ឯកឧត្ដម សួន សេរីរដ្ឋាន រដ្ឋលេខាធិការ អញ្ជើញចូលរួមសិក្ខាសាលាផ្សព្វផ្សាយស្ដីពី «សេចក្តីសង្កេតសន្និដ្ឋាននៃរបាយការណ៍លើកទី២ របស់ប្រទេសកម្ពុជា ស្តីពីការអនុវត្តកតិកាសញ្ញាអន្តរជាតិស្តីពីសិទ្ធិសេដ្ឋកិច្ច សង្គមកិច្ច និងវប្បធម៌»

រាជធានីភ្នំពេញ៖ នៅព្រឹកថ្ងៃចន្ទ ០៣រោច ខែអស្សុជ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៣០ តុលា ឆ្នាំ២០២៣ នេះ ឯកឧត្ដម សួន សេរីរដ្ឋាន រដ្ឋលេខាធិការ តំណាងដ៏ខ្ពង់ខ្ពស់ ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ទទួលបន្ទុកសិទ្ធិមនុស្ស សិទ្ធិជនជាតិដើមភាគតិចនៅកម្ពុជា អញ្ចើញចូលរួមសិក្ខាសាលាផ្សព្វផ្សាយស្ដីពី «សេចក្តីសង្កេតសន្និដ្ឋាននៃរបាយការណ៍លើកទី២ របស់ប្រទេសកម្ពុជា ស្តីពីការអនុវត្តកតិកាសញ្ញាអន្តរជាតិស្តីពីសិទ្ធិសេដ្ឋកិច្ច សង្គមកិច្ច និងវប្បធម៌» ក្រោមអធិបតីភាព ឯកឧត្តម កែវ រ៉េមី ទេសរដ្ឋមន្ត្រី ប្រធានគណៈកម្មាធិការសិទ្ធិមនុស្សកម្ពុជា ដែលប្រារពធ្វើនៅសណ្ឋាគា Raffle Le Royal រៀបចំដោយ គណៈកម្មាធិការសិទ្ធិមនុស្សកម្ពុជា និង UNOHCHR នៅកម្ពុជា ដែលមានការអញ្ចើញចូលរួមពីស្ថាប័នពាក់ព័ន្ធ និងអង្គការដៃគូ។

សិក្ខាសាលាប្រព្រឹត្តិទៅពេញមួយថ្ងៃដោយផ្ដោតសំខាន់លើការពិគ្រោះយោបល់ និងពិភាក្សាឲ្យបានទូលំទូលាយអំពី កតិកាសញ្ញាអន្តរជាតិស្តីពីសិទ្ធិសេដ្ឋកិច្ច សង្គមនិងវប្បធម៌ ដែលកម្ពុជាបានផ្តល់សច្ចាប័នរួចហើយ និងឈានទៅពិនិត្យលទ្ធភាព ផ្តល់សច្ចាប័នបន្ថែមទៀតនូវ អនុសញ្ញាការងារពលកម្មអន្តរជាតិ ILO169 ។