សេចក្ដីផ្ដើម
ប្រទេសកម្ពុជាជាប្រទេសមួយដែលមានផ្ទៃដីភាគច្រើនជាតំបន់ជនបទ និងមានប្រជាជនរស់តាម ជនបទចំនួន ១០,៧៧ លាននាក់ (៨០,៥% នៃប្រជាជនសរុប) រស់នៅក្នុងភូមិចំនួន ១៤,០៧៣ (យោងស្ថិតិជំរឿនឆ្នាំ ២០០៨)។ ប្រជាជនទាំងនេះភាគច្រើន គឺជាប្រជាជនដែលក្រីក្របំផុតនៅក្នុងសង្គមកម្ពុជា។
ការខ្វះនូវលទ្ធភាពទទួលបានការផ្គត់ផ្គង់ទឹកស្អាត គឺជាកត្តាមួយយ៉ាងច្បាស់ដែលកំណត់បាននូវភាពក្រីក្រនេះ។ ជាការពិតណាស់ដែលថាទឹកមានសារៈសំខាន់សម្រាប់ទ្រទ្រង់ជីវិតមនុស្ស ប៉ុន្តែទន្ទឹមនឹងនេះ ប្រសិនបើ យើងប្រើប្រាស់ទឹកមិនស្អាតដែលមានភាពកខ្វក់ទៅដោយភ្នាក់ងារបង្ករោគជាបាក់តេរី វីរុស និងអតិសុខុម ប្រាណនោះ នោះពពួកប៉ារ៉ាស៊ីតដង្កូវតូចៗទាំងនេះអាចដើរតួជាភ្នាក់ងារចំលងរោគបាន។ ប្រជាជនកម្ពុជា ជាច្រើននាក់ ដោយរាប់បញ្ចូលទាំងកុមារផងដែរនោះ កំពុងទទួលរងគ្រោះដោយជំងឺរាករូស និងជំងឺដំ កាត់ ផ្សេងទៀតដែលទាក់ទងនឹងទឹក។ ម៉្យាងវិញទៀត សម្រាប់សហគមន៍ជនបទ ដើម្បីទទួលបានទឹកសម្រាប់ ប្រើប្រាស់ គឺតែងជួបនូវការលំបាក និងត្រូវចំណាយពេលច្រើនផងដែរ ដែលជាហេតុធ្វើឱ្យខាតពេលវេលាមាន ប្រយោជន៍របស់ពួកគេក្នុងការចូលរួមកិច្ចការអភិវឌ្ឍន៍សង្គម និងសេដ្ឋកិច្ច។ ក្រៅពីការផ្គត់ផ្គង់ទឹកស្អាត សម្រាប់ទ្រទ្រង់សុខភាពមនុស្ស សហគមន៍ជនបទក៏កំពុងតែជួបប្រទះកង្វះខាតទឹកសម្រាប់ស្រោចស្រពស្រូវ និងផលដំណាំផ្សេងៗជាលក្ខណៈគ្រួសារលើ ទំហំ ដី ខ្នាតតូចផងដែរ ។ បច្ចុប្បន្នមានប្រព័ន្ធធារាសាស្ត្រខ្នាតតូចប្រហែលពី ៦០% ទៅ ៧៥% ដែលមិនមានដំណើរការល្អនោះទាមទារឲ្យអោយមានការស្តារ និងជួសជុលឡើងវិញដើម្បីធានានូវសុវត្ថិភាពស្បៀងនៅជនបទ។
ដោយយោងទៅលើបញ្ហាប្រឈមខាងលើនេះហើយ ការផ្គត់ផ្គង់ទឹកស្អាត និងទឹកសម្រាប់ស្រោចស្រពផលដំណាំខ្នាតតូច អាចជំរុញឱ្យការអភិវឌ្ឍមានភាពល្អប្រសើរឡើង ដែលអាចមើលឃើញយ៉ាងច្បាស់ នៅក្នុងជីវភាពរស់នៅរបស់ប្រជាជនក្រីក្រ។ ការទទួលបានប្រភពផ្គត់ផ្គង់ទឹកស្អាត និងទឹកស្រោចស្រពត្រូវបានទទួលស្គាល់ជាសកលថាជាតម្រូវការមូលដ្ឋានសម្រាប់ប្រជាជនរស់នៅជនបទ និងជាលក្ខខណ្ឌចម្បង មួយដែលជំរុញឱ្យមានការអភិវឌ្ឍ និងការគិតគូរយកចិត្តទុកដាក់កាត់បន្ថយភាព ក្រីក្រនៅជនបទសម្រាប់ប្រទេសកំពុងអភិវឌ្ឍន៍ជាពិសេសគឺនៅកម្ពុជា។
