នៅថ្ងៃទី ២១ ខែកុម្ភៈ ឆ្នាំ ២០១២ នៅសាលសន្និសីទចតុមុខ វេលាម៉ោង ៨.០០ព្រឹក ដល់ ១៧.១០ ល្ងាច មានរៀបចំ សន្និបាតបូកសរុបការងារឆ្នាំ២០១១ និងទិសដៅការងារឆ្នាំ២០១២ របស់ក្រសួងអភិវឌ្ឍន៍ជនបទ។ពិធីបើកសន្និបាតបានប្រព្រឹត្តទៅក្រោមអធិបតីភាពឯកឧត្តម យឹម ឆៃលី ឧបនាយករដ្ឋមន្រ្តី និងជាប្រធានក្រុមប្រឹក្សាស្តារអភិវឌ្ឍន៍វិស័យកសិកម្មនិងជនបទ និងជាតំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងប្រារព្ធពិធីបិទក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជជាណាចក្រកម្ពុជា។ អញ្ជើញចូលរួមជាកិត្តិយសក្នុងពិធីនោះ មានឯកឧត្តម លោកជំទាវ ជាសមាជិក សមាជិការាជរដ្ឋាភិបាល ថ្នាក់ដឹកនាំ និងមន្រ្តីជាន់ខ្ពស់គ្រប់ក្រសួងស្ថាប័ន រាជធានី-ខេត្ត តំណាងដៃគូរអភិវឌ្ឍន៍ អង្គការជាតិ អន្តរជាតិ មន្ត្រីរាជការក្រសួងអភិវឌ្ឍន៍ជនបទ ប្រមាណ ៨០០ នាក់ ។
ថ្លែងសុន្ទរកថាស្វាគមន៍ក្នុងឱកាសបើកសន្និបាត ឯកឧត្តម ជា សុផារ៉ា រដ្ឋមន្ត្រីក្រសួងអភិវឌ្ឍន៍ជនបទ បានបញ្ជាក់ថា ក្រសួងអភិវឌ្ឍន៍ជនបទ បានខិតខំជំនះនូវរាល់ឧបសគ្គគ្រប់បែបយ៉ាង ក្នុងការអនុវត្តនូវទិសដៅ និងភារកិច្ចរបស់ខ្លួន ដោយសម្រេចបាននូវសមិទ្ធផលសំខាន់ៗជាច្រើនដូចជា អភិបាលកិច្ចល្អ ការអនុវត្តច្បាប់ហិរញ្ញវត្ថុសម្រាប់គ្រប់គ្រងថវិកាប្រចាំឆ្នាំ ការប្រើប្រាស់ជំនួយហិរញ្ញប្បទានសហប្រតិបត្តិការលើវិស័យអភិវឌ្ឍន៍ជនបទ ការកសាង និងអភិវឌ្ឍហេដ្ឋារចនាសម្ព័ន្ធផ្លូវជនបទ ការផ្គត់ផ្គង់ទឹកជនបទ និងថែទាំសុខភាពជនបទ ការងារអភិវឌ្ឍសហគមន៍ ការកសាងសមត្ថភាពនិងការអភិវឌ្ឍធនធានមនុស្ស ការងារអភិវឌ្ឍសេដ្ឋកិច្ចជនបទ វិស័យអភិវឌ្ឍន៍ជនជាតិដើមភាគតិច និងការអនុវត្តគម្រោងអភិវឌ្ឍន៍ នៅតាមបណ្តោយព្រំដែនទិសខាងលិច និងខាងជើងនៃព្រះរាជាណាចក្រកម្ពុជា ។
