កាលពីថ្ងៃទី ២៦ ខែកក្កដា ឆ្នាំ២០១២ នៅសណ្ឋាគារភ្នំពេញ ក្រោមកិច្ចសហប្រតិបត្តិការរវាងក្រសួងអភិវឌ្ឍន៍ជនបទ ជាមួយនឹងទីភ្នាក់ងារសហប្រតិបត្តិការអន្តរជាតិកូរ៉េ (KOICA) ដែលមានការគាំទ្រផ្នែកបច្ចេកទេសដោយសាជីវកម្មសហគមន៍ជនបទកូរ៉េ (KRC) បានរៀបចំសិក្ខាសាលាផ្សព្វផ្សាយមួយស្ដីពីការអភិវឌ្ឍធនធានមនុស្សរបស់ក្រសួងអភិវឌ្ឍន៍ជនបទ តាមរយៈកម្មវិធីបណ្ដុះបណ្ដាលការអភិវឌ្ឍសហគមន៍ជនបទពហុឆ្នាំ សម្រាប់ប្រទេសកម្ពុជា ដល់មន្ត្រីរាជការក្រសួង និងមន្ទីរអភិវឌ្ឍន៍ជនបទរាជធានី ខេត្ត ទាំង ២៤ ។ នេះជាសិក្ខាសាលាផ្សព្វផ្សាយបញ្ចប់នៃកម្មវិធីបណ្ដុះបណ្ដាលគ្រូបង្គោលដែលត្រូវអនុវត្តក្នុងរយៈពេល ០៣ ឆ្នាំ សម្រាប់មន្ត្រីក្រសួងអភិវឌ្ឍន៍ជនបទ បន្ទាប់ពីកម្មវិធីបណ្ដុះបណ្ដាលលើកទី ១ បានបញ្ចប់កាលពីចុងខែធ្នូ ឆ្នាំ ២០១១។ អញ្ជើញចូលរួមក្នុងសិក្ខាសាលានេះ មាន ឯកឧត្តមជា រដ្ឋលេខាធិការ អនុរដ្ឋលេខាធិការ អគ្គនាយក តំណាង KOICA ប្រចាំប្រទេសកម្ពុជា តំណាង KRC និងសិក្ខាកាមសរុបចំនួន ១១០ នាក់ ដែលអញ្ជើញមកពីទីស្ដីការក្រសួង និងមន្ទីរអភិវឌ្ឍន៍ជនបទរាជធានី ខេត្តទាំង ២៤ ។
គោលបំណងនៃសិក្ខាសាលានេះ គឺដើម្បី : ១) ផ្សព្វផ្សាយគម្រោងកម្មវិធីបណ្តុះបណ្តាលស្តីអំពីការអភិវឌ្ឍសហគមន៍ជនបទសម្រាប់ឆ្នាំ ២០១២ ២) ពន្យល់អំពីការអនុវត្តគម្រោងបណ្តុះបណ្តាលបន្តដល់មន្ទីរអភិវឌ្ឍន៍ជនបទរាជធានី ខេត្តទាំង ២៤ និងការបណ្តុះបណ្តាលបន្តរបស់មន្ទីរនីមួយៗ ៣) បង្កើនការគាំទ្រ និងការចូលរួមពីបណ្តាមន្ទីរអភិវឌ្ឍន៍ជនបទរាជធានី ខេត្តទាំង ២៤ និង ៤) ផ្តល់លិខិតតែងតាំងគ្រូបង្គោល និងផ្តល់រង្វាន់ជូនដល់មន្ទីរដែលបានអនុវត្តគម្រោងបណ្តុះបណ្តាលបន្តបានល្អ ក្នុងឆ្នាំ ២០១១ ។