ដោយឡែកឆ្លងតាមការអនុវត្តវិស័យផ្គត់ផ្គង់ទឹកស្អាតរយៈពេលយ៉ាងយូរកន្លងមកនោះ បានបង្ហាញឱ្យឃើញថា វាមានសារប្រយោជន៍ជាច្រើន ទាក់ទិនទៅនឹងសុខភាព ដែលទទួលបានពីការកែលម្អនូវការផ្គត់ផ្គង់ទឹកនេះ។ ការទទួលបានប្រភពទឹកស្អាត និងអនាម័យដែលល្អ មិនត្រឹមតែនាំឱ្យសុខភាពមានភាព ប្រសើរឡើងប៉ុណ្ណោះទេ ថែមទាំងអាចជួយសំចៃបាននូវពេលវេលា និងថាមពល ព្រមទាំងបង្កើនឱកាស ប្រកបមុខរបរចិញ្ចឹមជីវិតផងដែរ។ ដើម្បីចូលរួមចំណែកដល់ការកាត់បន្ថយភាពក្រីក្រក្នុងតំបន់ជនបទនៃប្រទេសកម្ពុជា ព្រមទាំងដើម្បីកែលម្អស្ថានភាពសុខភាពសាធារណៈ និងស្ថានភាពរស់នៅរបស់ប្រជាជនជនបទ តាមរយៈការកែលំអការផ្គត់ផ្គង់ទឹកនៅតំបន់ជនបទនោះ ចាប់តាំងពីឆ្នាំ ២០០៣ មករាជរដ្ឋាភិបាលកម្ពុជាបានសម្រេចបង្កើតនូវនាយកដ្ឋានផ្គត់ផ្គង់ទឹកជនបទ (DRWS) មួយ ក្រោមឱវាទរបស់ក្រសួងអភិវឌ្ឍន៍
ជនបទ (MRD) ។
ចក្ខុវិស័យរបស់នាយកដ្ឋានផ្គត់ផ្គង់ទឹកជនបទ
ស្របតាមចក្ខុវិស័យរបស់ក្រសួងអភិវឌ្ឍន៍ជនបទ ដែលធានាឱ្យមាន “សហគមន៍ជនបទប្រកប ដោយសុខភាព សុភមង្គល និងសុវត្ថិភាព” នោះ នាយកដ្ឋានផ្គត់ផ្គង់ទឹកជនបទ កំណត់ចក្ខុវិស័យរបស់ខ្លួន ដោយធានាថា “ប្រជាជនក្នុងសហគមន៍ជនបទគ្រប់រូប នឹងមានលទ្ធភាពគ្រប់គ្រាន់ក្នុងការទទួលបានការផ្គង់ផ្គង់ទឹកស្អាត និងរស់នៅក្នុងបរិស្ថានមួយប្រកបដោយអនាម័យ ដែលយូរបំផុតចាប់ពីឆ្នាំ ២០២៥ ខាងមុខតទៅ”។ នៅពេលនោះ សហគមន៍ជនបទនឹងមានប្រព័ន្ធផ្គត់ផ្គង់ទឹកស្អាតដែលនៅក្បែរខ្លួន ព្រមទាំងអាចពឹង ផ្អែកលើខ្លួនឯង និងទទួលបានសិទ្ធិគ្រប់គ្រាន់ក្នុងការគ្រប់គ្រងការប្រើប្រាស់ទឹកស្អាតប្រកបដោយប្រសិទ្ធភាព និងមានដំណើរការពេញលេញនៅតាមផ្ទះរបស់ខ្លួន ដោយផ្អែកលើជំនួយពីខាងក្រៅតិចតួចបំផុត ដូច្នេះ សហគមន៍ជនបទនឹងរួចផុតពីបណ្ដាជំងឺទាក់ទិនទៅនឹងទឹក ដែលនាំឱ្យសុខភាពរបស់ពួកគេមានភាពប្រសើរ ហើយពួកគេអាចមានឱកាសកាន់តែច្រើនឡើងដើម្បីឱ្យស្ថានភាពរស់នៅរបស់ពួកគេមានភាពប្រសើរឡើង។ ក្រៅពីនេះដោយមើលឃើញបញ្ហាសុវត្ថិភាពស្បៀងនៅជនបទដែលពាក់ព័ន្ធយ៉ាងសំខាន់ទៅនឹងតម្រូវការទឹក នោះចាំបាច់ត្រូវមានការស្តារ និងជួសជុលឡើងវិញលើប្រព័ន្ធហេដ្ឋារចនាសម្ព័ន្ធស្រោចស្រពខ្នាតតូចចាំបាច់មួយចំនួនធំ។ ហេតុដូច្នេះហើយបានជា នាយកដ្ឋានផ្គត់ផ្គង់ទឹកជនបទកំណត់នូវទិសដៅរបស់ខ្លួនយ៉ាងម៉ត់ចត់ធ្វើ ការសិក្សា និងស្តាឡើងវិញនូវប្រព័ន្ធធារាសាស្ត្រ ខ្នាតតូចដែលចាំបាច់ទាំងនោះអោយស្របតាមបទដ្ឋានបច្ចេកទេស សមស្របនៅជនបទ ។
