នាព្រឹកថ្ងៃទី ១០ ខែកញ្ញា ឆ្នាំ ២០១២ វេលាម៉ោង ០៨ និង ៣០ នាទីព្រឹក នៅទីស្ដីការក្រសួងអភិវឌ្ឍន៍ជនបទ មានរៀបចំកិច្ចប្រជុំប្រចាំសប្ដាហ៍ ក្រោមអធិបតីភាពឯកឧត្ដម ជា សុផារ៉ា រដ្ឋមន្ត្រីក្រសួងអភិវឌ្ឍន៍ជនបទ។ អញ្ជើញចូលរួមក្នុងកិច្ចប្រជុំនេះមានឯកឧត្ដម លោកជំទាវរដ្ឋលេខាធិការ អនុរដ្ឋលេខាធិការ នាយខុទ្ទកាល័យ អគ្គាធិការ អគ្គនាយក អគ្គនាយករង ប្រធាននាយកដ្ឋាន និងអនុប្រធាននាយកដ្ឋាន ជំនួយការថ្នាក់ដឹកនាំ នៅក្រោមឱវាទក្រសួងអភិវឌ្ឍន៍ជនបទ សរុបប្រមាណជាង ១០០ នាក់ ។
កិច្ចប្រជុំបានប្រព្រឹត្តទៅតាមរបៀបវារៈដែលបានគ្រោងទុក៖
1.ការអានព្រះរាជក្រឹត្យតែងតាំងមន្ត្រីរាជការ៖
- ឯកឧត្តម ផាន់ សាភឿន ជាទីប្រឹក្សាអមក្រសួងអភិវឌ្ឍន៍ជនបទ មានឋានៈស្មើអគ្គនាយក
- លោក ហាក់ ម៉ាក់ ជាទីប្រឹក្សាក្រសួងអភិវឌ្ឍន៍ជនបទ មានឋានៈស្មើអគ្គនាយករង
- លោក នុត សាំង ជាទីប្រឹក្សាក្រសួងអភិវឌ្ឍន៍ជនបទ មានឋានៈស្មើអគ្គនាយករង
- លោក ងឹម ងឿន ជាទីប្រឹក្សាក្រសួងអភិវឌ្ឍន៍ជនបទ មានឋានៈស្មើអគ្គនាយករង
- លោក មាស សុជាតិ ជាទីប្រឹក្សាក្រសួងអភិវឌ្ឍន៍ជនបទ មានឋានៈស្មើអគ្គនាយករង
- លោក វ៉ឺត ហាត់ ជាទីប្រឹក្សាក្រសួងអភិវឌ្ឍន៍ជនបទ មានឋានៈស្មើអគ្គនាយករង
- លោក ផារ៉ា មង្គល ជាអគ្គនាយករងរដ្ឋបាល និងហិរញ្ញវត្ថុ
- លោកបណ្ឌិត ភាគ សុធា ជាប្រធាននាយកដ្ឋានអភិវឌ្ឍន៍សេដ្ឋកិច្ចជនបទ
2.ស្តាប់របាយការណ៍ស្តីពីការរៀបចំឯកសារគោលនយោបាយស្តីពីការអភិវឌ្ឍន៍ផ្លូវជនបទ ដែលរៀបចំ និងកែសម្រួលដោយក្រុមការងារនីតិកម្ម និងគោលនយោបាយ របស់ឯកឧត្តមបណ្ឌិត ថេង ច័ន្ទសង្វារ អនុរដ្ឋលេខាធិការ ។ សេចក្តីព្រាងឯកសារគោលនយោបាយនេះត្រូវបានរៀបចំឡើងដំបូងឡើងមុនឆ្នាំ ២០០៨ ក្រោមក្របខ័ណ្ឌគម្រោង SEACAP របស់ក្រសួង ដោយមានទីប្រឹក្សាបរទេសជួយតាក់តែងក្រោមរូបភាពជាឯកសារគោលនយោបាយរបស់ក្រសួង ។ នៅឆ្នាំ ២០០៩ ក្រសួងបានយកឯកសារបកប្រែមកកែសម្រួលសារជាថ្មី និងបានប្រជុំពិភាក្សាផ្ទៃក្នុងជាច្រើនលើក ។ នៅខែកក្កដា ឆ្នាំ ២០១២ ឯកសារនេះត្រូវបានផ្ទេរមកក្រុមការងារនីតិកម្ម និងគោលនយោបាយ ដែលបានធ្វើការប្រជុំពិនិត្យចំនួន ៥ លើក នៅឆ្នាំ ២០១១ និង ២ លើក នៅឆ្នាំ ២០១២ ។ សេចក្តីព្រាងគោលនយោបាយមានគោលដៅ ៤ យុទ្ធសាស្ត្រ ៩ និងចំណុចសំខាន់ ៣ ទៀតគឺហិរញ្ញប្បទាន ចីរភាពនៃហេដ្ឋារចនាសម្ព័ន្ធ និងការអភិវឌ្ឍស្ថាប័ន ។ ការសម្រេចកែសម្រួលឯកសារដើមទៅជាឯកសារគោលនយោបាយរបស់រាជរដ្ឋាភិបាលវិញ ទាមទាឲ្យរៀបចំទម្រង់ឯកសារសារឡើងវិញ។ ឯកឧត្តមរដ្ឋមន្ត្រីបានផ្តល់អនុសាសន៍ណែនាំមួយចំនួនលើខ្លឹមសារ និងទម្រង់នៃសេចក្តីព្រាងឯកសារគោលនយោបាយ និងប្រគល់ភារកិច្ចឲ្យក្រុមការងារនីតិកម្ម និងគោលនយោបាយ ស្នើសុំឲ្យក្រុមប្រឹក្សាអ្នកច្បាប់ជួយកែសម្រួលសេចក្តីព្រាងលើទម្រង់ មុននឹងបញ្ជូនទៅទីស្តីការគណៈរដ្ឋមន្ត្រីជាផ្លូវការ ។
3.ស្តាប់របាយការណ៍ស្តីពីការរៀបចំសមាសភាព និងការបណ្តុះបណ្តាលគណៈកម្មាធិការអភិវឌ្ឍន៍ភូមិ របស់លោក ហួ កុលវ័ន្ត ប្រធាននាយកដ្ឋានអភិវឌ្ឍន៍សហគមន៍ ។ បន្ទាប់ពីមានសារាចរណែនាំលេខ ០០៩៨ ចុះថ្ងៃទី ២៧ ខែមេសា ឆ្នាំ២០១១ របស់ក្រសួងអភិវឌ្ឍន៍ស្តីពី ការអនុវត្តប្រកាសអន្តរក្រសួងលេខ ២៣៩១ប្រក ចុះថ្ងៃទី ២២ ខែធ្នូ ឆ្នាំ២០១០ របស់រដ្ឋមន្ត្រីក្រសួងមហាផ្ទៃ និងរដ្ឋមន្ត្រីក្រសួងអភិវឌ្ឍន៍ជនបទ ស្តីពីការបង្កើត និងការប្រព្រឹត្តទៅរបស់គណៈកម្មាធិការអភិវឌ្ឍន៍ភូមិ រួចមកនៅឆ្នាំ ២០១១ នាយកដ្ឋានអភិវឌ្ឍន៍សហគមន៍ និងមន្ទីរអភិវឌ្ឍន៍ជនបទទាំង ២៤ រាជធានី ខេត្ត បានរៀបចំសិក្ខាសាលាផ្សព្វផ្សាយសារាចរណែនាំស្តីពី ការអនុវត្តប្រកាសអន្តរក្រសួងលេខ ២៣៩១ ប្រក ចុះថ្ងៃទី ២២ ខែធ្នូ ឆ្នាំ២០១០ របស់ក្រសួងមហាផ្ទៃ និងក្រសួងអភិវឌ្ឍន៍ជនបទ បានចំនួន ២៥លើក ដែលមានអ្នកចូលរួម សរុប ចំនួន ៤ ៣៤៧ នាក់ ស្រីចំនួន ៥៥៨នាក់ ។ ក្រោយពីបានបញ្ចប់សិក្ខាសាលាផ្សព្វផ្សាយរួចមក មន្ទីរអភិវឌ្ឍន៍ជនបទរាជធានី ខេត្ត បានបន្តរៀបចំសមាសភាព គអភ បានចំនួន ៧.