ក្រសួងអភិវឌ្ឍន៍ជនបទរៀបចំពិធីបើកការដ្ឋានសាងសង់អាងស្តុកទឹក
និងប្រពន្ធ័ធារាសាស្ត្រ ក្នុងឃុំរការខ្នុរ ស្រុកក្រូចឆ្មារ ខេត្តកំពង់ចាម
ក្រសួងអភិវឌ្ឍន៍ជនបទ រៀបចំពិធីបើកការដ្ឋានសាងសង់អាងស្តុកទឹក និងប្រពន្ធ័ធារាសាស្ត្រ ក្នុងឃុំរកាខ្នុរ ស្រុកក្រូចឆ្មារ ខេត្តកំពង់ចាម នៅព្រឹកថ្ងៃសៅរ៍ទី ២៦ ខែកុម្ភៈ ឆ្នាំ២០១១ នេះ ក្រោមអធិបតីភាព ឯកឧត្តម ជា សុផារ៉ា រដ្ឋមន្ត្រីក្រសួងអភិវឌ្ឍន៍ជនបទ ដោយមានការ ចូលរួមដោយលោកបណ្ឌិត Shin Eui Cheol ប្រធានតំណាង KOICA ប្រចាំកម្ពុជា ឯកឧត្តម លន់ លឹមថៃ អភិបាលរងខេត្តកំពង់ចាម ជាតំណាងឯកឧត្តម ហ៊ុន ណេង អភិបាលនៃគណៈ អភិបាលខេត្តកំពង់ចាម មន្ត្រីក្រសួងអភិវឌ្ឍន៍ជនបទ មន្ត្រីសាលាខេត្តកំពង់ចាម មន្ត្រីថ្នាក់ស្រុក ថ្នាក់ឃុំ ប្រធានភូមិ ព្រមទាំងប្រជាពលរដ្ឋ ដែលជាអ្នកទទួលផលសរុបចំនួន ៦០០ នាក់។
អាងស្តុកទឹក ដែលអាចផ្ទុកទឹកបាន ២,៨ លានម៉ែត្រគូប នឹងត្រូវបានសាងសង់ឡើង ក្នុង គោលបំណងដើម្បីធ្វើការស្រោចស្រពលើផ្ទៃដីកសិកម្ម។ ទំនប់អាងស្តុកទឹកនេះ មានប្រវែង ៤៨០០ ម៉ែត្រ កំពស់ ២ ម៉ែត្រ ទទឹងខ្នងលើប្រវែង ៤ ម៉ែត្រ។ ក្រោយពីសាងសង់អាងស្តុកទឹកនេះ រួចផ្ទៃដីកសិកម្មជាង ១០០៧ ហិចតា នឹងត្រូវបានស្រោចស្រព តាមរយៈអាងស្តុកទឹកបឹងធំ។ លើសពីនេះទៀត ប្រពន្ធ័ប្រឡាយថ្មីមួយ ដែលមានប្រវែង ២៦០០ ម៉ែត្រ នឹងត្រូវបានសាងសង់ ដើម្បីរំដោះទឹកចេញពីអាងស្តុកទឹក ទៅទន្លេមេគង្គ នៅពេលទឹកឡើងជន់លិច ហើយប្រឡាយ នេះនឹងត្រូវប្រើប្រាស់ជាប្រឡាយស្រោចស្រព នារដូវប្រាំង។
គួរកត់សំគាល់ថា ការកសាងអាងស្តុកទឹក និងប្រពន្ធ័ធារាសាស្ត្រនេះ ស្ថិតក្នុងគម្រោង អភិវឌ្ឍន៍ជនបទចម្រុះ ក្នុងស្រុកក្រូចឆ្មារ ខេត្តកំពង់ចាម ដែលអនុវត្តរយៈពេល ២០ ខែ ចាប់ពី ខែសីហា ឆ្នាំ២០១០ ដល់ខែមីនា ឆ្នាំ២០១។
គម្រោងនេះនឹងសាងសង់ផ្លូវក្រាលគ្រួលក្រហមចំនួន ២ខ្សែ ទីមួយគឺផ្លូវចូលពីភូមិទី ៦ ឆ្ពោះទៅកាន់អាងស្តុកទឹកបឹងធំ ដែលមានប្រវែង ១០៥០ ម៉ែត្រ និងទទឹង ៤ ម៉ែត្រ ។ ផ្លូវមួយខ្សែ ទៀតជាផ្លូវចំការ ដែលមានប្រវែង ១៨០០ ម៉ែត្រ និងទទឹង ៤ ម៉ែត្រ តភ្ជាប់ពីដីចំការទៅទ្វារទឹក ទី២ នៃអាងស្តុកទឹកបឹងធំ ។
ដើម្បីអោយមានអត្រានៃការផ្គត់ផ្គង់ទឹកស្អាត និងអនាម័យ គ្របដណ្តប់ទូទាំងឃុំ ១០០% និង ធានាការផ្គត់ផ្គង់ទឹកសម្រាប់កសិកម្ម គម្រោងនឹងសាងសង់អណ្តូងស្នប់ចំនួន ២៩ និងបង្គន់ អនាម័យតាមគ្រួសារ ចំនួន ៦៣៥ ផងដែរ។
ដោយឡែកគម្រោងផ្គត់ផ្គង់ទឹកស្អាត និងអនាម័យជនបទ ក្រោមថវិកាបង្វែរពីការសង មូលនិធិរូបិយវត្ថុអន្តរជាតិ (IMF) ក៏បានសាងសង់ស្រះទឹកចំនួន ២ ផ្លូវចូលស្រះចំនួន ២ ខ្សែ ផ្តល់ពាងទឹកជូនប្រជាពលរដ្ឋ ចំនួន ៥០ពាង សាងសង់បង្គន់អនាម័យតាមគ្រួសារចំនួន ៦០០ និងបង្គន់សាធារណៈចំនួន ៥កន្លែង ។
បច្ចេកវិទ្យាកសិកម្មថ្មីៗ ត្រូវបានដាក់បញ្ចូលសម្រាប់កសិករ ក្នុងទីតាំងគម្រោងនេះ លើ ដំណាំកសិកម្ម ដូចជា ស្រូវ ពោត ល្ង និងថ្នាំជក់។ ក្នុងទិសដៅបង្កើនបរិស្ថានអប់រំល្អ ដល់សាលា រៀន គម្រោងបានផ្តល់សម្ភារៈសិក្សាមួយចំនួន ដូចជា កុំព្យូទ័រ ម៉ាស៊ីនព្រីន សៀវភៅអាន តុ និង កៅអី ដល់សាលាបឋមសិក្សា ជា ចក ដែលមានទីតាំងនៅក្នុងភូមិទី ៥ ។ ក្រៅពីនេះគម្រោង នឹងសាងសង់ទីកន្លែងពិនិត្យបរិស្ថានវិទ្យា មួយកន្លែង ទំហំដី ១ ហិចតា សាងសង់ប្រព័ន្ធផ្គត់ផ្គង់ ទឹកស្អាត ដោយដាក់ធុងស្តុកទឹកចំណុះ ៥០០០ លីត្រ ដែលមានបំពាក់ម៉ូទ័របូមទឹក ប្រើដោយ ថាមពលពន្លឺព្រះអាទិត្យ ។
អង្គភាពគ្រប់គ្រងគម្រោង
