ឯកឧត្ដម ស្រ៊ិន ពុទ្ធី បានជួបពិភាក្សាការងារ ជាមួយលោកស្រី Eva Leneveu ប្រធានកិច្ចការសាធារណៈ នៃអង្គការទឹកស្អាត ១០០១

រាជធានីភ្នំពេញ៖ នាព្រឹកថ្ងៃសុក្រ ៤រោច ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី ២៣ ខែសីហា ឆ្នាំ ២០២៤ នៅទីស្ដីការក្រសួង ឯកឧត្ដម ស្រ៊ិន ពុទ្ធី ប្រធាននាយកដ្ឋានផ្គត់ផ្គង់ទឹកជនបទ និងជាទីប្រឹក្សាក្រសួង បានជួបពិភាក្សាការងារជាមួយលោកស្រី Eva Leneveu ប្រធានកិច្ចការសាធារណ: និងលោកស្រី Amandine Chaussinand នាយិកាប្រតិបត្តិ នៃអង្គការទឹកស្អាត ១០០១ (Fontaine 1001) ដែលមានសមាសភាពមកពីអង្គការទឹកស្អាត១០០១ និងនាយកដ្ឋានផ្គត់ផ្គង់ទឹកចំនួន ១០រូប ស្រី៥រូប។

កិច្ចពិភាក្សានេះផ្ដោតសំខាន់ទៅលើការងារចំនួន ៥ចំណុច ដូចខាងក្រោម៖

១.ការធ្វើបច្ចុប្បន្នភាព នៃការអនុវត្តគម្រោងរបស់អង្គការទឹកស្អាត ១០០១ រួមទាំងរបាយការណ៍ (FASEP Project) នៃគម្រោងដំឡើងស្ថានីយ ដើម្បីផ្ដល់លទ្ធភាពក្នុងការទទួលបានទឹកស្អាតនៅតាមទីជនបទក្នុងព្រះរាជាណាចក្រកម្ពុជា។

២.ការធ្វើបទបង្ហាញអំពីគម្រោងសាកល្បង នៃការសាងសង់ស្ថានីយផលិតទឹកស្អាតសហគមន៍ ដែលមានប្រព័ន្ធបច្ចេកវិទ្យាទំនើប(Kiosk 2-0) ចំនួន ១០ ស្ថានីយ ដែលគ្រោងសាងសង់នៅខេត្តបាត់ដំបង និងបន្ទាយមានជ័យ។

៣.ការពង្រឹងកិច្ចសហការរវាងក្រសួងអភិវឌ្ឍន៍ជនបទ និងមន្ទីរអភិវឌ្ឍន៍ជនបទខេត្តគោលដៅទាំងពីរ ជាមួយម្ចាស់ជំនួយ និងការចូលរួមរបស់អាជ្ញាធរមូលដ្ឋាន

៤.ការពង្រឹងសមត្ថភាព និងការបណ្ដុះបណ្ដាលផ្នែកបច្ចេកទេសដល់មន្រ្តីថ្នាក់ជាតិ និងថ្នាក់ក្រោមជាតិ

៥.ការបន្តការគាំទ្រ និងការពង្រីកគម្រោងទៅតំបន់ផ្សេងទៀត ដែលមានការខ្វះខាតទឹកស្អាតជូនប្រជាជននៅតំបន់ជនបទ។

ជាកិច្ចបញ្ចប់​ ឯកឧត្ដម បានវាយតម្លៃខ្ពស់ និងថ្លែងអំណរគុណដល់អង្គការទឹកស្អាត១០០១ ដែលតែងតែចូលរួមចំណែកយ៉ាងសំខាន់ក្នុងការអភិវឌ្ឍន៍លើវិស័យផ្គត់ផ្គង់ទឹកជនបទនូវកម្ពុជា។