ថែ្លងក្នុងឱកាសបើកអង្គសន្និបាត ឯកឧត្តម យឹម ឆៃលី ឧបនាយករដ្ឋមន្រ្តី និងជាប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ តំណាងដល់ខ្ពង់ខ្ពស់សម្តេចតេជោនាយករដ្ឋមន្រ្តី បានធ្វើការវាយតម្លៃខ្ពស់ និងកោតសរសើរយ៉ាងជ្រាលជ្រៅដល់ ឯកឧត្តម ជា សុផារ៉ា និងថ្នាក់ដឹកនាំ មន្រ្តីរាជការទាំងអស់ នៃក្រសួងអភិវឌ្ឍន៏ជនបទ ដែលបានអនុវត្តដោយជោគជ័យ និងទទួលបាននូវសមិទ្ធផលជាច្រើនក្នុងឆ្នាំ២០១១ កន្លងមក។ ទន្ទឹមនេះឯកឧត្តមឧបនាយករដ្ឋមន្រ្តី បានផ្តល់អនុសាសន៏ចំនួន ៤ ចំណុច ដើម្បីធ្វើជាមូលដ្ឋាននៅក្នុងការពិចារណា និងពិភាក្សា នៅក្នុងកិច្ជប្រជុំសន្និបាតរយៈពេល ០១ ថ្ងៃនេះ ។
នាឱកាសបិទសន្និបាត សម្តេចតេជោនាយករដ្ឋមន្រ្តី បានលើកឡើងនូវអនុសាសន៍ចំនួន ៧ ចំណុច៖
ទី១.ក្រសួងអភិវឌ្ឍន៍ជនបទ និង ក្រសួង-ស្ថាប័នញក់ព័ន្ធ ព្រមទាំងឤជ្ញាធរគ្រប់លំដាប់ថ្នាក់ត្រូវបន្តខិតខំជំរុញកសាងផ្លូវជនបទ និង ស្វែងរកជំនួយហិរញ្ញប្បទាននានា ដើម្បីកែលម្អផ្លូវជនបទ ដោយប្តូរមកក្រាល កៅស៊ូប្រភេទពីរជាន់ (DBST) វិញ ។ ពីញ្រេះថា កន្លងមកយើងមានកញ្ចប់ថវិកា សម្រាប់ថែទាំផ្លូវជនបទ ជា លក្ខណៈខួប និង ប្រចាំ ប៉ុន្តែគុណភាពនៃផ្លូវជនបទរបស់យើង នៅតែងាយឆាប់ខូចទៅវិញដែលជាហេតុតម្រូវ ឱ្យយើងចំណាយថវិកាយ៉ាងច្រើនលើការជួសជុល ។ នៅក្នុងចំណុចនេះបញ្ជាក់ថា រដ្ឋត្រូវធានាដល់ការកសាង ផ្លូវ ស្ពាន និង ហេដ្ឋារចនាសម្ព័ន្ធរូបវន្ត គាំទ្រការអភិវឌ្ឍសង្គម-សេដ្ឋកិច្ចដែលកិច្ចការទាំងអស់នេះ មិនត្រឹម តែបម្រើដល់ការរស់នៅរបស់ប្រជាជនប៉ុណ្ណោះទេ ប៉ុន្តែគឺជាឈ្នាន់ដល់ការរីកលូតលាស់នៃវិស័យឯកជន ដែលនឹងបន្តអូសទាញដល់កំណើនសេដ្ឋកិច្ចជាតិទាំងមូលទៀតផង ។ ក្នុងន័យនេះ ខ្ញុំយល់ថា តំបន់ជនបទមួយចំនួនមានសក្តានុពលសេដ្ឋកិច្ចខ្ពស់ ដែលចាំបាច់ត្រូវជំរុញ និង លើកទឹកចិត្តឱ្យមានការចូលរួមពីវិស័យឯកជនលើ ការងារកសាងហេដ្ឋារចនាសម្ព័ន្ធរូបវន្តនេះ តាមកម្មវិធីការចូលរួមរបស់ឯកជនក្នុងផ្នែកហេដ្ឋារចនាសម្ព័ន្ធ(PPI) និង ភាពជាដៃគូនៃវិស័សាធារណៈ និង ឯកជន (PPP) ដែលជាយន្តការនៃការកៀរគរធនធាន សម្រាប់បង្កើន ការវិនិយោគ បង្កើនផលិតភាព និង បង្កើនល្បឿនដល់កិច្ចអភិវឌ្ឍ ។ ចំញេះមុខនេះ ក្រសួងអភិវឌ្ឍន៍ជនបទ ក្រសួង-ស្ថាប័នញក់ព័ន្ធ ឤជ្ញាធរដែនដី ត្រូវបន្តទាក់ទាញ និងកៀរគរវិស័យឯកជនឱ្យចូលរួមធ្វើកិច្ចការនេះ បានផុលផុស ក្នុងស្មារតីម្ចាស់ការ និង ការទទួលខុសត្រូវខ្ពស់ ។
