ឯកឧត្តមបណ្ឌិត ចាន់ ដារ៉ុង រដ្ឋលេខាធិការក្រសួងអភិវឌ្ឍន៍ជនបទ បានដឹកនាំគណៈកម្មាធិការអន្តរក្រសួងចុះពិនិត្យ និងវាយតម្លៃលើការងារថែទាំផ្លូវខួប ចំនួន៣គម្រោង នៅខេត្តត្បូងឃ្មុំ

នាថ្ងៃចន្ទ ៣កើត ខែកត្តិក ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៩ ខែតុលា ឆ្នាំ២០២០ ឯកឧត្តមបណ្ឌិត ចាន់ ដារ៉ុង រដ្ឋលេខាធិការក្រសួងអភិវឌ្ឍន៍ជនបទ បានដឹកនាំគណៈកម្មាធិការអន្តរក្រសួងចុះពិនិត្យ និងវាយតម្លៃលើការងារថែទាំផ្លូវខួប ចំនួន៣គម្រោង ក្នុងនោះ÷

– គម្រោងទី១ ផ្លូវថែទាំខួបក្រាលកៅស៊ូប្រភេទពីរជាន់(DBST) ចំនួន១ខ្សែ ប្រវែង ៤ ១៦០ម៉ែត្រ ទទឹងខ្នងលើ ៥ម៉ែត្រ (មាន ១១កំណាត់) លើផ្លូវប្រវែងសរុប ៥៦ ៤០០ម៉ែត្រ ស្ថិតនៅឃុំសំបូរ ឃុំឈូក ឃុំគោល ឃុំឈើទាល ឃុំក្លែង និងឃុំសណ្តាន់ (ស្រុកកំពង់ស្វាយ ស្រុកប្រាសាទសំបូរ និងស្រុកសណ្តាន់) ខេត្តកំពង់ធំ។

– គម្រោងទី២ ការងារជួសជុលផ្លូវក្រាលក្រួសក្រហម ចំនួន២ខ្សែ ប្រវែងសរុប ១២ ៨០០ម៉ែត្រ ទទឹងខ្នងលើ ៦ម៉ែត្រ និងសាងសង់លូមូលគ្រប់ប្រភេទ ចំនួន ២១កន្លែង ស្ថិតនៅឃុំកក់ និងឃុំកោងកាង ស្រុកពញាក្រែក ខេត្តត្បូងឃ្មុំ ។

– គម្រោងទី៣ ការងារថែទាំផ្លូវខួបក្រាលកៅស៊ូប្រភេទពីរជាន់ (DBST) ចំនួន២ខ្សែ (មាន១៣កំណាត់) ប្រវែងសរុប ២ ៩០០ម៉ែត្រ ទទឹងខ្នងលើ ៥,៥ម៉ែត្រ និង ៦ម៉ែត្រ ស្ថិតនៅឃុំរកាពរប្រាំ ឃុំទួលស្នួល ឃុំឈូក ឃុំពពេល ឃុំនាងទើត ឃុំចុងជាច និងឃុំគោកចារស្រុកត្បូងឃ្មុំ ស្រុកក្រូចឆ្មារ និងស្រុកពញាក្រែក ខេត្តត្បូងឃ្មុំ ដោយប្រើប្រាស់ថវិកាជំពូក ៦១ ដែលអនុវត្តដោយនាយកដ្ឋានផ្លូវលំជនបទ។

ជាលទ្ធផលគណៈកម្មាធិការបានសម្រេចទទួលយកនូវការងារថែទាំផ្លូវខួបទាំង៣គម្រោងខាងលើ។