នៅក្នុងមតិស្វាគមន៍ក្នុងពិធីបើកអង្គសិក្ខាសាលា លោកបណ្ឌិត Shin Eui Cheol ប្រធាន KOICA ប្រចាំនៅកម្ពុជាបានមានប្រសាសន៍ថា សាធារណៈរដ្ឋកូរ៉េក្នុងនាមជាដៃគូអភិវឌ្ឍន៍ល្អជាមួយនឹងប្រទេសកម្ពុជា កូរ៉េបានចូលរួមចំណែកក្នុងការអភិវឌ្ឍប្រទេសកម្ពុជា តាមរយៈការផ្ដល់ជំនួយអភិវឌ្ឍន៍ផ្លូវការដោយផ្ដោតលើវិស័យ ០៤ សំខាន់ ដូចជា ១).អប់រំ និងអភិវឌ្ឍន៍ធនធានមនុស្ស ២).ការអភិវឌ្ឍវិស័យកសិកម្ម និងជនបទ ៣). សុខាភិបាល និង ៤).ហេដ្ឋារចនាសម្ព័ន្ធ។ វិស័យទាំងបួននេះកំពុងអនុវត្តដោយទីភ្នាក់ងារ KOICA។ លោកបានបន្ដទៀតថា សិក្ខាសាលាស្ដីពីកម្មវិធីបណ្ដុះបណ្ដាលការអភិវឌ្ឍសហគមន៍ជនបទពហុឆ្នាំ សម្រាប់ប្រទេសកម្ពុជា នេះ ជាកត្តាចំបាច់បំផុតសម្រាប់ប្រទេសកម្ពុជាក្នុងការពង្រឹងឧស្សាហូបនីយកម្ម និងការប្រកួតប្រជែងថ្នាក់ជាតិ ហើយវគ្គបណ្ដុះបណ្ដាលនេះ ជាសក្ខីភាពតំណាងឲ្យការចូលរួមដល់ការអភិវឌ្ឍជនបទនៅកម្ពុជាពីសំណាក់រដ្ឋាភិបាលសាធារណរដ្ឋកូរ៉េ ។
ក្នុងឱកាសពិធីបើកអង្គសិក្ខាសាលានោះផងដែរ ឯកឧត្ដមបណ្ឌិត ថេង ច័ន្ទសង្វារ អនុរដ្ឋលេខាធិការ និងជានាយកខុទ្ទកាល័យក្រសួងអភិវឌ្ឍន៍ជនបទ បានក្រើនរំលឹកឲ្យលោកគ្រូអ្នកគ្រូជាសិក្ខាកាមខិតខំចាប់យកខ្លឹមសារសំខាន់ៗនៃមេរៀននៅក្នុងវគ្គបណ្ដុះបណ្ដាលដែលគ្រោងនឹងរៀបចំនៅតាមតំបន់ ដើម្បីយកទៅចែករំលែកនៅតាមមន្ទីរ និងសហគមន៍។ ឯកឧត្ដមក៍បានសំណូមពរឲ្យមន្ទីរអភិវឌ្ឍន៍ជនបទរាជធានី ខេត្ត ទាំងអស់ និងនាយកដ្ឋានបណ្ដុះបណ្ដាល និងស្រាវជ្រាវ ធានាបាននូវនិរន្តរភាពនៃកម្មវិធីនេះ ដោយរៀបចំឲ្យមានជាវគ្គបណ្ដុះបណ្ដាលតូចៗ នៅតាមមន្ទីរ ឬមជ្ឈមណ្ឌលបណ្ដុះបណ្ដាលជំនាញមូលដ្ឋានរបស់ខ្លួន ។
បន្ទាប់មក លោក LEE Seung Won ប្រធានគម្រោងអញ្ជើញមកពី KRC បានធ្វើបទបង្ហាញដោយសង្ខេបពីកម្មវិធីបណ្ដុះបណ្ដាលនេះថា កម្មវិធីបណ្ដុះបណ្ដាលការអភិវឌ្ឍសហគមន៍ជនបទពហុឆ្នាំ សម្រាប់ប្រទេសកម្ពុជានេះ នឹងគ្រោងធ្វើការផ្សព្វផ្សាយ ដើម្បីបណ្ដុះបណ្ដាលមន្ត្រីរាជការនៅតាមបណ្ដាមន្ទីរអភិវឌ្ឍន៍ជនបទរាជធានី