នៅថ្ងៃទី ២៣ និង ២៤ ខែកក្កដា ឆ្នាំ ២០១២ នៅទីស្តីការក្រសួងអភិវឌ្ឍន៍ជនបទមានរៀបចំវគ្គបណ្តុះបណ្តាលដំបូង ជូនដល់មន្ត្រីរាជការដែលទើបប្រឡងជាប់ថ្មីចំនួន ៤០ នាក់ ។ វគ្គនេះមានបំណងផ្តល់ជូននូវចំណេះដឹងអំពីច្បាប់សហលក្ខន្តិកៈមន្ត្រីរាជការស៊ីវិលនៃព្រះរាជាណាចក្រកម្ពុជា លក្ខន្តិកៈដោយឡែកនៃមន្ត្រីបច្ចេកទេសជាន់ខ្ពស់ និងបង្ហាញអំពីការរៀបចំ និងការប្រព្រឹត្តទៅរបស់ក្រសួងអភិវឌ្ឍន៍ជនបទ ដើម្បីឲ្យមន្ត្រីថ្មីយល់ដឹងអំពីទិសដៅ និងចក្ខុវិស័យដែលក្រសួង ត្រូវ និងកំពុងអនុវត្ត។
លោក ទួន ភិរម្យ អនុប្រធាននាយកដ្ឋានរដ្ឋបាល និងបុគ្គលិក បានធ្វើបទឧទ្ទេសនាមអំពីច្បាប់សហលក្ខន្តិកៈមន្ត្រីរាជការស៊ីវិល ដោយបានបង្ហាញដល់សិក្ខាកាមអំពី ៖
- បញ្ញត្តិទូទៅ ដែលអាចឲ្យបេក្ខជនយល់ដឹងអំពីដែនសមត្ថកិច្ច និងវិសាលភាពនៃច្បាប់សហលក្ខន្តិកៈមន្ត្រីរាជការ យល់ដឹងពីអ្វីជាក្របខ័ណ្ឌ ឋានន្តរស័ក្តិ ថ្នាក់ និងសន្ទស្សន៍បៀវត្សរបស់មន្ត្រីរាជការ។
- ការជ្រើសរើសឲ្យចូលធ្វើការ អាចឲ្យបេក្ខជនយល់ដឹងអំពីលក្ខខណ្ឌដែលអាចប្រឡងចូលក្របខ័ណ្ឌមន្ត្រីរាជការបាន។
- ការធ្វើកម្មសិក្សា ការតាំងស៊ប់ក្នុងក្របខ័ណ្ឌ ការបញ្ចេញពីក្របខ័ណ្ឌ អាចឲ្យបេក្ខជនយល់ដឹងអំពីលក្ខខណ្ឌនានាក្នុងការដែលអាចតាំងស៊ប់ និងមិនអាចតាំងស៊ប់ក្នុងក្របខ័ណ្ឌមន្ត្រីរាជការបាន "កម្មសិក្សាមិនអាចយកជាការបានទេ បើកាលណាសាមីជនអាក់ខានមកធ្វើកម្មសិក្សាសរុបលើសពី ៣០ ថ្ងៃ" ក្នុងរយៈពេល ១២ ខែនៃកម្មសិក្សានេះ។ ម្យ៉ាងទៀត កម្មសិក្សាការីណាដែលមិនបានបង្ហាញឲ្យឃើញថា ខ្លួនមានសម្បទាវិជ្ជាជីវៈគ្រប់គ្រាន់ ឬក៏ពិនិត្យឃើញថារបៀបធ្វើការងារមានការខ្ជីខ្ជា ឬក៏អសមត្ថភាព នឹងកាន់មុខតំណែងបានតាមលក្ខខណ្ឌដែលបានកំណត់ក្នុងសេចក្តីណែនាំជាធរមាន អាចបញ្ឈប់មិនឲ្យធ្វើការនេះពេលណាក៏បានក្នុងរយៈពេលកម្មសិក្សា។
- ការឡើងឋានន្តរស័ក្តិ ឬឡើងថ្នាក់ ដែលអាចឲ្យបេក្ខជនយល់ដឹងអំពីលក្ខខណ្ឌក្នុងការដំឡើងថ្នាក់ និងដំឡើងឋានន្តរស័ក្តិរបស់មន្ត្រីរាជការ។
- វិន័យ ដែលអាចឲ្យបេក្ខជនយល់ដឹងអំពីកាតព្វកិច្ចដែលមន្ត្រីរាជការត្រូវទទួលខុសត្រូវ និងលក្ខខណ្ឌនានាដែលច្បាប់បានហាមឃាត់មន្ត្រីរាជការមិនឲ្យធ្វើ។ ទណ្ឌកម្មថ្នាក់ទី ១ និងទណ្ឌកម្មថ្នាក់ទី ២ ត្រូវអនុវត្តចំពោះមន្ត្រីរាជការដែលបានប្រព្រឹត្តផ្ទុយនឹងច្បាប់សហលក្ខន្តិកៈមន្ត្រីរាជការស៊ីវិល។
- ការចូលនិវត្តន៍ អាចឲ្យបេក្ខជនយល់ដឹងអំពីលក្ខខណ្ឌដែលមន្ត្រីរាជការត្រូវចូលនិវត្តន៍តាមប្រភេទក្របខ័ណ្ឌនីមួយៗ និងលក្ខខណ្ឌផ្សេងៗទៀតដែលមន្ត្រីរាជការអាចសុំចូលនិវត្តន៍មុនអាយុបាន។
ពាក់ព័ន្ធនឹងលក្ខន្តិកៈដោយឡែកនៃមន្ត្រីបច្ចេកទេសជាន់ខ្ពស់ សិក្ខាកាមបានស្តាប់អំពី៖
