កាលពីថ្ងៃទី ០៨ ខែមីនា ឆ្នាំ ២០១២ ឯកឧត្តម ជា សុផារ៉ា រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញជាអធិបតីក្នុងពិធីសំណេះសំណាលជាមួយគ្រូបង្រៀន ក្នុងឱកាសទិវានារីអន្តរជាតិ ៨ មិនា ខួបលើកទី១០១ ឆ្នាំ២០១២ នៅស្រុកក្រូចឆ្មារ និងស្រុកត្បូងឃ្មុំ ខេត្តកំពង់ចាម។ អញ្ជើញចូលរួមក្នុងពិធីនេះដែរ មានឯកឧត្តមបណ្ឌិត ហ៊ុន ម៉ាណែត នាយរងសេនាធិការចម្រុះ និងជាមេបញ្ជាការរងកងទ័ពជើងគោក លោក ហ៊ុន ម៉ានិត នាយករងខុទ្ទកាល័យសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លោកអភិបាលរងខេត្ត ព្រមទាំងឯកឧត្តម លោកជំទាវ ថ្នាក់ដឹកនាំក្រសួងអភិវឌ្ឍន៍ជនបទ មន្ត្រីរាជការអមសាលាខេត្ត និងសាលាស្រុកក្រូចឆ្មារ សាលាស្រុកត្បូងឃ្មុំ លោកគ្រូ អ្នកគ្រូ សរុបជាង ១៩០០ នាក់។
ឯកឧត្តម ជា សុផារ៉ា បានសំដែងនូវសេចក្តីសម្បាយរីរាយទិវាអន្តរជាតិនារី ៨មិនា ខួបលើកទី១០១ ក្រោមប្រធានបទ អ្នកម្តាយដ៏ឆ្នើមរបស់ខ្ញុំ ដែលជាការបង្ហាញពីព្រហ្មវិហារធម៌ មេត្តាធម៌ និងការស្រលាញ់ពីអ្នកម្តាយចំពោះកូន និងការគោរពដឹងគុណរបស់កូនៗចំពោះអ្នកម្តាយដ៏វិសេសវិសាលបំផុត។ ប្រពៃណីខ្មែរយើងបានឲ្យតម្លៃនិងលើកកម្ពស់នារីណាស់ក្នុងការចូលរួមគ្រប់កិច្ចការអភិវឌ្ឍន៍សង្គមជាតិ រហូតដល់មានពាក្យស្លោកថា នារីជាឆ្អឹងខ្នងនៃការអភិវឌ្ឍន៍ និងស៊ូបាត់បាកុំឲ្យបាត់មេ ស៊ូលិចទឹកកណ្តាលទន្លេកុំឲ្យភ្លើងឆេះផ្ទះ។ ឯកឧត្តមក៏បានសំដែងនូវការរីករាយជាពិសេសដែលបានជួបជុំលោកគ្រូ អ្នកគ្រូ ហើយបានវាយតំម្លៃខ្ពស់ចំពោះកិច្ចខិតខំប្រឹងប្រែងរបស់លោកគ្រូអ្នកគ្រូ ទាំងកំលាំងកាយ-ចិត្ត ប្រាជ្ញាស្មារតី រហូតដល់ទទួលបាននូវការគោរព ស្រលាញ់ និងការដឹងគុណពីប្រជាពលរដ្ឋ និងសង្គមជាតិទាំងមូល។ គ្រូមួយថ្ងៃ គឺគ្រូមួយជីវិត ហើយគ្រូជាមនុស្សដែលមានឥទ្ធិពលនឹងនៅជាប់នឹងប្រជាជនជាងគេបន្ទាប់ពីវត្តអារាម។
ទន្ទឹមនឹងការសម្បាយរីករាយ ឯកឧត្តមក៏បានរំលឹកថា គ្មានការអបអរសាទរអ្វីទេ បើយើងគ្មានសុខសន្តិភាព ស្ថិរភាពនយោបាយ និងការពារបាននូវមូរណៈភាពទឹកដី។ ការធ្វើឲ្យប្រទេសជាតិពីចំណុចសូន្យ ឈានទៅទទួលបានភាពសម្បូររុងរឿង និងការរីកចម្រើនគ្រប់វិស័យ ការពារបាននូវមូរណៈភាពដែនដី និងការឯកភាពជាតិ គឺជាសច្ចធម៌ប្រវត្តិសាសន៍ ដែលវាកើតឡើងពីនយោបាយឈ្នះ-ឈ្នះ និងការដឹកនាំដ៏ត្រឹមត្រូវបំផុតរបស់សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា។ ដើម្បីការពារបាននូវល្បឿននៃការរីកចម្រើនទាំងនេះ ឯកឧត្តមបានសំណូមពរឲ្យលោកគ្រូអ្នកគ្រូចូលរួមជាមួយរាជរដ្ឋាភិបាលក្នុងការកសាងប្រទេសយើងឲ្យកាន់តែប្រសើរតាមរយៈ៖ ១.ទៅចូលរួមបោះឆ្នោតឲ្យមានគ្រប់ៗគ្នា ទាំងខ្លួនឯង គ្រួសារ សាច់ញាតិ អ្នកជិតខាង និងមិត្តភក្តរបស់ខ្លួន ព្រោះឆ្នាំ២០០៨ អ្នកមិនទៅបោះឆ្នោត ២៦%ខេត្តកំពង់ចាម។ ២. អប់រំប្រជាពលរដ្ឋនៅមូលដ្ឋានឲ្យចេះគូសសន្លឹកឆ្នោតឲ្យបានត្រឹមត្រូវ ព្រោះសន្លឹកឆ្នោតខូច១៥០០០សម្លេងទូទាំងខេត្ត។ ៣. ចលនាយុវជន សិស្សានុសិស្ស ដែលគ្រប់អាយុឲ្យទៅចុះឈ្មោះបោះឆ្នោតនិងបោះឆ្នោតឲ្យបានគ្រប់គ្នា។ ៤. ជួយពិនិត្យឯកសារបោះឆ្នោតប្រជាពលរដ្ឋ ដើម្បីឲ្យពួកគាត់មានឯកសារគ្រប់គ្រាន់សម្រាប់បោះឆ្នោត។ ៥. ជួយដឹកនាំចាស់ជរា អ្នកគ្មានលទ្ធភាពទៅបោះឆ្នោត អ្នកនៅឆ្ងាយពីស្រុកភូមិឲ្យពួកគាត់បានទៅបោះឆ្នោតគ្រប់ៗគ្នា។ ៦. ជួយការពារសច្ចធម៌ចំពោះជនអគតិទាំងឡាយដែលបំផ្លើសការពិត ជាពិសេសអ្នកប្រជាធិបតេយ្យក្លែងក្លាយ និងអ្នកស្រលាញទឹកដីតែបបូរមាត់ តែវ៉ាលីរៀបចំជាស្រេចនៅនឹងជើង។
ឆ្លៀតក្នុងឱកាសនោះ ឯកឧត្តម ជា សុផារ៉ាបានអញ្ជើញឯកឧត្តម បណ្ឌិត ហ៊ុន ម៉ាណែត ឡើងមកជម្រាបសួរ និងមានមតិសំណេះសំណាលជាមួយលោកគ្រូអ្នកគ្រូ។ ឯកឧត្តមបណ្ឌិត បានចូលរួមអបអរទិវានារីអន្តរជាតិ ៨ មិនា ដែលជាទិវារំលឹកគុណម្តាយ និងមាតាពិភពលោក។ ឯកឧត្តមបានបន្ថែមថា គុណគ្រូ និងគុណម្តាយគឺមានទំហំធំធេងណាស់។ គ្រូគឺពិតជាមនុស្សដែលមានឥទ្ធិពល មានតម្លៃ និងមានសារសំខាន់ណាស់សម្រាប់ប្រជាពលរដ្ឋ។ គ្រូគឺជាឱពុកម្តាយទីពីរ ព្រោះឱពុកម្តាយយើងជាអ្នកផ្តល់នូវរូបសម្បត្តិ ហើយគ្រូជាអ្នកផ្តល់នូវចរិយាសម្បត្តិ។ គ្រូគឺជាអ្នកជួយអប់រំ ណែនាំ ពីការទទួលយកឥទ្ធិពលមិនល្អនៃការអភិវឌ្ឍន៍ ជាពិសេសពីការចម្លងវប្បធម៌បរទេសជ្រុលហួសហេតុ។ ជាចុងក្រោយឯកឧត្តម ក៏បានសំណូមពរឲ្យលោកគ្រូអ្នកគ្រូបន្តគាំទ្រ គណបក្យប្រជាជន និងរួមគ្នាជាមួយរាជរដ្ឋាលភិបាល ដើម្បីកសាងប្រទេសជាតិយើងឲ្យកាន់តែសម្បូររុងរឿង។
អត្ថបទលោក ហោ ចាន់រដ្ឋា