បេសកកម្មរបស់នាយកដ្ឋានផ្គត់ផ្គង់ទឹកជនបទ
ដូចមានចែងនៅក្នុងសេចក្ដីថ្លែងការណ៍អំពីគោលនយោបាយជាតិស្ដីពីការផ្គត់ផ្គង់ទឹក និងអនាម័យជនបទ រដ្ឋាភិបាលនឹងដើរតួនាទីជាអ្នកសម្រួលនៅគ្រប់ជាន់ថ្នាក់ និងធ្វើការលើកកម្ពស់នូវទំនាក់ទំនងរវាងសហគមន៍ និងអ្នកផ្គត់ផ្គង់អនាម័យ និងទឹកស្អាតជនបទ ព្រមទាំងក្រុមអ្នកប្រើប្រាស់ទឹក សម្រាប់ស្រោចស្រពខ្នាតតូចផងដែរ។ រដ្ឋាភិបាលក៏នឹងប្រឹងប្រែងពង្រឹងការសម្របសម្រួលរវាងស្ថាប័នពាក់ព័ន្ធ ក្នុងវិស័យទឹកស្អាត និងស្រោចស្រពខ្នាតតូច ធ្វើយ៉ាងណាឱ្យមានការប្រើប្រាស់បានយ៉ាងប្រសើរបំផុតនូវធនធានទាំងឡាយ ដើម្បីកាត់បន្ថយចំណាយលើសេវានានា ជៀសវាងការអនុវត្តការងារត្រួតគ្នាដដែលៗ និងដើម្បីផ្ដល់ជំនួយនៅទីណាដែលត្រូវការ។ ក្នុងការងារនេះ នាយកដ្ឋានផ្គត់ផ្គង់ទឹកជនបទ ក្នុងនាមជាទីភ្នាក់ងារកណ្ដាលរបស់រដ្ឋាភិបាលទទួលបន្ទុកលើការងារកែលម្អការផ្គត់ផ្គង់ទឹកស្អាតជនបទ គឺជាស្ថាប័នរៀបចំយុទ្ធសាស្ត្រ សម្របសម្រួល និងជំរុញការសម្របសម្រួលការងារកែលម្អការផ្គត់ផ្គង់ទឹកនៅតំបន់ជនបទក្នុងប្រទេសកម្ពុជាផងដែរ ហេតុដូច្នេះហើយ នាយកដ្ឋានផ្គត់ផ្គង់ទឹកជនបទ គឺជាស្ថាប័នដែលមានតួនាទីចម្បងពីរគឺ (i) ជាអ្នកជំរុញ និងសម្របសម្រួលការងារជាមួយទីភ្នាក់ងារ និងដៃគូអភិវឌ្ឍន៍ផ្សេងទៀត ទាក់ទិននឹងការងារកែលម្អការផ្គត់ផ្គង់ទឹកស្អាតជនបទ និង (ii) ជាផ្នែកគ្រប់គ្រងការងាររៀបចំ ផែនការយុទ្ធសាស្ត្រ និងអនុវត្តកម្មវិធី តាមរយៈស្ថាប័ននៅថ្នាក់ស្រុក និងខេត្ត។ នៅក្នុងបរិបថនេះ បេសកកម្មរបស់នាយកដ្ឋានផ្គត់ផ្គង់ទឹកជនបទ ត្រូវបានកំណត់ដូចខាងក្រោម ៖
បំផុសឱ្យមានការចូលរួមយ៉ាងសកម្មពីសំណាក់សហគមន៍ និងអ្នកផ្គត់ផ្គង់សេវាកម្មក្នុងការងារកែលំអការ ផ្គត់ផ្គង់ទឹកស្អាតជនបទ ដោយជំរុញឱ្យមានការផ្ដល់អំណាចដល់សហគមន៍ គំនិតផ្ដួចផ្ដើមពីសហគមន៍ សមភាពយេនឌ័រ និងការចូលរួមយ៉ាងសកម្មពីសហគមន៍ក្នុងការគ្រប់គ្រងប្រកបដោយចិរភាពនូវកម្មវិធីផ្គត់ផ្គង់ទឹកស្អាតជនបទ។
រៀបចំផែនការយុទ្ធសាស្ត្ររយៈពេលវែង និងមធ្យម សម្រាប់អនុវត្តនូវគោលនយោបាយ។