ខេត្ត ទាំង ២៤ ចំនួន ១០០ នាក់ ដោយចែកជា ០៣ តំបន់ មាន : តំបន់ទី ១ ធ្វើនៅមន្ទីរអភិវឌ្ឍន៍ជនបទខេត្តព្រះសីហនុ តំបន់ទី ២ ធ្វើនៅមន្ទីរអភិវឌ្ឍន៍ជនបទខេត្តកណ្តាល និងតំបន់ទី ៣ ធ្វើនៅមន្ទីរអភិវឌ្ឍន៍ជនបទខេត្តសៀមរាប ដោយចាប់ផ្ដើមដំណើរការនៅថ្ងៃទី ៣០ ខែកក្កដា ហើយបញ្ចប់នៅថ្ងៃទី ៣១ ខែសីហា ឆ្នាំ ២០១២ ខាងមុខនេះ ។ កម្មវិធីបណ្ដុះបណ្ដាលខាងលើនេះ នឹងផ្ដោតសំខាន់លើមេរៀនចំនួន ០៤ : ១)-ការអភិវឌ្ឍជនបទដោយមានការចូលរួម ២)-ចលនាអភិវឌ្ឍន៍ភូមិថ្មី (Saemaul Undong) ៣)-ការគ្រប់គ្រង់គម្រោង និង ៤)-គរុកោសល្យនៃការបង្រៀន ។
ក្នុងមតិសំណេះសំណាលបិទសិក្ខាសាលា ឯកឧត្តម សួស គង់ រដ្ឋលេខាធិការក្រសួងអភិវឌ្ឍន៍ជនបទ បានថ្លែងអំណរគុណចំពោះសាធារណរដ្ឋកូរ៉េ ពិសេស ភ្នាក់ងារសហប្រតិបត្តិការអន្តរជាតិកូរ៉េ (KOICA) និង សាជីវកម្មអភិវឌ្ឍន៍ជនបទកូរ៉េ (KRC) ដែលជួយដល់ក្រសួងអភិវឌ្ឍន៍ជនបទក្នុងការងារបណ្តុះបណ្តាលធនធានមនុស្សដ៏មានសារៈសំខាន់នេះ។ ឯកឧត្ដមបានបន្ដទៀតថា កម្មវិធីបណ្ដុះបណ្ដាលនេះ គឺស្របតាមគោលនយោបាយរបស់រាជរដ្ឋាភិបាល ក្នុងការលើកកម្ពស់កម្រិតជីវភាពរស់នៅរបស់ប្រជាពលរដ្ឋនៅជនបទ ដើម្បីឈានទៅសម្រេចឲ្យបាននូវការកាត់បន្ថយភាពក្រីក្រនៅទូទាំងប្រទេសយ៉ាងហោចណាស់ ១% ក្នុងមួយឆ្នាំ។ តាមរយៈនេះ ក្រសួងអភិវឌ្ឍន៍ជនបទចាំបាច់ត្រូវកសាងធនធានមនុស្សដែលមានសមត្ថភាពគ្រប់គ្រាន់ទាំងជំនាញ និងបទសោធន៍ ដើម្បីក្លាយខ្លួនជាអ្នកផ្តល់សេវាដ៏ល្អប្រសើរ ក្នុងការរួមចំណែកអភិវឌ្ឍន៍សហគមន៍ជនបទ។ ឯកឧត្តមក៏បានបញ្ជាក់ដោយសង្កត់ធ្ងន់ថា ចំណេះដឹងដែលទទួលបានពីវគ្គបណ្ដុះបណ្ដាលនេះ សិក្ខាកាមទាំងអស់គួរត្រូវបានយកទៅអនុវត្តជាក់ស្តែងនៅតាមមូលដ្ឋាន ដើម្បីរួមចំណែកបំពេញបេសកកម្ម ដ៏ថ្លៃថ្លាបម្រើប្រជាជនដែលកំពុងតែរង់ចាំជំនួយពីមន្ត្រីរាជការ ៕
អត្ថបទ ៖ លោក ឡេង គីឈ័ង