គណៈកម្មការអន្តរក្រសួងរួមមានតំណាងក្រសួងអភិវឌ្ឍន៍ជនបទ និងក្រសួងសេដ្ឋកិច្ចនិងហិរញ្ញវត្ថុដឹកនាំដោយ ឯកឧត្ដម សួស គង់ រដ្ឋលេខាធិការក្រសួងអភិវឌ្ឍន៍ជនបទ តំណាងឯកឧត្ដម ជា សុផារ៉ា រដ្ឋមន្រ្ដីក្រសួងអភិវឌ្ឍន៍ជនបទ ព្រមទាំងមានការចូលរួមពី ឯកឧត្ដម គង់ អៀង នាយករងនាយកដ្ឋានវិស្វកម្មក្រសួងការពារជាតិបានអញ្ជើញទៅពិនិត្យស្ពានមួយកន្លែង នៅស្រុកត្បូងឃ្មុំ ខេត្តកំពង់ចាម កាលពីថ្ងៃទី ១២ខែមករា ឆ្នាំ ២០១០។
ឯកឧត្ដម គង់ អៀង បានមានប្រសាសន៍ថា ស្ពានបេតុងព្រែកបាតដីក្រោមមានប្រវែង ៧៥ ម៉ែត្រ ទទឺង ៧ម៉ែត្រ និង កម្ពស់ជាមធ្យម ៩,៥ ម៉ែត្រ ស្ថិតនៅក្នុងភូមិបាតដីក្រោម ឃុំបឹងព្រួល ស្រុកត្បូងឃ្មុំ បានចាប់ផ្ដើមសាងសង់កាលពីខែមេសា ឆ្នាំ ២០០៨ ហើយបានសាងសង់រួចរាល់ជាស្ថាពរនៅ ខែធ្នូ ឆ្នាំ ២០០៩ ក្នុងនោះបានចាក់ដីបង្ហាប់តាកក្បាលស្ពាន ទាំងសង្ខាងបានប្រវែង ២០០ម៉ែត្រ ព្រមទាំងបំពាក់អំពូលភ្លើងដើរដោយថាមពលពន្លឺព្រះអាទិត្យដែលជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន.សែន និងលោកជំទាវ ទៀតផង។
ក្នុងឱកាសចុះពិនិត្យដើម្បីធ្វើការវាយតម្លៃស្ពានបេតុងនេះ ឯកឧត្ដម សួស គង់ បានបញ្ជាក់ថា ដោយអនុវត្តតាមអនុសាសន៍ដ៏ខ្ពង់ខ្ពស់របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដី នៃព្រះរាជាណាចក្រកម្ពុជា កាលពីថ្ងៃទី ០១ ខែធ្នូ ឆ្នាំ ២០០៨ សម្ដេចបានប្រគល់ភារកិច្ចជូនក្រសួងអភិវឌ្ឍន៍ជនបទសហការជាមួយកងកម្លាំងវិស្វកម្មក្រសួងការពារជាតិដឹកនាំដោយ ឯកឧត្ដម ឝង់ អៀង ធ្វើការសាងសង់ស្ពាននេះឡើង។
ឯកឧត្ដម សួស គង់បានបន្តទៀតថា រាជរដ្ឋាភិបាលក្រោមការដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន ការស្ដារនិងកសាង ហេដ្ឋារចនាសម្ព័ន្ធរូបវន្ត ត្រូវបានចាត់ទុកជាការងារអាទិភាព សម្រាប់ប្រជាពលរដ្ឋជាពិសេសគឺប្រព័ន្ធផ្លូវគមនាគមន៍នៅទីជនបទដែលជាសរសៃឈាមសេដ្ឋកិច្ចដ៏សំខាន់របស់ប្រជាកសិករក្នុងការដឹកជញ្ជូនដោះដូរផលិតផលបានទាន់ពេលវេលាទន្ទឹមនិងនេះដែរស្ពានព្រែកបាតដីក្រោមនេះបានរួមចំណែកយ៉ាងសំខាន់ជួយសម្រួលប្រជាពលរដ្ឋរស់តាមដងទន្លេ មេគង្គដែលជាអ្នកមានមុខរបរធ្វើចម្ការដំណំផ្សេងៗ និងការដឹកជញ្ជូនផលិតផលទាំងនេះទៅកាន់ទីផ្សារ។
បន្ទាប់ពីបានពិនិត្យទៅលើលក្ខណៈបច្ចេកទេសរួចមក គណៈកម្មការអន្តរក្រសួងបានសម្រេចឯកភាពទទួលយក ១០០% និងរង់ចាំពិនិត្យបញ្ចប់រយៈពេលធានាសុពលភាពមួយឆ្នាំទៀត ។ ទន្ទឹមនិងនេះគណៈកម្មការបានស្នើឲ្យកងវិស្វកម្មរៀបជើងទេរចាក់បេតុង និងចាក់ដាល់ចម្លងក្បាលស្ពានបន្ថែមទៀតដើម្បីពង្រឹងគុណភាពនិងសោភ័ណភាពនៃស្ពាននេះឲ្យកាន់តែល្អប្រសើរឡើង៕
ឯកឧត្ដម សួស គង់ ដឹកនាំគណៈកម្មការអន្តរក្រសួងពិនិត្យ និងវាយតម្លៃការសាងសង់ស្ពាននៅក្នុងស្រុក ត្បូងឃ្មុំ ខេត្តកំពង់ចាម
