ក្រុមការងារបច្ចេកទេសនៃនាយកដ្ឋានអភិវឌ្ឍន៍ជនជាតិភាគតិច និងអាជ្ញាធរមូលដ្ឋាន ចុះផ្សព្វផ្សាយគោលនយោបាយជាតិស្តីពី ការអភិវឌ្ឍជនជាតិដើមភាគតិច នីតិវិធី និងទម្រង់ឯកសារកំណត់អត្តសញ្ញាណសហគមន៍ជនជាតិដើមភាគតិច ថ្មូន នៅខេត្តមណ្ឌលគិរី

ខេត្តមណ្ឌលគិរី៖ នារសៀល ថ្ងៃចន្ទ ៨រោច ខែអស្សុជ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៦ ខែវិច្ឆិកា ឆ្នាំ២០២៣ លោកស្រី សំ សុម៉ាលី អនុប្រធាននាយកដ្ឋានអភិវឌ្ឍន៍ជនជាតិភាគតិច បានដឹកនាំក្រុមការងារបច្ចេកទេស ចុះផ្សព្វផ្សាយគោលនយោបាយជាតិស្តីពី ការអភិវឌ្ឍជនជាតិដើមភាគតិច នីតិវិធី និងទម្រង់ឯកសារដំណើរការកំណត់អត្តសញ្ញាណសហគមន៍ជនជាតិដើមភាគតិច ថ្មូន ដែលស្ថិតនៅភូមិមេមុំ(ថុងប៉ុង) ឃុំរយ៉ ស្រុកកោះញែក ខេត្តមណ្ឌលគិរី។ សមាសភាពចូលរួមក្នុងកម្មវិធីផ្សព្វផ្សាយនោះរួមមាន អនុប្រធានមន្ទីរ ប្រធានការិយាល័យអភិវឌ្ឍន៍ជនបទខេត្តមណ្ឌលគិរី អភិបាលរងនៃគណៈអភិបាលស្រុកកោះញែក មេឃុំ មេភូមិ និងក្រុមជនជាតិដើមភាគតិច ថ្មូន សរុបចំនួន៥៦នាក់ ស្រី២៧នាក់។

ការចុះផ្សព្វផ្សាយនេះមានគោលបំណង ផ្ដល់ចំណេះដឹងដល់ក្រុមជនជាតិដើមភាគតិចអំពី គោលនយោបាយជាតិ ច្បាប់បទដ្ឋានគតិយុត្ត នីតិវិធី និងទម្រង់ឯកសារកំណត់អត្តសញ្ញាណសហគមន៍ជនជាតិដើមភាគតិច។

ជាលទ្ធផលមានដូចខាងក្រោម៖

–  ប្រជាពលរដ្ឋជនជាតិដើមភាគតិចថ្មូន បានយល់ដឹងពីនីតិវិធី និងទម្រង់ឯកសារកំណត់អត្តសញ្ញាណសហគមន៍ជនជាតិដើមភាគតិច

–  ប្រជាពលរដ្ឋជនជាតិដើមភាគតិចថ្មូន បានស្រុះស្រួល និងឯកភាពបង្កើតជាសហគមន៍ជនជាតិដើមភាគតិច។

–  ជនជាតិដើមភាគតិច ថ្មូន បានជ្រើសរើសគណៈកម្មាធិការសហគមន៍ជនជាតិដើមភាគតិចរួចរាល់ដែលមានសមាសភាពគណៈកម្មាធិការចំនួន ១១រូប ស្រី៥រូប៕