ទី២.ក្រសួងអភិវឌ្ឍន៍ជនបទត្រូវបន្តជំរុញលើកកម្ពស់វិស័យផ្គត់ផ្គង់ទឹកស្អាត និង អនាម័យតាមផែនការ ដែលបានកំណត់ដោយសហការជាមួយក្រសួង-ស្ថាប័នពាក់ព័ន្ធ ស្របតាមគោលនយោបាយជាតិស្តីពី ការផ្គត់ផ្គង់ទឹកជនបទដែលបានលើកឡើងថាមនុស្សគ្រប់រូបត្រូវទទួលបានសេវាផ្តល់ទឹកស្អាត និង អនាម័យ និង រស់នៅក្នុងបរិស្ថានប្រកបដោយអនាម័យនៅឆ្នាំ ២០២៥ និង គោលដៅអភិវឌ្ឍន៍សហស្សវត្សរ៍កម្ពុជា ដែលបានកំណត់ថានៅឆ្នាំ ២០១៥ ប្រជាពលរដ្ឋ ៥០% ដែលរស់នៅតំបន់ជនបទមានសេវាទឹកស្អាតប្រើប្រាស់ និងប្រជាពលរដ្ឋ ៣០% ដែលរស់នៅតំបន់ជនបទមានសេវាអនាម័យល្អ ។
ទី៣.ក្រសួងអភិវឌ្ឍន៍ជនបទត្រូវផ្តោតការយកចិត្តទុកដាក់ថែមទៀត លើការងារកំណែទម្រង់រដ្ឋបាល និង ការលើកកម្ពស់សមត្ថភាព ក្នុងនោះរួមមានការពង្រឹង និង បំពេញបន្ថែមនូវការិយាល័យអភិវឌ្ឍន៍ជនបទ ថ្នាក់ស្រុក ក្រុង និងខណ្ឌ ការអភិវឌ្ឍសមត្ថភាពស្ថាប័នក្រោមឱវាទ ការបណ្តុះបណ្តាលទាំងមន្ត្រីរាជការ និង ប្រជាជននៅតាមជនបទ តាមរយៈ ការពិចារណាបង្កើតឡើងនូវមជ្ឈមណ្ឌលបណ្តុះបណ្តាល ឬ វិទ្យាស្ថាន អភិវឌ្ឍន៍ជនបទ ទាំងនៅថ្នាក់ជាតិ និង ថ្នាក់ក្រោមជាតិជាដើម ។
ទី៤.ក្រសួងអភិវឌ្ឍន៍ជនបទត្រូវយកចិត្តទុកដាក់លើការស្តារប្រឡាយជួសជុលផ្លូវក្នុងភូមិ ជីកស្រះ ផ្តល់ពូជសត្វ ពូជឈើហូបផ្លែ ពូជគ្រាប់ធញ្ញជាតិនានា និង បន្តធ្វើកិច្ចសហប្រតិបត្តិការជាមួយដៃគូអភិវឌ្ឍន៍ និង អង្គការ សមាគមនានា ដើម្បីផ្តល់ឥណទានជនបទដល់ខេត្តដទៃទៀត ក្រៅពីខេត្តគោលដៅដែលបាន និង កំពុងប្រតិបត្តិការ ។ នៅចំណុចនេះ ក្រសួងអភិវឌ្ឍន៍ជនបទត្រូវរកវិធីធ្វើឱ្យផលិតកម្មខ្នាតតូច ត្រូវមានលក្ខណៈ បំពេញឱ្យគ្នាជាមួយគម្រោងវិនិយោគធំៗ ដែលនឹងធ្វើឱ្យកិច្ចការមួយចំនួនត្រូវបានភ្ជាប់គ្នាជាស្វ័យប្រវត្តិ និង កាត់បន្ថយនូវបន្ទុករបស់រដ្ឋមួយចំនួន ។
