លោក ប្រាក់ មុត ប្រធានការិយាល័យថែទាំសុខភាពជនបទ និងលោក ឯម ប៊ុនសឿន ប្រធានការិយាល័យផ្គត់ផ្គង់ទឹកជនបទ នៃមន្ទីរអភិវឌ្ឍន៍ជនបទខេត្តកំពង់ធំ និងជាសមាជិកលេខាធិការដ្ឋាននៃក្រុមការងារបច្ចេកទេសវិស័យផ្គត់ផ្គង់ទឹកស្អាត និងអនាម័យជនបទ ខេត្ត (PWGs) បានចូលរួមក្នុងកិច្ចប្រជុំប្រចាំត្រីមាសទី៣ ឆ្នាំ២០២៣

ខេត្តកំពង់ធំ ៖ នាព្រឹកថ្ងៃព្រហស្បតិ៍ ១៤រោច ខែស្រាពណ៍ ឆ្នាំថោះ ព.ស.២៥៦៧ ត្រូវនឹងថ្ងៃទី១៤ ខែកញ្ញា ឆ្នាំ២០២៣ នៅរដ្ឋបាលស្រុកប្រាសាទសំបូរ លោក ប្រាក់ មុត ប្រធានការិយាល័យថែទាំសុខភាពជនបទ និងលោក ឯម ប៊ុនសឿន ប្រធានការិយាល័យផ្គត់ផ្គង់ទឹកជនបទ នៃមន្ទីរអភិវឌ្ឍន៍ជនបទខេត្តកំពង់ធំ និងជាសមាជិកលេខាធិការដ្ឋាននៃក្រុមការងារបច្ចេកទេសវិស័យផ្គត់ផ្គង់ទឹកស្អាត និងអនាម័យជនបទ ខេត្ត (PWGs) បានចូលរួមក្នុងកិច្ចប្រជុំប្រចាំត្រីមាសទី៣ ឆ្នាំ២០២៣ របស់ក្រុមការងារបច្ចេកទេសវិស័យផ្គត់ផ្គង់ទឹកស្អាត និងអនាម័យជនបទ ថ្នាក់ស្រុក (DWG) ក្រោមអធិបតីភាពលោក ថន ស៊ីពុទ្ធា អភិបាលរង នៃគណៈអភិបាលស្រុកប្រាសាទសំបូរ ដោយមានការអញ្ជើញចូលរួមពីអាជ្ញាធរឃុំ និងអង្គការវិទ្យាស្ថានស្រាវជ្រាវត្រីកោណ (RTI) ប្រចាំខេត្តកំពង់ធំ សរុបចំនួន ២៦នាក់។

គោលបំណងនៃកិច្ចប្រជុំ រួមមាន ៖
១. ពិនិត្យ និងឆ្លុះបញ្ចាំងអំពីវឌ្ឍនភាពការងារភូមិ ឃុំ បញ្ចប់ការបន្ទោបង់ពាសវាលពាសកាល (ODF)

២. បង្កើតក្រុមការងារផ្ទៀងផ្ទាត់ឃុំ ស្រុក បញ្ចប់បន្ទោបង់ពាសវាលពាសកាល (ODF)

៣. ធ្វើផែនការចុះផ្ទៀងផ្ទាត់ឃុំ ស្រុកបញ្ចប់បន្ទោបង់ពាសវាលពាសកាល (ODF) និង

៤. បញ្ហាប្រឈម/កត្តារាំងស្ទះ យឺតយ៉ាវក្នុងការចុះពិនិត្យផ្ទៀងផ្ទាត់ឃុំគោលដៅបញ្ចប់បន្ទោបង់ពាសវាលពាសកាល (ODF) ដោយមូលហេតុមានភ្លៀងធ្លាក់ច្រើន៕