រៀបចំសេចក្ដីណែនាំបច្ចេកទេសសម្រាប់រៀបចំនូវផែនការសកម្មភាពជាតិ ដែលឆ្លើយតបទៅតាមតម្រូវការ និងតម្រូវការរបស់សហគមន៍។
សម្របសម្រួល និងគៀងគរជំនួយទាំងក្នុង និងក្រៅ និងការវិនិយោគក្នុងវិស័យនេះ សម្រាប់ការងារកែលំអ ការផ្គត់ផ្គង់ទឹកស្អាតជនបទ។
ធ្វើការអភិវឌ្ឍន៍ និងពង្រឹងជំនួយបច្ចេកទេសនៅក្នុងវិស័យអភិវឌ្ឍន៍ធនធានមនុស្ស ការស្រាវជ្រាវ និង ពង្រឹងចំណេះដឹងថ្នាក់សហគមន៍ តាមរយៈ កម្មវិធីអប់រំអនាម័យ និងការប្រើប្រាស់ទឹកស្អាត។
រៀបចំ និងពង្រឹងយន្តការ ឬ ប្រព័ន្ធត្រួតពិនិត្យ និងវាយតម្លៃអំពីការអនុវត្តន៍ការងារកែលំអការផ្គត់ផ្គង់ ទឹកស្អាតជនបទ ដើម្បីធានាបានថា ដំណើរការឈានទៅសម្រេចបានតាមចក្ខុវិស័យក្នុងផ្នែក ផ្គត់ផ្គង់ទឹក
ស្អាតជនបទដែលកំពុងត្រូវបានអនុវត្តយ៉ាងត្រឹមត្រូវ។
សម្រួលដល់ការពិនិត្យឃ្លាំមើលលើគុណភាពទឹកនៃប្រព័ន្ធផ្គត់ផ្គង់ទឹកស្អាតនៅតាមជនបទ តាមរយៈស្ថាប័ន ថ្នាក់ឃុំ ស្រុក និងខេត្ត។
តស៊ូមតិគាំទ្រគោលនយោបាយជាតិ និងរៀបចំបទបញ្ញត្តិ និងយុទ្ធសាស្ត្រសម្រាប់ការងារកែលំអការ ផ្គត់ផ្គង់ទឹកស្អាតជនបទ ដោយមានកិច្ចសម្របសម្រួលជាមួយនឹងក្រសួងពាក់ព័ន្ធផ្សេងទៀត សហគមន៍ម្ចាស់ ជំនួយ និងដៃគូអភិវឌ្ឍន៍នានា។
លើកកម្ពស់ និងប្រមូលផ្ដុំការវិនិយោគ និងការចូលរួមពីវិស័យឯកជនក្នុងការងារកែលំអការផ្គត់ផ្គង់ទឹក ស្អាតជនបទ។
លើកស្ទួយការស្តាសុវត្ថិភាពស្បៀងជនបទតាមរយៈផ្ដល់នូវការជួសជុលនិងស្តាប្រព័ន្ធស្រោចស្រពខ្នាតតូច មួយចំនួនដែលចាំបាច់។
ត្រូវកសាងនូវសហគមន៍អ្នកប្រើប្រាស់ទឹកស្រោចស្រពខ្នាតតូច និងជំរុញអោយមានយន្តការថែទាំប្រព័ន្ធ ប្រកបដោយថេរភាពដោយមូលដ្ឋានខ្លួនឯងផ្ទាល់។
ចាំបាច់កសាងអោយមាននូវគោលនយោបាយពាក់ព័ន្ធទៅនឹងវិស័យប្រព័ន្ធស្រោចស្រពខ្នាតតូចមួយដែល មានប្រសិទ្ធភាពឆ្លើយតបទៅនឹងបញ្ហាខាងលើ។ ដោយយោងទៅតាមបរិបទនៃច្បាប់ស្តីពីការគ្រប់គ្រង
ប្រភពទឹកនៅប្រទេសកម្ពុជាឆ្នាំ២០០៧។
អំពីសកម្មភាពរបស់នាយកដ្ឋានផ្គត់ផ្គង់ទឹកជនបទ