- បញ្ញត្តិទូទៅ អាចឲ្យបេក្ខជនយល់ដឹងអំពីប្រភេទក្របខ័ណ្ឌមន្ត្រីបច្ចេកទេសជាន់ខ្ពស់ ទិសដៅ និងឧបនិស្ស័យរបស់ក្របខ័ណ្ឌក្នុងពេលបំពេញការងារជាមន្ត្រីរាជការ។
- ឋានន្តរស័ក្តិ និងមុខតំណែង អាចឲ្យបេក្ខជនយល់ដឹងអំពីឋានន្តរស័ក្តិ នៅក្នុងក្របខ័ណ្ឌ និងថ្នាក់នៅក្នុងឋានន្តរស័ក្តិនីមួយ។ នៅក្នុងជំពូកនេះ ក៏បានបង្ហាញអំពីឧបនិស្ស័យដែលមន្ត្រីរាជការនៅក្នុងឋានន្តរស័ក្តិនីមួយៗ អាចទៅកាន់មុខតំណែងបាន។
- ការជ្រើសរើស អាចឲ្យបេក្ខជនយល់ដឹងអំពីលក្ខខណ្ឌក្នុងការជ្រើសរើសចូលបម្រើការងារជាមន្ត្រីបច្ចេកទេសជាន់ខ្ពស់។
- ការបណ្តុះបណ្តាលដំបូង កម្មសិក្សាសាកល្បង និងការតាំងស៊ប់ អាចឲ្យបេក្ខជនយល់ដឹងអំពីការបណ្តុះបណ្តាល ការធ្វើកម្មសិក្សា និងការតាំងស៊ប់ក្នុងក្របខ័ណ្ឌរបស់មន្ត្រីបច្ចេកទេសជាន់ខ្ពស់។
- ការដំឡើងថ្នាក់ និងដំឡើងឋានន្តរស័ក្តិ អាចឲ្យបេក្ខជនយល់ដឹងអំពីលក្ខខណ្ឌក្នុងការដំឡើងថ្នាក់ និងដំឡើងឋានន្តរស័ក្តិ និងលិខិតបទដ្ឋានដែលត្រូវសម្រេចក្នុងការដំឡើងថ្នាក់ និងឋានន្តរស័ក្តិទាំងនោះ។
- បទប្បញ្ញត្តិដោយឡែក អាចឲ្យបេក្ខជនយល់ដឹងអំពីការចូលនិវត្តន៍ និងការដំឡើងថ្នាក់នៅពេលត្រូវបានក្រសួងចាត់ឲ្យទៅទទួលការបំប៉ន ឬការបណ្តុះបណ្តាលជំនាញបន្ត ដែលមានរយៈពេលសរុបចាប់ពី ០១ ឆ្នាំឡើងទៅ ឬការទទួលបានសញ្ញាប័ត្រខ្ពស់ជាងសញ្ញាប័ត្រដែលខ្លួនបានប្រឡងចូល។
ឯកឧត្តម ថេង ច័ន្ទសង្វារ អនុរដ្ឋលេខាធិការ បានធ្វើបទបង្ហាញអំពីការរៀបចំ និងការប្រព្រឹត្តទៅរបស់ក្រសួងអភិវឌ្ឍន៍ជនបទ ជាអាទិអំពី ៖
1.ប្រវត្តិរបស់ក្រសួងអភិវឌ្ឍន៍ជនបទតាំងពីការកកើតជារដ្ឋលេខាធិការដ្ឋានអភិវឌ្ឍន៍ជនបទ រហូតដល់ការបង្កើតជាក្រសួងអភិវឌ្ឍន៍ជនបទ
2.ការវិវត្តន៍របស់រចនាសម្ព័ន្ធរបស់ក្រសួង ចាប់ពីឆ្នាំ ១៩៩៤ រហូតមកដល់បច្ចុប្បន្ន
3.តួនាទី និងភារកិច្ចរបស់អង្គភាពនីមួយៗ ក្រោមចំណុះក្រសួង រហូតដល់មន្ទីរអភិវឌ្ឍន៍ជនបទ រាជធានី ខេត្ត
4.បទពិសោធន៍ជាក់ស្តែងមួយចំនួនដែលក្រសួងបាន និងកំពុងអនុវត្តកន្លងមក។
នៅវេលាម៉ោង ៤ លា្ងច វគ្គបណ្តុះបណ្តាលទទួលបានកិត្តិយសដ៏ខ្ពង់ខ្ពស់ ដោយបានការអញ្ជើញចូលពីឯកឧត្តម ជា សុផារ៉ា រដ្ឋមន្ត្រីក្រសួងអភិវឌ្ឍន៍ជនបទ រួមជាអធិបតីក្នុងពិធីបិទ ។ ក្នុងមតិសំណេះសំណាល ឯកឧត្តមរដ្ឋមន្ត្រី បានផ្តាំឲ្យមន្ត្រីទាំងអស់ខិតខំ យកចិត្តទុកដាក់បម្រីសេវាជូនប្រជាជន ដោយស្មោះស ឲ្យស្របតាមគោលនយោបាយរបស់រាជរដ្ឋាភិបាល និងខិតខំការពារកិត្តិយសអង្គភាព និងស្ថាប័នរបស់ខ្លួនឲ្យក្លាយ និងសាក់សមជាមន្ត្រីជាមានវិសន័យ សីលធម៌ល្អ គោរពបានខ្ជាប់ខ្ជួននូវច្បាប់ និងសហលក្ខន្តិកៈមន្ត្រីរាជការ ។
អត្ថបទ៖ ខុទ្ទកាល័យ