ទី៥.ក្រសួងអភិវឌ្ឍន៍ជនបទ និង គណៈកម្មការអន្តរក្រសួងត្រូវខិតខំប្រឹងប្រែងបន្តជំរុញការអភិវឌ្ឍ ព្រំដែនទិសខាងលិច និង ខាងជើងនៃព្រះរាជាណាចក្រកម្ពុជា ឱ្យទទួលបានជោគជ័យដោយធ្វើកិច្ចសហការ ជាមួយក្រសួង-ស្ថាប័នញក់ព័ន្ធ វិស័យឯកជន សង្គមស៊ីវិល និង សប្បុរសជននានា ក្នុងនោះរួមមាន ការ អភិវឌ្ឍន៍ហេដ្ឋារចនាសម្ព័ន្ធរូបវ័ន្ត បណ្តាញផ្គត់ផ្គង់ទឹកស្អាត និង អនាម័យជនបទ អគ្គិសនី ការអភិវឌ្ឍកសិកម្ម ទេសចរណ៍ សុខាភិបាល អប់រំ និង ការបង្កើតមុខរបរជូនប្រជាពលរដ្ឋ ។ ចំណុចនេះ ជាគំរូមួយនៃការអភិវឌ្ឍ សេដ្ឋកិច្ចជនបទ សម្រាប់តំបន់ដទៃទៀត ដោយប្រែក្លាយតំបន់ជនបទមួយ ឱ្យទៅជាទីប្រជុំជន និង ប៉ូលនៃ ផលិតកម្ម ។
ទី៦.ក្រសួងអភិវឌ្ឍន៍ជនបទត្រូវបន្តរៀបចំឱ្យមាន និង អនុវត្តឱ្យបានជោគជ័យនូវផែនការយុទ្ធសាស្ត្រ អភិវឌ្ឍន៍ជនបទ ឯកសារគោលនយោបាយស្តីពីផ្លូវជនបទ គោលការណ៍ណែនាំស្តីពីការលើកកម្ពស់ការប្រតិបត្តិ អនាម័យតាមសហគមន៍ជនបទ យុទ្ធសាស្ត្រជាតិស្តីពីវិស័យផ្គត់ផ្គង់ទឹកស្អាត និង អនាម័យជនបទ វិធាននៃការ បង្កើត និង ការប្រព្រឹត្តទៅរបស់គណៈកម្មាធិការអភិវឌ្ឍន៍ភូមិព្រមទាំងគោលការណ៍នៃការប្រើប្រាស់ទឹក ពីទន្លេ មេគង្គ និង ទន្លេសាប សម្រាប់គោលដៅនៃការអភិវឌ្ឍន៍ជនបទ ។
ទី៧.ក្រសួងអភិវឌ្ឍន៍ជនបទ និង ក្រសួង-ស្ថាប័នញក់ព័ន្ធត្រូវូសហការគ្នាក្នុងការបង្កើនការវិនិយោគ សាធារណៈក្នុងការអភិវឌ្ឍជនបទ និង កសិកម្ម ការស្រាវជ្រាវ និង សេវាផ្សព្វផ្សាយ ដោយផ្តោតការយកចិត្ត ដាក់ទៅលើការបង្កើនការដាំដុះ តាមរយៈ ការបង្កើនជំនាញ និង សមត្ថភាពរបស់សហគ្រាសកសិកម្ម និង សហគ្រាសមានមូលដ្ឋានកសិកម្ម ការលើកកម្ពស់ប្រសិទ្ធភាពប្រព័ន្ធស្រោចស្រព ដែលគ្រប់គ្រង និង កាន់កាប់ ដោយកសិករ និង ការជំរុញសេវាមីក្រូហិរញ្ញវត្ថុជាដើម ។ ចំញេះមុខ កិច្ចការទាំងអស់ ត្រូវមានមូលដ្ឋានតាម សូចនាករ និង ត្រូវចងក្រងប្រព័ន្ធទិន្នន័យ ដើម្បីតាមដាន និង វាយតម្លៃពីវឌ្ឍនភាព និង ការអភិវឌ្ឍកម្មវិធីថ្មីៗ ទៀត ។
ជាមួយគ្នានេះ សម្តេចតេជោបានអំពាវនាវដល់គ្រប់ដៃគូអភិវឌ្ឍន៍ អង្គការមិនមែនរដ្ឋាភិបាល សង្គមស៊ីវិល និងវិស័យឯកជនទាំងអស់ សូមបន្ត ជួយគាំទ្រ និង ចូលរួមចំណែកបន្ថែមទៀតជាមួយរាជរដ្ឋាភិបាល និង ប្រជាជនកម្ពុជា ដើម្បីឤចឱ្យយើងឈាន ទៅម្ចាស់ការបានដោយជោគជ័យ ក្នុងការអភិវឌ្ឍន៍សង្គម-សេដ្ឋកិច្ចជាតិបន្ថែមទៀត ។
អត្ថបទឯកឧត្តម ឧិម សំអ៊ែល ទីប្រឹក្សាអមក្រសួង