ឯកឧត្តម ឌៀប​ កាណូរ៉ា ដឹកនាំមន្ដ្រីជំនាញ ចុះត្រួតពិនិត្យ​ សសកម្មភាពផ្គត់ផ្គង់ទឹកសហគមន៍​ នៅក្នុងខេត្តរតនគិរី

ខេត្ត​រតនគិរី ៖ នាថ្ងៃអង្គារ ១កើត ខែចេត្រ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី០៩ ខែមេសា ឆ្នាំ២០២៤ ឯកឧត្តម ឌៀប​ កាណូរ៉ា អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្ដម ឆាយ ឫទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទ បានដឹកនាំមន្ដ្រីជំនាញ នៃនាយកដ្ឋានផែនការ និងទំនាក់ទំនងសាធារណ: និងនាយកដ្ឋានផ្គត់ផ្គង់ទឹកជនបទ សហការជាមួយមន្ទីរអភិវឌ្ឍន៍ជនបទខេត្តរតនគិរី ចុះទស្សនកិច្ច​ ត្រួតពិនិត្យ​ លើសកម្មភាព និងសមិទ្ធផលនានា​ ដែលអង្គការយូហាន់នីធឺអន្តរជាតិ​ Johanniter Unfall-Hife (JUH) កំពុងអនុវត្តកម្មវិធីផ្គត់ផ្គង់ទឹក​ តាមរយ:ការសាងសង់ស្ថានីយផ្គត់ផ្គង់ទឹកស្អាតសហគមន៍​ នៅឃុំសិរីមង្គល​​ ស្រុកកូនមុំ និងប្រព័ន្ធចែកចាយស្រោចស្រពទឹក​​​ នៅឃុំសោមធំ ស្រុកអូរយ៉ាដាវ​។​

ក្នុងនោះ​ ឯកឧត្តមអនុរដ្ឋលេខាធិការ ក៏បានពិភាក្សាការងារជាមួយក្រុមការងាររបស់អង្គការ គណៈកម្មការគ្រប់គ្រង​ និងអាជ្ញាធរឃុំសង្កាត់​ ដើម្បីផ្តល់ដំណោះស្រាយ លើបញ្ហាប្រឈម​មួយចំនួន និងដាក់ទិសដៅបន្ដសម្រាប់ភាគីពាក់ព័ន្ធផងដែរ៕