១៥៥ ភូមិ ស្មើនឹង ៥១,៩៦% នៃចំនួនភូមិសរុបកើនលើសឆ្នាំ ២០១១ បានចំនួន ៣.១១១ ភូមិ ស្មើនឹង ២២% (កាលពីខែធ្នូ ឆ្នាំ ២០១១ រៀបចំសមាសភាព គ.អ.ភ បានចំនួន ៤.០៤៤ ភូមិ ស្មើនឹង ៣០% នៃចំនួនភូមិសរុប)។ ការរៀបចំសមាសភាព គអភ ភាគច្រើនលើសលុបមន្ទីរអភិវឌ្ឍន៍ជនបទ រាជធានី ខេត្ត ជាអ្នកសម្របសម្រួល រៀបចំ និងជ្រើសរើសជាមួយក្រុមប្រឹក្សាឃុំ និងមេភូមិ។ មានអង្គការចំនួន ៤ តែប៉ុណ្ណោះ ដែលបានជួយរៀបចំសមាសភាព គ.អ.ភ បានចំនួន ១០១ ភូមិ ក្នុងនោះមាន អង្គការជីវិតថ្លៃថ្នូរ CHILD FUND, YWAM និង CGA ។ គិតត្រឹមបំណាច់ខែសីហា ឆ្នាំ ២០១២ មន្ទីរអភិវឌ្ឍន៍ជនបទចំនួន ១៣ ខេត្ត បានបណ្ដុះបណ្ដាល គ.អ.ភ ស្តីពី តួនាទីភារកិច្ច និងផែនការសកម្មភាពអភិវឌ្ឍន៍ភូមិ បានចំនួន ៨៧ វគ្គ ដែលមានសមាជិក គ.អ.ភ ចំនួន ៣០៤៥ នាក់ មកពីភូមិ គោលដៅចំនួន ៤៣៥ ភូមិ។ ឯកឧត្តមរដ្ឋមន្ត្រីស្នើឲ្យរៀបចំរបាយការណ៍ស្តីពីលទ្ធផលនៃការរៀបចំសមាសភាព គអភ មានភ្ជាប់តារាងលម្អិត ដើម្បីផ្ញើទៅគ្រប់មន្ទីរអភិវឌ្ឍន៍ជនបទរាជធានី ខេត្តជ្រាប ។ នៅកិច្ចប្រជុំក្រុមការងារបច្ចេកទេសវិស័យទឹកស្អាត និងអនាម័យលើកក្រោយ ក៏ដូចជាកិច្ចប្រជុំក្រុមអង្គការដែលធ្វើការងារក្នុងវិស័យទឹកស្អាត និងអនាម័យ ត្រូវមានបង្ហាញរបាយការណ៍មួយស្តីពីការរីចម្រើននៃការរៀបចំសមាសភាព គអភ នេះ ដើម្បីអំពាវឲ្យដៃគូអភិវឌ្ឍន៍ជួយ ។
4.ផ្សេង៖
- ឯកឧត្តមរដ្ឋមន្ត្រីស្នើឲ្យមន្ត្រីរាជការទាំងអស់ជំរុញកូនចៅ និងក្រុមគ្រួសារ ទៅពិនិត្យឈ្មោះ និងចុះឈ្មោះបោះឆ្នោត ឲ្យបានគ្រប់ៗគ្នា ។ អ្នកដែលបានចុះឈ្មោះពីរកន្លែង សូមទៅសុំលុបឈ្មោះមួយចេញ ។
- ឯកឧត្តមផ្តល់អនុសាសន៍ឲ្យគ្រប់អគ្គនាយកដ្ឋាន នាយកដ្ឋាន និងអង្គភាពអនុវត្តគម្រោងទាំងអស់ត្រៀមរៀបចំរបាយការណ៍បូកសរុបប្រចាំឆ្នាំ ២០១២ ។
កិច្ចប្រជុំនេះបានបញ្ចប់ នៅវេលាម៉ោង ១០ និង ៣០ នាទីថ្ងៃត្រង់ នាថ្ងៃខែ និងឆ្នាំដដែល ប្រកបដោយផ្លែផ្កា និងការទទួលខុសត្រូវខ្ពស់ ។
អ្នករាយការណ៍ បណ្ឌិត ថេង ច័ន្ទសង្វារ អនុរដ្ឋលេខាធិការ