គោលដៅអភិវឌ្ឍន៍ ៖ រាជរដ្ឋាភិបាលកម្ពុជាបានប្រកាស “យុទ្ធសាស្ត្រចតុកោណរបស់ខ្លួនថា ជាឧបករណ៍ជំនួយ ក្នុងការអនុវត្តន៍កម្មវិធីនយោបាយរបស់រាជរដ្ឋាភិបាល សំដៅសំរេចឱ្យបាននូវការកាត់បន្ថយភាពក្រីក្រ ការ អភិវឌ្ឍន៍ វឌ្ឍនភាព វិបុលភាព ឯកភាពជាតិ និងសុភមង្គលសំរាប់ប្រជាជនកម្ពុជា។ ក្នុងយុទ្ធសាស្ត្រ ចតុកោណរបស់រដ្ឋាភិបាល មានចំណុចមួយផ្តោតទៅលើ៖ (១)ផ្តល់ជូនពលរដ្ឋគ្រប់រូបនូវទឹកស្អាតប្រកបដោយ សុវត្ថិភាព (២)ការពារពលរដ្ឋគ្រប់រូបពីជំងឺពាក់ព័ន្ធទៅនឹងទឹក (៣) ផ្គត់ផ្គង់ទឹកស្អាតឱ្យបានគ្រប់គ្រាន់ដើម្បីធានា បាននូវសុវត្ថិភាពចំណីអាហារ សកម្មភាពសេដ្ឋកិច្ច និងជីវភាពសមរម្យ (៤) ធានាឱ្យបានថា ធនធានទឹក និង បរិស្ថានពុំមានសារធាតុពុល។ រដ្ឋាភិបាលក៏បានដាក់គោលដៅអភិវឌ្ឍន៍សហសវត្សថ្មីជាសកលជាមួយដំណើរការ ថ្នាក់ជាតិផងដែរ ហើយរដ្ឋាភិបាលបានកំណត់ចេញនូវគោលដៅអភិវឌ្ឍន៍សហសវត្សរបស់កម្ពុជា (CMDGS) លើសពីនេះទៅទៀត ក្រសួងអភិវឌ្ឍន៍ជនបទបានប្តេជ្ញាអនុវត្តតាមគោលដៅរួមនៃការផ្គត់ផ្គង់អនាម័យ និងទឹក ស្អាតជនបទនៅក្នុង CMDGS ដែលមានគោលដៅបង្កើនចំនួនប្រជាជននៅជនបទ ដែលមានលទ្ធភាពទទួល បានទឹកស្អាតពីអត្រា ២៤% នៅក្នុងឆ្នាំ ១៩៩៨ ទៅដល់ ៥០% នៅក្នុងឆ្នាំ ២០១៥ ផងដែរ ហើយ គោលដៅរយៈពេលវែង មានទិសដៅឆ្ពោះទៅរកការគ្របដណ្តប់ឱ្យបានជាសកល នូវសេវាផ្គត់ផ្គង់ទឹកស្អាត មានលក្ខណៈប្រសើរជាងមុននៅក្នុងតំបន់ជនបទទាំងមូល ឱ្យបានយ៉ាងយូរបំផុតចាប់ពីឆ្នាំ ២០២៥ តទៅ ដូច មានចែងនៅក្នុងចក្ខុវិស័យនៃគោលនយោបាយជាតិ។
របៀបវារៈជាគន្លឹះនៃការកែលំអការផ្គត់ផ្គង់ទឹកនៅតំបន់ជនបទ ៖ ផ្អែកតាមការងាររបស់នាយកដ្ឋាន និងក្នុង គោលបំណងឆ្ពោះទៅសំរេចឱ្យបានតាមគោលដៅថ្នាក់ជាតិ និងគោលបំណងនៃបណ្តាកម្មវិធីផ្គត់ផ្គង់ទឹកស្អាត តាមតំបន់ជនបទនៅក្នុងប្រទេសកម្ពុជា នាយកដ្ឋានផ្គត់ផ្គង់ទឹកជនបទកំណត់ចេញនូវរបៀបវារៈជាគន្លឹះ របស់
ខ្លួនសំរាប់ការងារកែលំអការផ្គត់ផ្គង់ទឹកស្អាតជនបទដូចខាងក្រោម ៖
ការតស៊ូមតិគាំទ្រគោលនយោបាយ និងការរៀបចំយុទ្ធសាស្ត្រ ក្រោមកិច្ចសហប្រតិបត្តិការជាមួយនឹង ក្រសួងពាក់ព័ន្ធផ្សេងទៀត ទីភ្នាក់ងារម្ចាស់ជំនួយសំខាន់ៗ និងដៃគូ អភិវឌ្ឍន៍នានា
ការរៀបចំផែនការយុទ្ធសាស្ត្រ និងផែនការអភិវឌ្ឍន៍រយៈពេលមធ្យម ដើម្បីសម្រេចបានតាម គោលដៅថ្នាក់ជាតិសម្រាប់ការងារកែលំអការផ្គត់ផ្គង់ទឹកស្អាតជនបទ
ការប្រមូលផ្ដុំនូវធនធានហិរញ្ញវត្ថុ និងការអភិវឌ្ឍន៍ធនធានមនុស្សសម្រាប់កម្មវិធីកែលំអការផ្គត់ផ្គង់ ទឹកស្អាតជនបទ
