ឯកឧត្ដមបណ្ឌិត ចាន់ ដារ៉ុង ដឹកនាំគណ:កម្មការអន្តរក្រសួង ពិនិត្យ និងវាយតម្លៃលើការងារស្ថាបនាផ្លូវបេតុង ០១ខ្សែ នៅស្រុកកណ្ដាលស្ទឹង ខេត្តកណ្ដាល

ខេត្តកណ្ដាល: នៅថ្ងៃពុធ ១០រោច ខែអស្សុជ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី០៨ ខែវិច្ឆិកា ឆ្នាំ២០២៣ ឯកឧត្ដមបណ្ឌិត ចាន់ ដារ៉ុង រដ្ឋលេខាធិការ តំណាងដ៏ខ្ពង់ខ្ពស់ ឯកឧត្ដម ឆាយ ប្ញទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទ បានដឹកនាំគណ:កម្មការអន្តរក្រសួង រួមមានតំណាងក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ បានអញ្ជើញទៅពិនិត្យ និងវាយតម្លៃលើការងារស្ថាបនាផ្លូវបេតុងចំនួន ០១ខ្សែ ប្រវែង ១ ៥០០ ម៉ែត្រ ទទឹង ៦ម៉ែត្រ កម្រាស់ ០,២ ម៉ែត្រ និងសំណង់លូមូលដោះទឹកមុខពីរចំនួន ០១កន្លែង មានទីតាំងតភ្ជាប់ពីភូមិអន្លង់ព្រីង ទៅភូមិទែន ឃុំដើមឫស ស្រុកកណ្តាលស្ទឹង ខេត្តកណ្តាល ដែលអនុវត្តដោយនាយកដ្ឋានវិស្វកម្ម ក្រសួងការពារជាតិ។

បន្ទាប់ពីបានធ្វើការពិនិត្យជាក់ស្តែង និងយោងតាមស្មារតីអង្គប្រជុំរួចមក គណៈកម្មការអន្តរក្រសួង បានសម្រេចឯកភាពទទួលយកលទ្ធផលការងារសាងសង់ផ្លូវខាងលើ ១០០%៕