![ឯកឧត្ដម ហួត សារឹម ប្រគេនទៀនវស្សា និងជូនអំណោយ ដល់ប្រជាពលរដ្ឋមានជីវភាពខ្វះខាតនៅ ស្រុកដំណាក់ចង្អើរ 8 photo 2024 07 26 12 38 10](https://www.mrd.gov.kh/wp-content/uploads/2024/07/photo_2024-07-26_12-38-10-150x150.jpg)
មន្ទីរអភិវឌ្ឍន៍ជនបទខេត្តកណ្តាល សហការជាមួយរដ្ឋបាលក្រុងសំពៅពូនរៀបចំបើកវគ្គបណ្តុះបណ្តាលតម្រង់ទិសស្តីពី ការងារចុះផ្ទៀងផ្ទាត់ស្ថានភាពបញ្ចប់ការបន្ទោបង់ពាសវាលពាសកាលកម្រិតខ្ពស់ (ODF+) ជូនក្រុមការងារវិស័យផ្គត់ផ្គង់ទឹកស្អាត និងអនាម័យជនបទថ្នាក់សង្កាត់ និងថ្នាក់ក្រុង
- ថ្ងៃទី១ ខែធ្នូ ឆ្នាំ២០២៣ ម៉ោង ៩:៥៣ ព្រឹក
- សកម្មភាពក្រសួង
![មន្ទីរអភិវឌ្ឍន៍ជនបទខេត្តកណ្តាល សហការជាមួយរដ្ឋបាលក្រុងសំពៅពូនរៀបចំបើកវគ្គបណ្តុះបណ្តាលតម្រង់ទិសស្តីពី ការងារចុះផ្ទៀងផ្ទាត់ស្ថានភាពបញ្ចប់ការបន្ទោបង់ពាសវាលពាសកាលកម្រិតខ្ពស់ (ODF+) ជូនក្រុមការងារវិស័យផ្គត់ផ្គង់ទឹកស្អាត និងអនាម័យជនបទថ្នាក់សង្កាត់ និងថ្នាក់ក្រុង 2 photo 2023 11 30 16 54 27 2](https://www.mrd.gov.kh/wp-content/uploads/2023/12/photo_2023-11-30_16-54-27-2-1000x750.jpg)
ខេត្តកណ្តាល៖ នាព្រឹកថ្ងៃព្រហស្បតិ៍ ៣រោច ខែកត្តិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៣០ ខែវិច្ឆិកា ឆ្នាំ២០២៣ នៅសាលប្រជុំសាលាក្រុងសំពៅពូន មន្ទីរអភិវឌ្ឍន៍ជនបទខេត្តកណ្តាល បានសហការជាមួយរដ្ឋបាលក្រុងសំពៅពូនរៀបចំបើកវគ្គបណ្តុះបណ្តាលតម្រង់ទិសស្តីពី ការងារចុះផ្ទៀងផ្ទាត់ស្ថានភាពបញ្ចប់ការបន្ទោបង់ពាសវាលពាសកាលកម្រិតខ្ពស់ (ODF+) ជូនក្រុមការងារវិស័យផ្គត់ផ្គង់ទឹកស្អាត និងអនាម័យជនបទថ្នាក់សង្កាត់ និងថ្នាក់ក្រុង ក្រោមអធិបតីភាព លោក ហៃ ដាន អនុប្រធានមន្ទីរអភិវឌ្ឍន៍ជនបទខេត្តកណ្តាល និង លោកស្រី ទេស សុភាព អភិបាលរង នៃគណៈអភិបាលក្រុងសំពៅពូន ដោយមានការអញ្ជើញចូលរួមដោយផ្ទាល់ពីសំណាក់ លោក ឈុន ចានរិទ្ធី អភិបាលរងក្រុងសំពៅពូន ទទួលបន្ទុកការងារវិស័យអភិវឌ្ឍន៍ជនបទ រួមជាមួយ លោក លោកស្រីប្រធាន អនុប្រធានការិយាល័យ មន្ត្រីជំនាញចំណុះរដ្ឋបាលសាលាក្រុង លោក លោកស្រីចៅសង្កាត់ ក្រុមប្រឹក្សាសង្កាត់ ស្មៀនសង្កាត់ តំណាងនាយកសាលារៀន តំណាងមណ្ឌលសុខភាព តំណាងនាយប៉ុស្តិ៍នគរបាលរដ្ឋបាលសង្កាត់ទាំង៥សង្កាត់ សរុប ៥៧នាក់ ។
វគ្គបណ្តុះបណ្តាលនេះ មានការចូលរួមធ្វើបទបង្ហាញដោយ លោកស្រី ថាច់ រតនសោភា ប្រធានការិយាល័យថែទាំសុខភាព លោកស្រី ស្រេង ដាណេ អនុប្រធានការិយាល័យរដ្ឋបាល និងកិច្ចការទូទៅ លោក គូយ ចន្ទី និង លោក សុខ វិសាល មន្ត្រីនៃមន្ទីរអភិវឌ្ឍន៍ជនបទខេត្តកណ្តាល។
គោលបំណងនៃវគ្គបណ្តុះបណ្តាលនេះ ដើម្បីពង្រឹងសមត្ថភាពជូនក្រុមការងារវិស័យផ្គត់ផ្គង់ទឹកស្អាត និងអនាម័យជនបទនៅថ្នាក់សង្កាត់ និងថ្នាក់ក្រុង សម្រាប់ត្រៀមចុះអនុវត្តការងារផ្ទៀងផ្ទាត់ (ODF+)នៅថ្នាក់ភូមិ និងថ្នាក់សង្កាត់ ឱ្យបានត្រឹមត្រូវតាមគោលការណ៍ណែនាំរបស់ក្រសួងអភិវឌ្ឍន៍ជនបទ និងបញ្ចាក់ពីសុក្រិតភាពលើការធានាអះអាងតាមរយៈសេចក្តីប្រកាស (ODF+)ផ្ទៃក្នុងរបស់ភូមិ និងសង្កាត់។
សិក្ខាលានេះបានប្រព្រឹត្តទៅដោយរលូន និងមានការចូលរួមយ៉ាងផុលផុសពីសិក្ខាកាមដោយមានការលើកឡើងជាសំណួរ និងចម្លើយប្រកបដោយអន្តរសកម្មវាងអ្នកធ្វើបទបង្ហាញរបស់ក្រុមការងារមន្ទីរ និងសិក្ខាកាមអ្នកចូលរួមក្នុងមូលដ្ឋាន។ បន្ទាប់ពីបានទទួលនូវចំណេះដឹងពីវគ្គបណ្តុះបណ្តាលនេះរួចមកក្រុមការងារមន្ទីរ និងក្រុមការងារវិស័យផ្គត់ផ្គង់ទឹកស្អាត និងអនាម័យជនបទថ្នាក់សង្កាត់ និងថ្នាក់ក្រុង បានធ្វើការអនុម័តនិងដាក់ផែនការសកម្មភាពបន្តសម្រាប់ចុះធ្វើការផ្ទៀងផ្ទាត់ការងារ (ODF+) នៅតាមបណ្តាភូមិ និងសង្កាត់នៅដើមខែធ្នូ ឆ្នាំ២០២៣ខាងមុខឆាប់ៗនេះ៕