៗ ហើយរៀបចំឱ្យមានភូមិគំរូ ដោយជ្រើសរើសយកភូមិដែលមានសក្ដានុពល និងអំណោយផល លើផ្នែកសេដ្ឋកិច្ច ទេសចរណ៍ ឬកសិផលផ្សេងៗ

ជាការឆ្លើយតប ទៅនឹងការលើកឡើងនូវបញ្ហាប្រឈម និងសំណូមពរនានារបស់ថ្នាក់ដឹកនាំ នាឱកាសសំណេះសំណាលនោះ ឯកឧត្ដមរដ្ឋមន្រ្ដី ក៏បានយល់ស្របជាមួយអ្វីដែលជាការលើកឡើង របស់ឯកឧត្តមជាថ្នាក់ដឹកនាំទទួលបន្ទុក ព្រមទាំងបានផ្ដល់នូវអនុសាសន៍ណែនាំ និងផ្តាំផ្ញើជូនដល់ថ្នាក់ដឹកនាំទទួលបន្ទុក និងមន្ត្រីរាជការក្រោមឱវាទនាយកដ្ឋានទាំងពីរ ដែលមានខ្លឹមសារដូចខាងក្រោម៖

១. នាយកដ្ឋានរដ្ឋបាល និងបុគ្គលិក ត្រូវពង្រឹង និងជម្រុញការងារលំហូរឯកសារ ឱ្យបានទាន់ពេលវេលា និងឆាប់រហ័ស ជាពិសេសកំណត់ហេតុអង្គប្រជុំ ត្រូវរៀបចំឱ្យបានចប់ យ៉ាងយូររយៈពេល ១ថ្ងៃ ក្រោយពេលប្រជុំ ។

២. កំណត់បង្ហាញរឿង ត្រូវរៀបចំដោយឆ្លងយោបល់ថ្នាក់ដឹកនាំទទួលបន្ទុកគ្រប់រូប ហើយមានរយៈពេល ១ថ្ងៃ សម្រាប់ថ្នាក់ដឹកនាំ ១រូប។

៣. នាយកដ្ឋានរដ្ឋបាល និងបុគ្គលិក ត្រូវរៀបចំឱ្យមានទម្រង់ឯកភាពរួមមួយនៃកំណត់ហេតុអង្គប្រជុំ និងរបាយការណ៍ ឱ្យបានច្បាស់លាស់ ដើម្បីឱ្យអង្គភាពក្រោមឱវាទក្រសួងងាយអនុវត្តនិងបូកសរុប ។

៤. នាយកដ្ឋានបណ្ដុះបណ្ដាល និងស្រាវជ្រាវ ត្រូវរៀបចំការងារបណ្ដុះបណ្ដាលឱ្យមានលក្ខណៈជាកញ្ចប់ដោយគិតចាប់ពីការបណ្ដុះបណ្ដាលជំនាញមូលដ្ឋានបង្កើតមុខរបរ, ការតម្រង់ទិសបង្កើតមុខរបរ, ការតាមដានត្រួតពិនិត្យ និងការវាយតម្លៃនៃអ្នកទទួលផលដែលបានបណ្តុះបណ្ដាលរួច ដើម្បីប្រាកដថា ការបណ្តុះបណ្តាលបានជួយដល់ការចូលរួមកាត់បន្ថយភាពក្រីក្រ ។

៥. ពង្រឹងការងារផ្សព្វផ្សាយ ទាំងការបោះពុម្ព ការផ្សព្វផ្សាយតាមបណ្ដាញសារព័ត៌មាន តាមប្រព័ន្ធឌីជីថល និងការផលិតជាវីដេអូផ្សព្វផ្សាយ។

៦. ត្រូវធ្វើបច្ចុប្បន្នភាពកម្មវិធីបណ្ដុះបណ្ដាល សម្រាប់ការអភិវឌ្ឍមន្ដ្រីរាជការ និងការបណ្ដុះបណ្ដាលជំនាញមូលដ្ឋានថ្មីៗ ជូនប្រជាពលរដ្ឋ ជាពិសេសការបណ្ដុះបណ្ដាលជំនាញចល័ត។

៧. ត្រូវរៀបចំផ្ដល់គ្រឿងឥស្សរិយយស និងបំពាក់ជូនក្នុងពិធីសន្និបាតបូកសរុបការងារប្រចាំឆ្នាំរបស់ក្រសួង ជូនមន្ដ្រីរាជការដែលត្រូវចូលនិវត្តន៍។

៨. ថ្នាក់ដឹកនាំ និងមន្ត្រីនៃនាយកដ្ឋានទាំងពីរត្រូវគោរពវិន័យ របៀបរបបធ្វើការ កំណត់របបប្រជុំតាមដាន និងត្រួតពិនិត្យជាប្រចាំខែ ត្រីមាស ឆមាស ឱ្យបានទៀងទាត់ និងត្រូវរាយការណ៍ និងសុំយោបល់ឱ្យបានទាន់ពេលវេលា។

៩.  ពង្រឹងសាមគ្គីភាពផ្ទៃក្នុងឱ្យរឹងមាំ ដើម្បីបំពេញការងារឱ្យកាន់តែមានប្រសិទ្ធភាពខ្ពស់ ដោយយកចិត្តទុកដាក់លើសុខទុក្ខរបស់មន្រ្ដីរាជការមានជំងឺ មន្រ្ដីរាជការមានពិការភាព ជាពិសេសមន្ដ្រីរាជការជាស្រ្ដីមានផ្ទៃពោះ តាមរយៈការលើកទឹកចិត្ត និងការអនុគ្រោះពេលវេលាបំពេញការងារ។

១០. នាយកដ្ឋានទាំងពីរត្រូវត្រៀមរបាយការណ៍សមិទ្ធផលរបស់នាយកដ្ឋាន សម្រាប់រៀបចំសន្និបាតបូកសរុបលទ្ធផលការងារប្រចាំឆ្នាំ២០២៣ និងទិសដៅការងារឆ្នាំបន្ត ដែលគ្រោងនឹងប្រារព្ធនៅថ្ងៃទី២២ ខែធ្នូ ឆ្នាំ២០២៣។

ពិធីសំណេះសំណាលត្រូវបានបញ្ចប់ទៅក្រោមបរិយាកាសសប្បាយរីករាយ និងមានភាពស្និទ្ធស្នាលជាទីបំផុត៕