ការសម្របសម្រួល និងការសហប្រតិបត្តិការជាមួយនឹងដៃគូអភិវឌ្ឍន៍ផ្សេងទៀត សម្រាប់ការអនុវត្តន៍ កម្មវិធីផ្គត់ផ្គង់ទឹកស្អាតជនបទ តាមរយៈវិធីសាស្ត្ររួម ដែលសម្របទៅតាមយុទ្ធសាស្ត្ររបស់វិស័យ និង ការកំណត់ទិសដៅលទ្ធផលសម្រាប់ការអភិវឌ្ឍន៍ប្រព័ន្ធផ្គត់ផ្គង់ទឹកស្អាតដែលមានលក្ខណៈប្រសើរឡើង
ការគ្រប់គ្រងជារួម និងការពិនិត្យបច្ចេកទេសក្នុងការអនុវត្តន៍កម្មវិធីផ្គត់ផ្គង់ទឹកស្អាតជនបទ ដើម្បី ធានាបានថា ភាគីពាក់ព័ន្ធសំខាន់ៗនឹងចូលរួម ព្រមទាំង អនុវត្តតាមការណែនាំ និងគោលការណ៍ យុទ្ធសាស្ត្រថ្នាក់ជាតិ ដើម្បីលើកកម្ពស់សេវាកម្មផ្គត់ផ្គង់ទឹកស្អាតជនបទ។
ការពិនិត្យ និងការវាយតម្លៃដែលមានទិសដៅ (i) គ្រប់គ្រងនូវចិរភាព និង ប្រសិទ្ធភាពនៃមុខងារ ផ្គត់ផ្គង់ទឹកស្អាតជនបទ (ii) សម្របសម្រួលការអង្កេតថ្នាក់តំបន់ និងថ្នាក់ជាតិ និងការសិក្សាអំពីវិស័យ ក្នុងបទដ្ឋាន និងក្របខ័ណ្ឌជាតិ (iii) ព្រមទាំងប្រៀបធៀប និងកែសម្រួលនូវការអនុវត្តន៍កម្មវិធី អនុលោមទៅតាមផែនការយុទ្ធសាស្ត្រជាតិ និង គោលដៅអភិវឌ្ឍន៍
រៀបចំវេទិកាសាធារណៈ និងកិច្ចសន្ទនាសម្របសម្រួលវិស័យ ដើម្បីប្រមូលផ្ដុំ និងចែករំលែកបទពិសោធន៍ ដែលទទួលបានពីកម្មវិធីផ្គត់ផ្គង់ទឹកស្អាតជនបទផ្សេងៗ ដើម្បីរៀបចំ និង កែសម្រួលបច្ចេកវិទ្យា សមស្រប ព្រមទាំងពង្រីកជម្រើសបច្ចេកវិទ្យា សម្រាប់ការងារកែលំអការផ្គត់ផ្គង់ទឹកស្អាតជនបទ នៅក្នុងប្រទេសកម្ពុជា។
ធ្វើការសិក្សានិងស្តាប្រព័ន្ធស្រោចស្រពខ្នាតតូចលើគម្រោងមានអាទិភាពខ្ពស់មួយចំនួនក្នុងខេត្តដែល មានការរាំងស្ងួតខ្លាំង ជាពិសេសខេត្តភាគខាងត្បូង។
យុទ្ធសាស្ត្រអនុវត្ត
ក/ផ្នែកកម្មវិធីទឹកស្អាត
នាយកដ្ឋានផ្គត់ផ្គង់ទឹកជនបទរៀបចំនូវ “យុទ្ធសាស្ត្រអនុវត្តន៍បីថ្នាក់” របស់ខ្លួនដូចខាងក្រោម នេះ ដើម្បីធានាបាននូវកិច្ចអន្តរាគមន៍ប្រកបដោយប្រសិទ្ធភាព និងការគ្រប់គ្រងប្រកបដោយប្រសិទ្ធផលនូវ កម្មវិធីផ្គត់ផ្គង់ទឹកស្អាតជនបទ ៖
1. កិច្ចអន្តរាគមន៍ថ្នាក់គ្រួសារ
ការលើកកម្ពស់អនាម័យ និងការប្រើប្រាស់ទឹក
ការបណ្ដុះបណ្ដាលបច្ចេកទេសស្ដីពីការគ្រប់គ្រងទឹកនៅថ្នាក់គ្រួសារ ដូចជាស្ដីពីសម្ភារៈស្តុកទឹកត្រឹម ត្រូវ ការលើកដាក់ទឹកប្រកបដោយសុវត្ថិភាពនៅតាមផ្ទះ ការថែទាំ និងរក្សាទុកយ៉ាងត្រឹមត្រូវនូវទឹក មិនទាន់ប្រើប្រាស់ និងទឹកប្រើរួចនៅតាមផ្ទះ ការចម្រោះទឹកស្អាតតាមវិធីសាមញ្ញតាមគ្រួសារ ៘
