លោក អឿន ធារិទ្ធ ដឹកនាំមន្ដ្រីជំនាញ ចុះផ្ទៀងផ្ទាត់លទ្ធផលវាយតម្លៃលក្ខណៈសម្បត្តិ “ភូមិគំរូ” ចំនួន ០២ភូមិ ក្នុងខេត្តព្រះវិហារ

ខេត្តព្រះវិហារ ៖ នាថ្ងៃព្រហស្បតិ៍ ៦កើត ខែចេត្រ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៣ ខែមេសា ឆ្នាំ២០២៥ លោក អឿន ធារិទ្ធ ប្រធាននាយកដ្ឋានអភិវឌ្ឍន៍សហគមន៍ បានដឹកនាំមន្ដ្រីជំនាញរបស់នាយកដ្ឋាន ដោយមានការសម្របសម្រួលពីមន្ដ្រីជំនាញនៃមន្ទីរអភិវឌ្ឍន៍ជនបទខេត្តព្រះវិហារ ចុះផ្ទៀងផ្ទាត់លទ្ធផលវាយតម្លៃលក្ខណៈសម្បត្តិ “ភូមិគំរូ” ចំនួន ០២ភូមិ គឺភូមិក្របៅ ឃុំគូលែនត្បូង ស្រុកគូលែន និងភូមិសេដ្ឋកិច្ច ឃុំឈានមុខ ស្រុកត្បែងមានជ័យ ខេត្តព្រះវិហារ។

ការចុះផ្ទៀងផ្ទាត់លទ្ធផលវាយតម្លៃនេះ មានការអញ្ជើញចូលរួមពីក្រុមប្រឹក្សាឃុំគោលដៅទាំង២  និងគណៈកម្មាធិការអភិវឌ្ឍន៍ភូមិ (គ.អ.ភ) ទាំង ២ភូមិ ក្នុងគោលបំណង សិក្សាពីសក្តានុពល ប្រមូលតម្រូវនានា របស់ភូមិ ពិនិត្យទីតាំងភូមិសាស្ត្រ ព្រមទាំងស្ថានភាពនៃការអភិវឌ្ឍក្នុងភូមិ ដោយបានជួបសម្ភាសជាមួយ គ.អ.ភ និងអ្នកពាក់ព័ន្ធ ស្វែងយល់ពីប្រភពចំណូលគ្រួសាររបស់ប្រជាពលរដ្ឋនៅក្នុងភូមិ ពិនិត្យពីការដាំដុះ និងការប្រកបរបរផ្សេងៗក្នុងភូមិ។ ក្រោយពីបានចុះផ្ទៀងផ្ទាត់លទ្ធផលវាយតម្លៃលក្ខណៈសម្បត្តិភូមិគំរូទាំង២ភូមិ រួចមក ក្រុមការងាររបស់នាយកដ្ឋាន និងមន្ទីរ បានប្រជុំពិនិត្យ និងបូកសរុបលទ្ធផលនៃការចុះវាយតម្លៃ ដើម្បីពិនិត្យ និងឯកភាពលើលទ្ធផលនៃការចុះវាយតម្លៃភូមិគោលដៅទាំង ២ភូមិ៕