ឯកឧត្តម សាន វិសាល អនុរដ្ឋលេខាធិការ និងជាតំណាង ឯកឧត្ដម ជាសុផារ៉ា រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញជាគណៈអធិបតី ក្នុងពិធីបើកវគ្គបណ្ដុះបណ្ដាល ស្ដីពីជំនាញការសរសេរគម្រោងសំណើ នៅមន្ទីរអភិវឌ្ឍន៍ជនបទខេត្តព្រៃវែង នាព្រឹកថ្ងៃទី ០១ ខែសីហា ឆ្នាំ ២០១១ ដល់មន្ត្រីរាជការមកពីខេត្តស្ទឹងត្រែង ខេត្តរតនគិរី ខេត្តមណ្ឌលគីរី ខេត្តក្រចេះ ខេត្តព្រៃវែង ខេត្តស្វាយរៀង ខេត្តកំពង់ចាម រាជធានីភ្នំពេញ និងនាយកដ្ឋានថ្នាក់កណ្ដាល ដែលក្នុងមួយលើកមានសិក្ខាកាម ២៥ នាក់ ទៅ ៣០ នាក់ ។
លោក លាភ សំណាង ប្រធាននាយកដ្ឋានបណ្តុះបណ្តាល និងស្រាវជ្រាវ បានធ្វើសេចក្ដីរាយការណ៍ថា វគ្គបណ្ដុះបណ្ដាលនេះគឺជាលើកទី ៣ ហើយ ដែលនាយកដ្ឋានបណ្ដុះបណ្ដាល និងស្រាវជ្រាវ បានរៀបចំឡើង ដើម្បីឆ្លើយតបទៅនិងគោលបំណង និងសេចក្ដីសម្រេចសន្និបាតបូកសរុបការងារឆ្នាំ ២០១០ និងទិសដៅការងារឆ្នាំ ២០១១ របស់ក្រសួងអភិវឌ្ឍន៍ជនបទ ក៏ដូចជាសំណូមពររបស់មន្ត្រីនៃមន្ទីរអភិវឌ្ឍន៍ជនបទ រាជធានី ខេត្ត ទាំង ២៤ តាមរយៈការវាយតម្លៃតម្រូវការបណ្ដុះបណ្ដាល ឆ្នាំ ២០១០ ។ ក្នុងឆ្នាំ ២០១១ នេះ នាយកដ្ឋានបានរៀបចំវគ្គចំនួន ២ មាន ៦ លើក។ វគ្គទី ១ ស្ដីពីការធ្វើផែនការបណ្ដុះបណ្ដាល និងវគ្គទី ២ ជំនាញការសរសេរគម្រោងសំណើ។ វគ្គបណ្ដុះបណ្ដាលទាំង ២ នេះមានលក្ខណៈទាក់ទងគ្នា ហើយនៅជំហានចុងក្រោយ បានទៅដល់ភូមិភាគឥសាន នាយកដ្ឋានបានរៀបចំចាប់ផ្ដើមនៅតំបន់ភ្ជាប់មាត់សមុទ្រដោយខេត្តកំពត និងតំបន់ជុំវិញទន្លេសាប នៅខេត្តកំពង់ឆ្នាំង។
នៅក្នុងឱកាសពិធីបើកវគ្គបណ្ដុះបណ្ដាលនេះ ឯកឧត្តម សាន វិសាល បានមានមតិលើកសរសើរចំពោះ សិក្ខាកាមដែលមានវត្តមានក្នុងវគ្គបណ្ដុះបណ្ដាល ស្ដីពីជំនាញការសរសេរគម្រោងសំណើនេះថា វគ្គនេះគឺមានសារសំខាន់ណាស់ ដែលនាយកដ្ឋានបណ្ដុះបណ្ដាលនិងស្រាវជ្រាវ បានអនុវត្តតាមការណែនាំ និងចង្អុលបង្ហាញពី ឯកឧត្ដមរដ្ឋមន្ត្រី មកបំពាក់បំប៉នដល់មន្ត្រីរាជការ ដែលកំពុងអនុវត្តផ្ទាល់ ដើម្បីឲ្យដំណើរការងាររបស់ក្រសួងអនុវត្តទៅបានដោយរលូន ស្របតាមទិសដៅ និងយុទ្ធសាស្ត្ររបស់រាជរដ្ឋាភិបាល ដែលមាន សម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ដើម្បីលើកទាំងកម្ពស់ស្មារតី និងពង្រឹងសម្ថភាពធនធានមន្ត្រីរាជការឲ្យបានល្អប្រសើរពីមួយឆ្នាំ ទៅមួយឆ្នាំ ក្នុងការចេះលើកគម្រោងសំណើ។ គួបផ្សំទាំងអ្នកសម្របសម្រួលបានលើកយកប្រធានបទជាច្រើនយកមកធ្វើការបង្ហាត់បង្រៀនដោយមានវិធីស្រាស្ត្រថ្មីៗ ដូចជាការបែងចែកក្រុមពិភាគ្សា សំណួរបំផុស គំនិតក្នុងក្រុមការឡើង ធ្វើបទបង្ហាញដើម្បីឲ្យសិក្ខាកាមងាយយល់ និងចងចាំបានល្អ ។ ឯកឧត្តមបានផ្វើការផ្ដាំផ្ញើដល់សិក្ខាកាមទាំងអស់យកចិត្តទុកដាក់សន្សំចំណេះដឹង ដែលបានមកពីការបណ្ដុះបណ្ដាលនេះ ទទួលបានទាំងប៉ុន្មាន ទៅចែករំលែកបន្ត ដល់មន្ត្រីរាជការដែលពុះទាន់បានចូលរៀនវគ្គបណ្ដុះបណ្ដាលនេះ។
នៅក្នុងពិធីបិទវគ្គ លោក លាភ សំណាង ប្រធាននាយកដ្ឋានបណ្តុះបណ្ដាល និងស្រាវជ្រាវ និងជាប្រធានគ្រប់គ្រងវគ្គបញ្ជាក់ថាវគ្គបណ្ដុះបណ្ដាល ស្ដីពីការអភិវឌ្ឍធនធានមនុស្ស ត្រូវបានចប់ក្នុងរយៈពេល ៤ ថ្ងៃមក គឺចាប់ពីថ្ងៃទី០៨ ដល់ថ្ងៃទី ១១ ខែមិថុនា ឆ្នាំ ២០១១ សិក្ខាកាមទាំងអស់ និងត្រូវចូលរៀនបន្តមួយវគ្គទៀត ស្ដីអំពីការបណ្ដុះបណ្ដាលគ្រូបង្គោល (TOT) នៅខែក្រោយដើម្បីឲ្យសិក្ខាកាមមានលក្ខណៈសម្បតិ្តអាចបំពេញការងារបាន ហើយនាយកដ្ឋានបណ្តុះបណ្ដាល និងស្រាវជ្រាវ និងចុះតាមអង្គភាព ដើម្បីណែនាំនូវចំណុចខ្វះខាត ។នៅពេលបញ្ចប់វគ្គ ក្នុងពិធីបិទនោះផងដែរ តំណាងសិក្ខាកាមបានឡើងប្ដេជ្ញាចិត្ត និងយកចំណេះដឹងដែលទទួលបានពីវគ្គបណ្ដុះបណ្ដាលរយៈពេល ៤ ថ្ងៃកន្លងមក យកទៅអនុវត្តតាមអង្គភាពរបស់ខ្លួន និងធ្វើការបណ្ដុះបណ្តាលបន្តដល់មន្ត្រីផ្សេងៗទៀត ដែលពុំទាន់បានការបណ្ដុះបណ្ដាល ធ្វើយ៉ាងណាខិតខំយកចិត្តទុកដាក់ និងធ្វើឲ្យសម្រេចនូវគោលនយោបាយរបស់ក្រសួងអភិវឌ្ឍន៍ជនបទ។
អត្ថបទៈ លោកស្រី កេត ផាន់ណា