បញ្ហាសុខភាពទាក់ទិនទៅនឹងទឹក និងអនាម័យ ព្រមទាំងការអនុវត្តន៍ការថែទាំក្នុងគ្រួសារ
ការលើកកម្ពស់ចំណេះដឹងដើម្បីឱ្យមានការទទួលស្គាល់ និងការទទួលយកនូវតម្លៃពិតប្រាកដនៃការ ប្រើប្រាស់ទឹកស្អាត និងការអនុវត្តន៍ថែទាំអនាម័យផ្ទាល់ខ្លួនល្អ ព្រមទាំងការបង្កើតនូវតម្រូវការពិត ប្រាកដសំរាប់ការកែលំអអនាម័យ និងទឹកស្អាត។
2. កិច្ចអន្តរាគមន៍ថ្នាក់សហគមន៍
ការអភិវឌ្ឍន៍នូវប្រភពទឹកស្អាតដែលមានតម្លៃថោក និងអាចទុកចិត្តបាន
ការអភិវឌ្ឍន៍ស្ថាប័នសម្រាប់ប្រព័ន្ធផ្គត់ផ្គង់ទឹកស្អាតដែលគ្រប់គ្រងដោយសហគមន៍ (ដូចជា ក្រុមអ្នក ប្រើប្រាស់ទឹកស្អាត និងអនាម័យ និងក្រុមប្រឹក្សាឃុំ)
ការបង្កើតនូវប្រព័ន្ធគ្រប់គ្រងការផ្គត់ផ្គង់ទឹកតាមសហគមន៍ ដោយរាប់បញ្ចូលទាំង នីតិវិធីគ្រប់គ្រង ហិរញ្ញវត្ថុផងដែរ
ការបណ្ដុះបណ្ដាលសមត្ថភាពស្ដីពីការគ្រប់គ្រងការថែទាំ និងប្រតិបត្តិការត្រឹមត្រូវនៅថ្នាក់សហគមន៍ (ដូចជា ការបណ្ដុះបណ្ដាលស្ដីពីការថែទាំ និងប្រតិបត្តិការ ការគ្រប់គ្រងហិរញ្ញវត្ថុ ៘)
ការប្រមូលផ្ដុំសហគមន៍ និងការលើកកម្ពស់ការយល់ដឹងជាសាធារណៈស្ដីពីការចូលរួមយ៉ាងសកម្មពី សហគមន៍នៅក្នុងសកម្មភាពកែលំអអនាម័យ និងការផ្គត់ផ្គង់ទឹកស្អាតជនបទ
ភ្ជាប់(ឬ បញ្ចូល) នូវការងារផ្គត់ផ្គង់ទឹកស្អាត ជាមួយនឹងការងារកែលំអអនាម័យ និងអនាម័យផ្ទាល់ ខ្លួន ដើម្បីទទួលបានប្រសិទ្ធភាពខ្លាំងក្លាក្នុងការងារកែលំអសុខភាពឱ្យកាន់តែប្រសើរឡើង។
3. កិច្ចអន្តរាគមន៍ថ្នាក់ជាតិ
ការរៀបចំគោលនយោបាយ និងយុទ្ធសាស្ត្រស្ដីពីការកែលំអអនាម័យ និងទឹកស្អាត
ផែនការយុទ្ធសាស្ត្រ និងផែនការវិនិយោគដែលសំដៅសម្រេចឱ្យបាននូវគោលដៅអភិវឌ្ឍន៍រយៈពេល វែង និងគោលដៅដែលត្រូវសម្រេចឱ្យបានភ្លាមៗ (កម្មវិធីរយៈពេលមធ្យម និងរយៈពេលខ្លី) ដោយ រាប់បញ្ចូលនូវបញ្ហាដូចខាងក្រោម ៖
ការកែលំអទូទាំងវិស័យ
ផែនការអភិវឌ្ឍន៍តាមតំបន់
វិធីសាស្ត្រចម្រុះស្ដីពីការលើកកម្ពស់ទឹក អនាម័យ និងអនាម័យផ្ទាល់ខ្លួន
បញ្ហាចម្រុះ (ដូចជា ការបញ្ជ្រាបយេនឌ័រ ជនជាតិភាគតិច កិច្ចការពារបរិស្ថាន ការកាត់បន្ថយ ភាពក្រីក្រ ការកែលំអសុខភាពសាធារណៈ)
