អនុវត្តតាមស្មារតីនៃកិច្ចប្រជុំលើកទី ៤ របស់គណៈកម្មការអន្តរក្រសួងដើម្បីសម្របសម្រួលរៀបចំ និង អនុវត្តគម្រោងអភិវឌ្ឍ នៅតាមបណ្ដោយព្រំដែនទិសខាងលិច និងខាងជើង នៃព្រះរាជាណាចក្រកម្ពុជាកាលពី រសៀលថ្ងៃទី ១០ ខែឧសភា ឆ្នាំ ២០១០ គណៈប្រតិភូគណៈកម្មការអន្តរក្រសួងដឹកនាំដោយឯកឧត្ដម ជា សុផារ៉ា រដ្ឋមន្រ្តីក្រសួងអភិវឌ្ឍន៍ជនបទ និងជាប្រធានគណៈកម្មការអន្តរក្រសួង បានអញ្ជើញចូលរួមជាគណៈអធិបតី ក្នុងពិធីប្រគល់ពូជដំណាំ និងបន្លែដល់គ្រួសារយោធិន និងនគរបាល នៅក្នុងភូមិសែនរុងរឿង៥ ឃុំទឹកក្រហម ស្រុកជាំក្សាន្ត ខេត្តព្រះវិហារ នៅថ្ងៃទី ១២ ខែឧសភា ឆ្នាំ ២០១០ ។ គណៈប្រតិភូដែលបានអញ្ជើញចូលរួមក្នុង ពិធីនោះរួមមាន ឯកឧត្តមនាយឧត្តមសេនីយ៍ គន់ គីម អគ្គមេបញ្ជាការរងនៃកងយោធពលខេមរភូមិន្ទ ឯកឧត្តមនាយឧត្តមសេនីយ៍ ជា តារា អគ្គមេបញ្ជាការរងនៃកងយោធពលខេមរភូមិន្ទ ឯកឧត្តម ឧ.ឯក ឈិន ច័ន្ទពណ៌ មេបញ្ជាការសមរភូមិទិស ឧត្ដរមានជ័យ ឯកឧត្តម ឧ.ទោ ស្រី ឌឹក មេបញ្ជាការកងពលធំអន្តរាគមន៍លេខ ៣ ឯកឧត្តម ឧ.ត្រី គល់ វ៉ៃ មេបញ្ជាការកងពលតូចអន្តរាគមន៍លេខ ៩ ព្រមទាំងឯកឧត្តម អស់លោក ជាក្រុមការងារលេខាធិការដ្ឋាននៃគណៈកម្មការអន្តរក្រសួង លោក លោកស្រីជាប្រធាន អនុប្រធានមន្ទីរអភិវឌ្ឍន៍ជនបទរាជធានី ខេត្តទាំង ២៤ មេបញ្ជាការរងកងពលតូចអន្តរាគមន៍លេខ ៩ ព្រមទាំងមេបញ្ជាការ មេបញ្ជាការរងវរសេនាតូចចំណុះកងពលតូចអន្តរាគមន៍លេខ ៩ ក៏បានអញ្ជើញចូលរួមក្នុងពិធីនោះផងដែរ ។
លោក សេង សារី ប្រធានមន្ទីរអភិវឌ្ឍន៍ជនបទខេត្តព្រះវិហារ និងសមាជិកក្រុមការងារលេខាធិការដ្ឋាននៃគណៈកម្មការអន្តរក្រសួង បានឡើងរាយការណ៍ជូនគណៈអធិបតី និងអង្គពិធីជ្រាបពីចំនួន និងបរិមាណពូជដំណាំ និងបន្លែ ដែលមន្ទីរអភិវឌ្ឍន៍ជនបទរាជធានី ខេត្ត ទាំង ២៤ បានឧបត្ថម្ភសម្រាប់ចែកជូនគ្រួសារយោធិន និងនគរបាលដែលបាន និងកំពុងរស់នៅក្នុងភូមិអភិវឌ្ឍន៍ទាំង ៩ ដូចមាននៅក្នុងតារាងភ្ជាប់ជាមួយ និងបានថ្លែងអំណរគុណចំពោះលោក លោកស្រីប្រធាន អនុប្រធានមន្ទីរអភិវឌ្ឍន៍ជនបទទាំងអស់ដែលបានជួយឧបត្ថម្ភពូជដំណាំ និងបន្លែ និងអញ្ជើញចូលរួមក្នុងពិធីនេះ។
ឯកឧត្ដមនាយឧត្ដមសេនីយ៍ គន់ គីម បានថ្លែងអំណរគុណ និងការកោតសរសើរចំពោះ គណៈកម្មការ អន្តរក្រសួង ដែលដឹកនាំដោយ ឯកឧត្ដម ជា សុផារ៉ា បានយកចិត្តទុកដាក់ និងគិតគូរពីជីវភាពរស់នៅរបស់គ្រួ សារយោធិន និងនគរបាល។ ឯកឧត្ដមក៏បានណែនាំដល់មេបញ្ជាការ មេបញ្ជាការរងនៃកងវរៈសេនាតូចអន្តរាគមន៍លេខ៩ ឲ្យខិតខំយកចិត្តទុកដាក់ក្នុងការបែងចែក និងដាំដុះពូជដំណាំ និងបន្លែទាំងនេះ។ ឯកឧត្ដម នាយឧត្ដមសេនីយ៍ក៏បានសំណូមពរឲ្យមន្ទីរអភិវឌ្ឍន៍ជនបទខេត្តព្រះវិហារ សហការជាមួយមន្ទីរកសិកម្ម រុក្ខាប្រមាញ់ និងនេសាទខេត្ត ដើម្បីផ្ដល់ការណែនាំបន្ថែមពីបច្ចេកទេសនៃការដាំដំណាំដល់គ្រួសារយោធិន និងនគរបាលផងដែរ។
ពូជដំណាំ និងបន្លែទាំងអស់ខាងលើគ្រោងធ្វើការបែងចែកដល់គ្រួសារយោធិន និងនគរបាលដែល បាននិងកំពុងរស់នៅក្នុងភូមិអភិវឌ្ឍន៍ទាំង ៩ សរុប ចំនួន ៤៤៥ គ្រួសារ ដូចខាងក្រោម ភូមិសែនរុងរឿង ១ ចំនួន ៦០ គ្រួសារ ភូមិសែនរុងរឿង ២ ចំនួន ៥៦ គ្រួសារ ភូមិសែនរុងរឿង ៣ ចំនួន ៤៧ គ្រួសារ ភូមិសែនរុងរឿង ៤ ចំនួន ៣០ គ្រួសារ ភូមិសែនរុងរឿង ៥ ចំនួន ៩២ គ្រួសារភូមិសែនជ័យ ចំនួន ៦០ គ្រួសារភូមិតេជោបុស្សស្បូវ ចំនួន ១០ គ្រួសារភូមិសែនតេជៈ ចំនួន ៤៣ គ្រួសារភូមិតេជោមរកត ចំនួន ៤៧ គ្រួសារ ។
មុននឹងបញ្ចប់គណៈអធិបតីបានអញ្ជើញដាំកូនឈើហូបផ្លែ និងដំឡូងទុកជាអនុស្សាវរីយ៍ នៅភូមិសែនរុងរឿង៥។
អ្នកធ្វើរបាយការណ៍
ហួ កុលវ័ន្ត