ឯកឧត្តមបណ្ឌិត លឹម អ៊ីវ និងឯកឧត្តម សុខ សុគន្ធ បានដឹកនាំគណៈកម្មការអន្តរក្រសួង ចុះត្រួតពិនិត្យ និងវាយតម្លៃបញ្ចប់សុពលភាពលើការងារថែទាំខួបផ្លូវក្រាលល្បាយក្រួស និងផ្លូវក្រាលកៅស៊ូ ចំនួន២គម្រោង ស្ថិតក្នុងខេត្តសៀមរាប

ខេត្តសៀមរាប៖ នាថ្ងៃសុក្រ ៣រោច ខែជេស្ឋ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១៣ ខែមិថុនា ឆ្នាំ២០២៥ ឯកឧត្តមបណ្ឌិត លឹម អ៊ីវ និងឯកឧត្តម សុខ សុគន្ធ អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ បានដឹកនាំគណៈកម្មការអន្តរក្រសួង រួមមាន ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ចុះត្រួតពិនិត្យ និងវាយតម្លៃបញ្ចប់សុពលភាពលើការងារថែទាំខួបផ្លូវក្រាលល្បាយក្រួស និងផ្លូវក្រាលកៅស៊ូ DBST បន្ថែមពីលើ (Reseal DBST) ចំនួន ២គម្រោង ស្ថិតក្នុងខេត្តសៀមរាប រួមមាន៖

គម្រោងទី១៖ ការងារថែទាំខួបចំនួន ១ខ្សែ ដោយក្រាលល្បាយក្រួសប្រវែង ១១ ៥០០ម ទទឹង ៥ម កម្រាស់ ០,២ម និងសាងសង់លូមូលមុខបីចំនួន ១កន្លែង ស្ថិតនៅ ឃុំខ្នារសណ្តាយ ឃុំឃុនរាម ស្រុកបន្ទាយស្រី ខេត្តសៀមរាប (គម្រោងលេខ DRR-PM-2024-No.020) ។

គម្រោងទី២៖ ការថែទាំខួបផ្លូវចំនួន ២ខ្សែ ដោយក្រាលកៅស៊ូ DBST បន្ថែមពីលើ (Reseal DBST) ប្រវែងសរុប ១៤ ៩០០ម ទទឹង ៦ម ព្រមទាំងគូសគំនូសចរាចរណ៍ទំហំ ១ ៣៦០ម២ ស្ថិតនៅឃុំត្រពាំងធំ ឃុំចាន់ស ស្រុកប្រាសាទបាគង និងស្រុកសូទ្រនិគម ខេត្តសៀមរាប (គម្រោងលេខ DRR-PM-2024-No.031)។ គម្រោងទាំង ២ ខាងលើអនុវត្តដោយ មន្ទីរអភិវឌ្ឍន៍ជនបទខេត្តសៀមរាប ប្រើប្រាស់ថវិកាជំពូក៦១។

លទ្ធផលជារួម គណៈកម្មការអន្តរក្រសួង បានឯកភាព និងទទួលយកបញ្ចប់សុពលភាពនូវគម្រោងទាំង០២ខាងលើ។