ការបង្កើតនូវកិច្ចសម្របសម្រួល កិច្ចសហប្រតិបត្តិការ និងភាពជាដៃគូថ្នាក់ជាតិ រវាងភ្នាក់ងារដែលពាក់
ព័ន្ធ សំខាន់ៗ
ការប្រមូលផ្គុំធនធាន ដោយរាប់បញ្ចូលទាំង ការវិនិយោគថ្នាក់ជាតិ និងជំនួយពីខាងក្រៅ
ការតស៊ូមតិគាំទ្រ និងការលើកកម្ពស់ការប្ដេជ្ញារបស់អ្នកនយោបាយរបស់រដ្ឋាភិបាល និងស្ថាប័នជាតិ
ដើម្បី ការកែលំអសេវាកម្មផ្គត់ផ្គង់ទឹកស្អាត សម្រាប់ប្រជាពលរដ្ឋគ្រប់រូបនៅជនបទ
យុទ្ធនាការស្ដីពីការប្រើប្រាស់ទឹកស្អាត និង ការលើកកម្ពស់អនាម័យ និងអនាម័យផ្ទាល់ខ្លួន តាមរយៈ ប្រព័ន្ធផ្សព្វផ្សាយមហាជន និងបណ្ដាញចែកចាយព័ត៌មាន
ការពិនិត្យ និងការប្រៀបធៀបកែសម្រួលការអនុវត្តន៍កម្មវិធីទឹកស្អាត
ខ/ផ្នែកកម្មវិធីធារាសាស្ត្រខ្នាតតូច៖
នាយកដ្ឋានផ្គត់ផ្គង់ទឹកជនបទរៀបចំនូវ “យុទ្ធសាស្ត្រអនុវត្តន៍បីថ្នាក់” របស់ខ្លួនមាន (១) កិច្ចសហប្រតិបត្តិការថ្នាក់ជាតិ (២)ធ្វើផែនការថ្នាក់ឃុំ និង (៣) ការអនុវត្តកម្មវិធីថ្នាក់សហគមន៍ ។
១.កិច្ចសហប្រតិបត្តិការថ្នាក់ជាតិ៖
នាយកដ្ឋានផ្គត់ផ្គង់ទឹកជនបទនៃក្រសួងអភិវឌ្ឍន៍ជនបទនិងធ្វើកិច្ចសហប្រតិបត្តិការយ៉ាងជិតស្និទ្ធជាមួយក្រសួងធនធានទឹក និងឧតុនិយមដើម្បីកំណត់នូវអត្តសញ្ញាណ និងតួនាទី ទទួលខុសត្រូវច្បាស់មួយរបស់នាយកដ្ឋាន
ផ្គត់ផ្គង់ទឹកជនបទដើម្បីងាយស្រួលក្នុងការគ្រប់គ្រងក៏ដូចជាការអនុវត្តធារាសាស្ត្រខ្នាតតូចដែរដូចដែលមាន
ចែងនៅក្នុងបរិបទរបស់ច្បាប់ស្ដីពីការគ្រប់គ្រងប្រភពធនធានទឹកឆ្នាំ ២០០៧ ។
២.ធ្វើផែនការថ្នាក់ឃុំ៖
នាយកដ្ឋានផ្គត់ផ្គង់ទឹកជនបទនិងធ្វើការយ៉ាងជិតស្និទ្ធជាមួយក្រុមប្រឹក្សាឃុំ-សង្កាត់តាមរយៈមន្ទីរ
អភិវឌ្ឍន៍ជនបទខេត្តនីមួយៗ និងមន្ត្រីស្រុករបស់ខ្លួនដើម្បីកំណត់នូវអត្តសញ្ញាណនិងផែនការដើម្បីធ្វើការ
អភិវឌ្ឍន៍ប្រព័ន្ធធារាសាស្ត្រខ្នាតតូចឱ្យបានសមស្របតាមតម្រូវការ។
៣,ការអនុវត្តកម្មវិធីនៅថ្នាក់សហគមន៍៖
នាយកដ្ឋានផ្គត់ផ្គង់ទឹកជនបទនិងធ្វើសម្របសម្រួល និងចលនាគណៈកម្មាធិការកសិករអ្នកប្រើប្រាស់
ទឹកតាមប្រព័ន្ធ ធារាសាស្ត្រនិមួយៗក្រោមការត្រួតពិនិត្យពីគណៈកម្មាធិការអភិវឌ្ឍន៍ភូមិតាមរយៈការគ្រប់គ្រងផ្នែកកិច្ចការរដ្ឋបាលរបស់ក្រុមប្រឹក្សាឃុំ។
អ្នករាយការណ៍
វេជ្ជបណ្ឌិត ម៉ៅ សារ៉ាយ ប្រធាននាយកដ្ឋានផ្គត់ផ្គង់ទឹកជនបទ
